រាជធានីភ្នំពេញ ៖ ក្នុងមួយរយៈចុងក្រោយនេះគេកត់សម្គាល់ថា កីឡាករជើងខ្លាំង ឡេះ តើក ស្ទើរតែបាត់មុខឈឹងតែម្ដងពីសង្វៀនប្រដាល់ ពេលលោកឡើងប្រដាល់ម្ដងៗក៏ហាក់ធ្លាក់ដៃធ្វើឱ្យមានការរិះគន់ពីសំណាក់
រាជធានីភ្នំពេញ ៖ ក្នុងមួយរយៈចុងក្រោយនេះគេកត់សម្គាល់ថា កីឡាករជើងខ្លាំង ឡេះ តើក ស្ទើរតែបាត់មុខឈឹងតែម្ដងពីសង្វៀនប្រដាល់ ពេលលោកឡើងប្រដាល់ម្ដងៗក៏ហាក់ធ្លាក់ដៃធ្វើឱ្យមានការរិះគន់ពីសំណាក់អ្នកគាំទ្រទៀតផង ។ ពាក់ព័ន្ធនឹងបញ្ហានេះកីឡាកររូបនេះអះអាងថា លែងចង់ឡើងប្រដាល់ទៀតហើយ ដោយសារតែឡើងរេញម្ដងៗឈឺខ្លួនច្រើនថ្ងៃមិនអាចធ្វើសំណង់បានជាប់លាប់ ដោយលោកបានចាត់ទុកមុខរបរសំណង់ថាជាឆ្នាំងបាយសំខាន់ទើបលោកខ្លាចពិបាករកកន្លែងធ្វើ ។
កីឡាករ ឡេះ តើក និយាយថា ដោយសារតែការប្រដាល់យូរៗទើបមានការផ្គូផ្គងម្ដង បានធ្វើឱ្យលោកងាកទៅចាប់អារម្មណ៍សំណង់ធ្វើជាជំនាញឆ្នាំងបាយវិញ ។ លោកថា អាជីពសំណង់ដ្បិតថាហត់ តែមិនឈឺខ្លួន ឬត្រូវដេកថ្ងូរដូចពេលឡើងវាយនោះទេ ហើយបើនិយាយពីប្រាក់ចំណូលវិញ ក៏ជាប់លាប់ផងដែរ គឺមិនខ្វល់រឿងដាច់បាយកណ្ដាលទីនោះទេ ។ លោកថា លោករៀនបានតិច ដូច្នេះក្រៅពីការប្រដាល់ គឺមានតែធ្វើសំណង់ប៉ុណ្ណោះ ទើបអាចរក្សាស្ថានភាពរស់នៅដោយជួលផ្ទះគេនៅភ្នំពេញបាន។ ចំពោះរឿងប្រដាល់លុះត្រាតែមានការផ្គូផ្គងទើបសម្រេចចិត្តឡើង តែក៏មិនសូវចង់ឡើងប៉ុន្មានដែរ ដោយសារតែមុនពេលឡើងយ៉ាងហោចក៏ត្រូវផ្អាកធ្វើសំណង់ដាច់លុយអស់មួយអាទិត្យដើម្បីហ្វឹកហាត់ ហើយក្រោយចុះពីរេញក៏ត្រូវសម្រាកមើលខ្លួនយ៉ាងហោចមួយអាទិត្យទៀត ទម្រាំតែអាចទទួលធ្វើសំណង់ទៀតបាន ។ លោកបង្ហាញភាពស្ទាក់ស្ទើរ ក្នុងការឡើងសង្វៀនបន្ទាប់ពីអាជីពប្រដាល់លែងជាជម្រើសទី១របស់លោកដោយបង្ហាញថា ជីវិតក្រៅកីឡារបស់អ្នកប្រដាល់ល្បីៗ គឺសុទ្ធតែស្ថិតក្នុងស្ថានភាពលំបាក ។
លោកនិយាយថា អត់ដឹងពេលណាបានឡើងបង្ហាញមុខលើសង្វៀនទៀតនោះទេ ដោយសារតែរាល់ថ្ងៃឱ្យតែខានធ្វើសំណង់ គឺមកវិញពិបាករកកន្លែងធ្វើ ហើយបើចេះតែសុំឈប់ច្រើន ក៏កន្លែងសំណង់ផ្សេងៗមិនចង់ទទួលដែរ ។ លោកថា សំណង់គឺជាប្រភពបង់ថ្លៃផ្ទះជួល និងតម្រូវការលើកូនប្រពន្ធរបស់ខ្លួន ប៉ុន្តែមិនមានន័យថា លោកចង់លាចេញពីការប្រដាល់នោះទេ គឺគ្រាន់តែលោកយល់ថាស្ថានភាពរស់នៅរបស់លោកនៅក្នុងពេលនេះមានភាពស្មុគស្មាញពិបាកមានពេលហ្វឹកហាត់ និងឡើងរេញបានច្រើនដូចអំឡុងពេលមុនប៉ុណ្ណោះ ។ លោកថា ការងារសំណង់ក្នុងមួយថ្ងៃយ៉ាងហោចណាស់ក៏បាន២ម៉ឺនរៀលដែរ ហើយបើធ្វើជាមួយមេល្អៗ គឺបាន២.៥០០០ទៅ២.៨០០០រៀល ដែលបានច្រើនគួរសមនៅពេលយើងធ្វើជាប់លាប់មេមិនសូវកាត់លុយ ។ លោកថា ការប្រដាល់លោកនៅតែស្រឡាញ់តែបើឱ្យឡើងប្រដាល់ហើយត្រូវខ្លីលុយគេដើម្បីបំប៉នខ្លួនហ្វឹកហាត់ លោកថា ជារឿងពិបាករស់ណាស់។ លោកថា ខ្លួនត្រូវរកប្រាក់ឱ្យបានរាល់ថ្ងៃក្នុងពេលតម្រូវការលើម្ហូបអាហារ ថ្លៃផ្ទះជួល និងការចំណាយលើភរិយា ដែលមិនអាចចេះតែពីបំពេញបំណងចង់ប្រដាល់ ហើយឱ្យប្រពន្ធកូនដាច់បាយនោះទេ ។ លោកថា ក្នុងពេលប្រឡូកប្រដាល់ជាប្រចាំពេលខ្លះប្រឈមនឹងការខ្វះខាតច្រើន ដោយសារតែប្រដាល់ដ្បិតថា បានលុយ៣០ម៉ឺន ទៅ៤០ម៉ឺន ប៉ុន្តែហុចលិចហុចកើតគឺសល់ដល់ផ្ទះតែប្រមាណ២០ម៉ឺនរៀលក្នុងមួយលើក ហើយមិនដែលរួចផុតពីការឈឺខ្លួននោះទៅទៀត ។ ក្រៅពីអាជីពសំណង់ លោកត្រូវឆ្លៀតជួយកិច្ចការផ្ទះទៀតទើបលោកបញ្ជាក់ថា វាពិបាកបើលោកចប់ម៉ោងសំណង់ហើយទៅហ្វឹកហាត់ដើម្បីឡើងរេញ ។
កីឡាករ ឡេះ តើក អាចនឹងត្រូវបាត់មុខពីការប្រដាល់ដោយយោងតាមហេតុផលជាប់រវល់ធ្វើសំណង់ ហើយមិនមានពេលបង្កើនសមត្ថភាពក្នុងការហ្វឹកហាត់នាពេលនេះ ។ លោកថា ពិបាកណាស់ដែលលោកឡើងប្រដាល់ហើយពេលបរាជ័យ ក៏ត្រូវអ្នកទស្សនារិះគន់ ។ លោកថា អ្នកគាំទ្រមិនដឹងពីស្ថានភាពលំបាករបស់កីឡាករម្នាក់ៗនោះទេ ដោយដឹងតែពីថា ប្រកួតមិនកើត ឡើងរេញមិនហាត់ វ៉ៃលក់ខ្លួន ឬប្រកួតដូរបាយប៉ុណ្ណោះ អ៊ីចឹងហើយទើបលោកនឿយណាយនឹងការប្រដាល់ ហើយសឹងតែបាត់មុខទាំងស្រុងនៅក្នុងពេលនេះ ។ ទោះបីយ៉ាងណាលោកអះអាងថា នឹងឡើងប្រដាល់យូរៗម្ដងដែរ ដើម្បីរំលឹកក្បាច់គុនផង និងដើម្បីកុំឱ្យមហាជនភ្លេចមុខផង ។ លោកមិនមានគម្រោងថា លាឈប់ពីការប្រដាល់នោះទេ បើទោះជាស្ថានភាពក្នុងការឡើងរេញ បានផ្ដល់សម្ពាធឱ្យលោកកាន់តែច្រើនទៅៗ ។ លោកនិយាយថា លោកមិនចង់ឮពាក្យឡើងប្រដាល់ដូរបាយនោះទេ ទើបលោកសម្រេចចិត្តមិនទទួលឡើងរេញ ក្នុងពេលលោកក៏មិនមានពេលហ្វឹកហាត់គ្រប់គ្រាន់ក្នុងការបំប៉នសមត្ថភាព ។ លោកទទូចកុំឱ្យមហាជនរិះគន់អ្នកប្រដាល់ធា្លក់ដៃ ដោយសារតែភាពជាក់ស្ដែង គឺអ្នកប្រដាល់ដែលខ្វះសមត្ថភាពរឹងមាំ គឺសុទ្ធតែលំបាកដូចជាលោកជាដើម ៕
ចែករំលែកព័តមាននេះ