ត្រូវប្រុងប្រយ័ត្ន ការពុលចំណីអាហារ !
ការពុលចំណីអាហារតែងតែកើតឡើងជាប្រចាំថ្ងៃដែលនាំឱ្យប៉ះពាល់ដល់ការរស់នៅ និងសុខភាពរបស់យើង រហូតដល់គ្រោះថ្នាក់ដល់អាយុជីវិតទៀតផង ។ ការពុលចំណីអាហារ គឺជា
រាជធានីភ្នំពេញ ៖ លោកវេជ្ជបណ្ឌិត តាន់ បូរ៉ានី ឯកទេសសណ្តំប្រពោនកម្មសង្គ្រោះបន្ទាន់បានលើកឡើងថា ការពុលចំណីអាហារតែងតែកើតឡើងជាប្រចាំថ្ងៃដែលនាំឱ្យប៉ះពាល់ដល់ការរស់នៅ និងសុខភាពរបស់យើង រហូតដល់គ្រោះថ្នាក់ដល់អាយុជីវិតទៀតផង ។ ការពុលចំណីអាហារ គឺជាការបរិភោគអាហារដែលមានមេរោគ សារធាតុពុល ឬសារធាតុគីមី ។
១) តើកត្តាអ្វីខ្លះដែលបណ្តាឱ្យមានការពុលចំណីអាហារ?
-ការពុលចំណីអាហារមានកត្តាចំបងជាច្រើនដែលចូលរួមដូចជា ៖
– ការបរិភោគអាហារដែលគ្មានអនាម័យ ចម្អិនមិនបានឆ្អិនល្អ និងមានមេរោគ (បាក់តេរី វីរុស អាមីប បារ៉ាសីត…) ដូចជា ៖ salmonella, staphylococcus, clostridium perfingens, bacillus cereus, clostridium botulinum….
– មិនបានលាងសំអាតបន្លែ ផ្លែឈើ សម្ភារចំអិនអាហារឱ្យបានស្អាត។
– ការបរិភោគចំណីអាហារដែលមានសារធាតុគីមី និងសារធាតុពុល។
– ការបរិភោគអាហារដែលហួសថែ្ងកំណត់ និងរក្សាគុណភាពមិនបានត្រឹមត្រូវ
– មិនបានលាងសំអាតដៃមុនពេលញ៉ាំចំណីអាហារ
២) រោគសញ្ញានៃការពុលចំណីអាហារ រោគសញ្ញាដែលកើតឡើងជាញឹកញាប់រួមមាន ៖
– ក្អួតចង្អោរ គ្រុនក្តៅ ឈឺក្បាល រាគរូស ឈឺពេញពោះ វិលមុខ អស់កំលាំងខ្លាំង
– រោគសញ្ញានៃការបាត់បង់សារធាតុទឹក (ស្ងួតមាត់ ស្រេកទឹក) ដែលបណា្តលមកពីការក្អួត និងរាគរូសខ្លាំង។
* រោគសញ្ញាធ្ងន់ធ្ងររួមមាន ៖
– សម្ពាធឈាមធ្លាក់ចុះ ជីពចរដើរញាប់ ឬខ្សោយ
– រាគរូស និងក្អួតច្រើនដងរយៈពេលយូរ
– ពិបាកនិយាយ សន្លឹម ឬបាត់បង់ស្មារតី
– ក្តៅខ្លួនខ្លាំងលើសពី ៣៨ អង្សារសេ និងរងារញាក់។
៣) តើមនុស្សប្រភេទណាខ្លះដែលងាយប្រឈម និងមានគ្រោះថ្នាក់បំផុតក្នុងការពុលចំណីអាហារ0x017d7
– កុមារដែលមានអាយុតិចជាង ៥ ឆ្នាំ
– ស្ត្រីមានផ្ទៃពោះ
– មនុស្សចាស់ដែលមានអាយុលើសពី៧០ឆ្នាំ
– មនុស្សដែលមានប្រព័ន្ធភាពស៊ាំចុះខ្សោយ
៤) តើអ្វីទៅជាផលវិបាកនៃការពុលចំណីអាហារ ? ផលវិបាករបស់វារួមមាន ៖
– ខ្សោយក្រលៀន និងកោសិកាថ្លើម
– ការស្លេកស្លាំងដោយការបែកគ្រាប់ឈាម ខ្សោយក្រលៀន និងកំណកឈាមថយចុះ (Hemolytic-uremic syndrome)
– ចំពោះស្ត្រីមានផ្ទៃពោះអាចឱ្យមានការសម្រាលមុនកំណត់ ការរលូត និងការលូតលាស់ទារកខុសធម្មតា ។
៥) វិធីការពារ ៖ យើងអាចបង្ការការពុលចំណីអាហារនេះបានដោយ ៖
– លាងសំអាតបន្លែ ផ្លែឈើ សាច់ និងសម្ភារប្រើសម្រាប់ចំអិនម្ហូបឱ្យបានស្អាត។
– ប្រើប្រាស់ទឹកស្អាត និងម្ហូបអាហារដែលស្អាត និងឆ្អិនជានិច្ច។
– ត្រូវរក្សាទុក បន្លែ ផ្លែឈើ សាច់ នៅក្នុងសីតុណ្ហភាពតូចជាង ៥ អង្សារសេ ហើយបើនៅក្នុងប្រព័ន្ធកំដៅត្រូវលើសពី ៦០ អង្សារសេ។
– ចំអិនអាហារឱ្យបានឆ្អិនល្អ ជាពិសេស សាច់ សត្វស្លាប ស៊ុត និងអាហារសមុទ្រ
– ទុកដាក់ចំណីអាហារឆៅ និងឆ្អិន ឲ្យដាច់ដោយឡែកពីគ្នា
– ហាមប្រើប្រាស់សារធាតុគីមីក្នុងការចំអិនអាហា ។
– កុំប្រើប្រាស់ចំណីអាហារដែលហួសកាលកំណត់ប្រើប្រាស់។
– ត្រូវលាងដៃនឹងសាប៊ូមុនពេល និងអំឡុងពេលរៀបចំម្ហូបអាហារ មុនបរិភោគ និងក្រោយពេលបន្ទោរបង់រួច។
៦) តើយើងត្រូវធ្វើដូចម្តេចនៅពេលពុលចំណីអាហារ?
រាល់ការពុលចំណីអាហារត្រូវតែទទួលការព្យាបាលឱ្យបានត្រឹមត្រូវ និងតាមដានដោយយកចិត្តទុកដាក់ និងទាន់ពេលវេលា ដើម្បីទប់ស្កាត់ផលវិបាកផ្សេងៗដែលកើតឡើង។ លោកវេជ្ជបណ្ឌិតបានបញ្ជាក់ថា ប្រសិនបើលោកអ្នកមានរោគសញ្ញាដូចខាងលើ សូមមកពិគ្រោះ និងទទួលការព្យាបាលជាមួយក្រុមគ្រូពេទ្យឯកទេសនៅមន្ទីរពេទ្យកាល់ម៉ែត ដើម្បីចៀសវាងការបង្កឲ្យមានគ្រោះថ្នាក់ដល់អាយុជីវិត ៕
ចែករំលែកព័តមាននេះ