គោលនយោបាយថ្មីអាចជំរុញការវិនិយោគនៅមីយ៉ាន់ម៉ា
ប្រទេសមីយ៉ាន់ម៉ា ៖ គោលនយោបាយវិនិយោគថ្មីចំនួន៧ ត្រូវបានតាក់តែងឡើង ដោយផ្តល់អាទិភាពលើអាជីវកម្មចំនួន៨ ។ នេះបើតាមអគ្គនាយករងក្រុមហ៊ុន DICA លោក Than Aung Kyaw
ប្រទេសមីយ៉ាន់ម៉ា ៖ គោលនយោបាយវិនិយោគថ្មីចំនួន៧ ត្រូវបានតាក់តែងឡើង ដោយផ្តល់អាទិភាពលើអាជីវកម្មចំនួន៨ ។ នេះបើតាមអគ្គនាយករងក្រុមហ៊ុន DICA លោក Than Aung Kyaw បានឱ្យដឹងកាលពីថ្ងៃទី១៥ វិច្ឆិកា ។
អាជីវកម្មទាំងនោះមានដូចជា ផ្នែកធ្វើដំណើរ ផលិតកម្មកសិកម្មមានតម្លៃខ្ពស់ អាជីវកម្មភ្ជាប់បណ្តាញផលិតកម្មក្នុងតំបន់និងពិភពលោក ការជំរុញបច្ចេកវិទ្យា ព្រមទាំងអាជីវកម្មដែលជួយត្រួសត្រាយផ្លូវសម្រាប់ការអភិវឌ្ឍមុខជំនួញខ្នាតតូច និងមធ្យម ។
ការផ្សព្វផ្សាយទាក់ទងនឹងហេដ្ឋារចនាសម្ព័ន្ធក្នុងតំបន់ និងគម្រោងឧស្សាហកម្មពិសេស ត្រូវបានកំណត់ជាអាជីវកម្មអាទិភាព ដែលនាំឲ្យមានការបង្កើតឱកាសការងារ និងការបណ្តុះបណ្តាល ។
លោក Than Aung Kyaw ឱ្យដឹងថា នឹងមានប្រាក់លើកទឹកចិត្តដល់អាជីវកម្មនៅក្រោមគោលនយោបាយវិនិយោគថ្មីនេះ ។ លោកនិយាយថា ៖ « ប្រសិនបើមានការវិនិយោគក្នុងវិស័យដែលរដ្ឋាភិបាលដាក់ជាអាទិភាពនោះ គឺនឹងត្រូវបានកាត់បន្ថយពន្ធ ឬមិនគិតថ្លៃពន្ធ » ។
អ្នកតំណាងក្រុមហ៊ុន Pyithu Hluttaw លោក Lwin Ko Latt ឱ្យដឹងថា ខ្សែសង្វាក់ផ្គត់ផ្គង់ត្រូវសម្លឹងមើលទៅលើការបង្កើនអត្ថប្រយោជន៍ជាអតិបរមាដល់កសិករ និងក្រុមហ៊ុននាំចេញ ។
លោក Lwin Ko Latt បានឱ្យដឹងក្នុងសន្និសីទកាសែត ស្តីពីថវិការបស់ប្រជាពលរដ្ឋ កាលពីថ្ងៃទី១០ វិច្ឆិកា ថា ៖ « ទីផ្សាររបស់អ្នកប្រើប្រាស់នឹងមានទំនុកចិត្តបន្ថែមទៀត ដោយសារតែគុណភាពផលិតផលល្អប្រសើរជាងមុន » ។
លេខាធិការគណៈកម្មការវិនិយោគមីយ៉ាន់ម៉ា (MIC) លោក Aung Naing Oo និយាយថា ការអភិវឌ្ឍក្នុងប្រទេសនិងតំបន់ នឹងត្រូវបានពិចារណា ក៏ដូចជាការអភិវឌ្ឍលើផ្នែកពាណិជ្ជកម្មពិសេស ។
លោកបន្តថា រីឯអាជីវកម្មដែលមិនបានកំណត់ក្នុងវិស័យអាទិភាព នឹងទទួលបានដីសម្បទាន ប្រសិនបើពួកគេប្រតិបត្តិការក្នុងតំបន់មិនទាន់មានការអភិវឌ្ឍ និងអាចជំរុញការរីកចម្រើនសេដ្ឋកិច្ចក្នុងតំបន់ ។ ចំណែកការវិនិយោគពីបរទេសដែលផ្តល់ផលប្រយោជន៍ដល់មីយ៉ាន់ម៉ា និងដៃគូពាណិជ្ជកម្ម ក៏នឹងត្រូវបានស្វាគមន៍សម្រាប់ក្របខ័ណ្ឌថ្មីនេះដែរ ។
គោលបំណងនេះ គឺដើម្បីផ្ដល់ឱ្យវិនិយោគិននូវប្រព័ន្ធហិរញ្ញវត្ថុដែលអាចជឿទុកចិត្តបាន ព្រមទាំងយន្តការដោះស្រាយជម្លោះ ។ គេសង្ឃឹមថា លក្ខខណ្ឌថ្មីនេះនឹងការពារដល់បរិស្ថានផងដែរ ៕
ចែករំលែកព័តមាននេះ