រាជធានីភ្នំពេញ ៖ សេចក្តីរាយការណ៍បន្តឱ្យដឹងថា ពាក់ព័ន្ធករណីគ្លីនិកយីហោ «De Beauté Clinic» បានវះកាត់ពង្រីកសុដន់ស្ត្រីម្នាក់ តែត្រូវប្រតិកម្មថ្នាំបណ្តាលឱ្យស្លាប់នោះ គិតត្រឹមវេលាម៉ោង០១ និង១០នាទីរសៀលថ្ងៃទី២១ វិច្ឆិកា នេះ ព្រះរាជអាជ្ញារងលោក ស្រី ម៉ាកនី សម្រេចបិទទីតាំងនោះជាបណ្តោះអាសន្ន ។
ការសម្រេចបិទទ្វារគ្លីនិក«De Beauté Clinic» នេះ គឺបន្ទាប់ពីត្រូវកម្លាំងចម្រុះចុះទៅត្រួតពិនិត្យផ្ទាល់ក្នុងគ្លីនិកនោះ កាលពីព្រឹកដោយរកឃើញនៅក្នុងបន្ទប់វះកាត់នោះ គ្មានការរៀបចំតាមលក្ខណៈស្តង់ដារ និងគ្មានបច្ចេកត្រឹមត្រូវទេ ហើយបន្ទប់នោះបានឆ្លងមេរោគទៀតផង ។
គួររំលឹកថា នាព្រឹកថ្ងៃទី២១ វិច្ឆិកា ២០១៦ នេះ មន្ទីរនៃក្រសួងសុខាភិបាល ព្រះរាជអាជ្ញារង ស្រី ម៉ានី និងមន្ត្រីជំនាញពាក់ព័ន្ធជាច្រើនទៀត បានចុះទៅពិនិត្យ និងស្រាវជ្រាវជាបន្ទាន់ ស្ថិតនៅតាំងគ្លីនិកមួយកន្លែងយីហោ «De Beauté Clinic» ស្ថិតនៅជិតរង្វង់កាំកូស៊ីធី ក្នុងខណ្ឌប្ញស្សីកែវ បន្ទាប់ពីស្ត្រីម្នាក់បានស្លាប់ ក្រោយពីវះកាត់ពង្រីកសុដន់ ដោយខុសបច្ចេកទេសនៅទីនោះ ។
ទាក់ទិននឹងករណីស្ត្រីស្លាប់ ដោយសារវះកាត់ពង្រីកសុដន់នោះ ត្រូវបានបុរសជាប្តីរៀបរាប់ពីដំណើររឿងទាំងទឹកភ្នែកថា មុនពេលប្រពន្ធគាត់សម្រេចចិត្តឱ្យខាងគ្លីនិក «De Beauté Clinic» ធ្វើការវះកាត់សុដន់នោះ គឺគាត់(ប្រពន្ធ)បានដឹងតាមរយៈប្រព័ន្ធហ្វេសប៊ុក ឃើញគ្លីនិកខាងលើធ្វើការផ្សព្វផ្សាយ ។
បន្ទាប់ពីគាត់ចាប់អារម្មណ៍ហើយ ក៏ចង់វះកាត់បានឆាតទៅឆាតមក សួរព័ត៌មាន និងតថ្លៃគ្នា ។ ចុងក្រោយគាត់ក៏ត្រូវថ្លៃក្នុងតម្លៃ៣ពាន់ដុល្លារ ដែលខាងគ្លីនិកព្រមក្នុងតម្លៃនោះ ។
ខាងគ្លីនិកបានធ្វើការវះកាត់លើសុដន់ធម្មតា ក៏ប៉ុុន្តែបន្ទាប់ពីវះកាត់ត្រឹមរយៈ២ថ្ងៃ ស្រាប់តែប្រតិកម្មថ្នាំ ក៏បញ្ជូនបន្តទៅមន្ទីរព្យាបាលអាស៊ីយូ ស្ថិតផ្ទះលេខ៥ ផ្លូវ៤០២ សង្កាត់ទំន់បទឹក ខណ្ឌចំការមន កាលពីវេលាម៉ោង០៤ និង៤០នាទីល្ងាចថ្ងៃទី២០ វិច្ឆិកា បន្ទាប់ពីពិនិត្យឃើញថា ថ្នាំនោះបានចូលទៅស៊ីគ្រឿងក្នុងអស់ហើយ ហើយមានអាការៈធ្ងន់ទៅៗ ដោយគ្រូពេទ្យប្រាប់ទៀតថា គ្មានសង្ឃឹមទេ ព្រោះប្រើថ្នាំលើសកំរិត ធ្វើឱ្យស៊ីសួត ស៊ីថ្លើម និងតម្រងនោមអស់ហើយ រហូតដល់ម៉ោង៤និង៤០នាទីល្ងាចថ្ងៃទី២០ ខែវិច្ឆិកា ស្ត្រីរងគ្រោះបានដាច់ខ្យល់ស្លាប់តែម្តង ។
គួរបញ្ជាក់ថា សាកសពស្ត្រីរងគ្រោះឈ្មោះរស់ សុខនី អាយុ៣៦ឆ្នាំ ជាអ្នកលក់ទូរទស្សន៍ ស្នាក់នៅភូមិក្រចេះ ស្រុកក្រចេះ ខេត្តក្រចេះ មានប្តីឈ្មោះផៃ វាសនា អាយុ៣៦ ជាលក់ដូរ មានកូន៤នាក់ ប្រុស៣នាក់ និងស្រីម្នាក់ ។
ហើយនៅព្រឹកថ្ងៃទី២១ វិច្ឆិកា នេះ ខាងមន្ទីរនៃក្រសួងសុខាភិបាល ព្រះរាជអាជ្ញារង ស្រី ម៉ានី និងមន្ត្រីជំនាញពាក់ព័ន្ធជាច្រើនទៀត បានចុះទៅពិនិត្យ និងស្រាវជ្រាវជាបន្ទាន់ ស្ថិតនៅតាំងគ្លីនិកមួយកន្លែងយីហោ «De Beauté Clinic» ស្ថិតនៅជិតរង្វង់កាំកូស៊ីធី ក្នុងខណ្ឌប្ញស្សីកែវ បន្ទាប់ពីស្ត្រីម្នាក់បានស្លាប់ ក្រោយពីវះកាត់ពង្រីកសុដន់ ដោយខុសបច្ចេកទេសនៅទីនោះ ។
ចែករំលែកព័តមាននេះ