ខេត្តប៉ៃលិន៖ ប្រជាពលរដ្ឋប្រមាណ ៣គ្រួសារ បាននាំគ្នាបើកបរម៉ូតូរ៉ឺម៉កដឹកផ្កា និងកូនឈើគ្រប់ប្រភេទ ចេញពីខេត្តកណ្តាល ធ្វើដំណើរលក់ដូរតាមដងផ្លូវ រហូតមកដល់ខេត្តប៉ៃលិន ដើម្បីបានថវិកា សម្រាប់ផ្គត់ផ្គង់ជីវភាពប្រចាំថ្ងៃ ដោយនាំគ្នាឈប់សម្រាក នៅក្នុងបរិវេណវត្តពោធិ៍មារាម ហៅវត្តប៉ាហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន។
តែពួកគេមានការត្អូញត្អែរពីការលក់ដូរ នាពេលនេះ មិនសូវមានអតិថិជនទិញយកទៅដាំ ពោល គឺក្នុង១ថ្ងៃ ការរកចំណូលស្ទើរតែមិនរួចថ្លៃសាំងនោះឡើយ។
បុរសឈ្មោះ ដា អាយុ ២៩ឆ្នាំ និងឈ្មោះ ភី អាយុ ៣២ឆ្នាំ រស់នៅខេត្តកណ្តាល បានឱ្យភ្នាក់ងារយើងដឹងថា ពួកគេមានគ្នា ៣នាក់ ដោយបើកបរម៉ូតូរ៉ឺម៉ក ម្នាក់ ១គ្រឿង ចេញពីស្រុកកំណើតអស់រយ:ពេលជាច្រើនថ្ងៃមកហើយ ខណ:ម្នាក់ៗ ដឹកផ្កាចម្រុះ ដូចជា ដើមឆ័ត្រម៉ាឡេ ផ្កាកូលាប ដើមឫស្សីតាំង និងកូនឈើហូបផ្លែដូចជា ដូងក្រអូប ក្រូចឆ្មា ក្រូចពោធិ៍សាត់ ក្រូចខ្លុង ដើមទឹកដោះគោ ដើមខ្នុរ ដើមស្វាយ ដោយលក់ដូរជាហូរហែ ក្នុង ១ដើម ចាប់ពីតម្លៃ ១៣០០០រៀលឡើងលើ។
ប្រភពបន្តទៀតថា ការលក់ដូរនេះ ក្នុង ១ថ្ងៃ អាចមានប្រជាពលរដ្ឋតាមភូមិ ទិញយកទៅដាំតិចតួចបំផុត លុះដល់ពេលល្ងាច នាំគ្នាសរុបថវិកាបានប្រហែល ៤០០០០រៀល ទៅ ៥០០០០រៀល ក្នុង ១ថ្ងៃប៉ុណ្ណោះ លុះក្រោយពីផាត់ថ្លៃសាំងរួច នៅសល់តិចតួច ដើម្បីទុកផ្ញើឱ្យក្រុមគ្រួសារ ទិញម្ហូបអាហារ។ ម្យ៉ាងវិញទៀត ការប្រកបមុខរបរមួយនេះ ហាក់ដូចជា មានការលំបាក ដោយបើកបរម៉ូតូចេញពីភូមិមួយទៅភូមិមួយស្ទើរតែរកថវិកាចាក់សាំង មិនបាននោះឡើយ ព្រោះប្រជាពលរដ្ឋនៅតាមតំបន់នីមួយៗមិនសូវទិញយកទៅ ដាំនោះទេ។
ប្រភពដដែល បញ្ជាក់ទៀតថា ការលក់ដូរនេះ ចាប់តាំងពីព្រឹក រហូតដល់ថ្ងៃត្រង់ ទើបពួកគេនាំគ្នាឈប់សម្រាក នៅតាមម្លប់ដើមឈើ រួចដាំបាយធ្វើម្ហូបខ្លួនឯង លុះក្រោយពីហូបជួបជុំគ្នារួច ទើបលាងចានឆ្នាំង បន្តលក់ដូរនៅតាមភូមិ ដោយពួកគេមិនហ៊ានទិញបាយ ឬចូលហូបតាមភោជនីយដ្ឋាននោះឡើយ ព្រោះខិតខំប្រឹងប្រែងសន្សំថវិកា។ ជួនកាលពួកគេ ក៏ស្នាក់នៅតាមដីឡូតិ៍ ដែលទំនេរ តែមិនធ្លាប់មានបញ្ហាអ្វីកើតឡើងនោះឡើយ ដោយមានសុវត្ថិភាពជារៀងរហូតមកដែរ។ ដូច្នេះ ពួកគេក៏អំពាវនាវទទូចសុំឱ្យអតិថិជន ក៏ដូចជាប្រជាពលរដ្ឋ នៅតាមភូមិ នាំគ្នាជួយទិញផ្កា និងកូនឈើរបស់ពួកគេ ដើម្បីឱ្យពួកគេអាចរកថវិកា សម្រាប់ជីវភាពប្រចាំថ្ងៃ៕ នីយ៉ា
ចែករំលែកព័តមាននេះ