រាជធានីភ្នំពេញ ៖ លោក ពេជ្រ វិជ្ជាធរ អនុប្រធានសាលាដំបូងរាជធានីភ្នំពេញជាប្រធានក្រុមប្រឹក្សាជំនុំជម្រះ កាលពីព្រឹកថ្ងៃទី១០ ខែមិថុនា ឆ្នាំ២០២២ បានប្រកាសសាលក្រមផ្ទន្ទាទោសលើសំណុំរឿងអតីតអ្នកមានស្តុកស្តំម្នាក់ (ឧកញ៉ា សង ថង) និងអតីតអភិបាលរងខេត្តបាត់ដំបងម្នាក់ដាក់ពន្ធនាគារកំណត់៧ឆ្នាំម្នាក់ ដោយជាប់ចោទចំនួន៤បទល្មើសពាក់ព័ន្ធការទិញលក់ និងកាន់កាប់ដីធ្លីរបស់រដ្ឋប្រមាណ៥០០០ហិកតា នៅស្រុកគាស់ក្រឡ ខេត្តបាត់ដំបង ។
សាលក្រមបានបើកផ្លូវទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ បើសិនភាគីណាមួយមិនសុខចិត្តចំពោះការកាត់ក្តីនេះ ។ ក្រោយប្រកាសសាលក្រមជនជាប់ចោទទាំង២នាក់ត្រូវបានអនុរក្សពន្ធនាគារដឹកយកទៅឃុំខ្លួនវិញ ដើម្បីអនុវត្តទោសតាមអំណាចសាលក្រមនោះ ។
សាលក្រមបានបង្គាប់ឲ្យជនជាប់ចោទ ស៊ូ អារ៉ាហ្វាត់ ទូរទាត់សងប្រាក់ចំនួន ២៥ ០០០ដុលារ អាមេរិក ទុកជាសម្បត្តិរដ្ឋ ។
គួររម្លឹកថា កាលពីថ្ងៃទី១៧ ខែឧសភា ឆ្នាំ២០២២ សាលាដំបូងរាជធានីភ្នំពេញ បានលើកយកសំណុំរឿងអតីតឧកញ៉ា សង ថន និង លោក ស៊ូ អារ៉ាហ្វាត់ អតីតអភិបាលរងខេត្តបាត់ដំបងមកបើកសវនាការជំនុំជម្រះទោសពាក់ព័ន្ធទៅនឹងអំពើពុករលួយទិញ.លក់ដីធ្លីសាធារណៈរបស់រដ្ឋប្រមាណ៥០០០ហិកតា នៅស្រុកគាស់ក្រឡខេត្តបាត់ដំបង ។ សវនាការបានធ្វើឡើងជាសាធារណៈ និងចំពោះមុខជនជាប់ចោទ ដែលមានលោក ពេជ្រ វិជ្ជាធរអនុប្រធានសាលាដំបូងជាប្រធានក្រុមប្រឹក្សាជំនុំជម្រះ ។
សវនាការបានបញ្ចប់ការសាកសួរដេញដោលនៅព្រឹកថ្ងៃដដែល ទើបប្រធានក្រុមប្រឹក្សាបានលើកពេលប្រកាសសាលក្រមផ្តន្ទាទោសលើជនជាប់ចោទ នៅថ្ងៃទី១០ ខែមិថុនា ឆ្នាំ២០២២នេះ ។ ជនជាប់ចោទម្នាក់ឈ្មោះ ស៊ូ អារ៉ាហ្វាត់ អភិបាលរងខេត្តបាត់ដំបងជាប់ចោទពីបទ ១.បំផ្លិចបំផ្លាញដោយចេតនា ២.គៃបំបាត់ដោយទុច្ចរិត និង៣.ស៊ីសំណូក ។ និងម្នាក់ឈ្មោះ សង ថន ភេទប្រុស អាយុ៧០ឆ្នាំ អតីតឧកញ៉ា ជាប់ចោទពីបទ ១.ប្រើប្រាស់ឯកសារសាធារណៈក្លែង ២.ផ្តើមគំនិតក្នុងបទបំផ្លិចបំផ្លាញដោយចេតនា ៣.គៃបំបាត់ដោយទុច្ចរិត និង៤.សូកប៉ាន់ ។
សូមរម្លឹកទៀតថា ៖ លោក គុជ គឹមឡុង កាលនៅជាព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញ (បច្ចុប្បន្នព្រះរាជអាជ្ញា អមសាលាដំបូងខេត្តព្រៃវែង) បានផ្តល់ព័ត៌មានឲ្យដឹងថា នៅព្រឹកថ្ងៃទី៧ ខែកក្កដា ឆ្នាំ២០២០ លោក សឿន មុនីរ័ត្ន ព្រះរាជអាជ្ញារងនៃ អយ្យការអមសាលាដំបូងរាជានីភ្នំពេញបានសម្រេចធ្វើការចោទប្រកាន់ជនសង្ស័យ២នាក់ ពាក់ព័ន្ធសំណុំរឿងវិវាទដីធ្លីនៅស្រុកគាស់ក្រឡ ខេត្តបាត់ដំបងជាផ្លូវការហើយ បន្ទាប់ពីបើការស៊ើបសួរអស់រយៈពេលពេញមួយថ្ងៃ ។
ជនដែលត្រូវមាន១.ឧកញ៉ា សង ថន ត្រូវបានចោទប្រកាន់ពីបទផ្តើមគំនិតក្នុងការបំផ្លាញដោយចេតនា កេងបំបាត់ដោយទុច្ចរិត និងបទ សូកប៉ាន់ ។ ២.លោក ស៊ូ អារ៉ាហ្វាត់ អភិបាលរងខេត្តបាត់ដំបង ត្រូវបានចោទប្រកាន់ពីបទបំផ្លាញដោយចេតនា កេងបំបាត់ដោយទុច្ចរិត និងស៊ីសំណូក ។
ក្រោយពីតំណាងអយ្យការចោទប្រកាន់ជាផ្លូវការហើយ សំណុំរឿងនេះបានចាត់បញ្ជូនទៅខាងចៅក្រមស៊ើបសួរ និងបានស្ថិតនៅដៃលោក អ៊ឹម វណ្ណៈ ដែលកាន់សំណុំរឿងនេះ ទើបនៅព្រឹកថ្ងៃទី៧ ខែកក្កដា លោកចៅក្រមស៊ើបសួរ បានសម្រេចឃុំខ្លួនជនត្រូវដាក់ពន្ធនាគារព្រៃសជាបណ្តោះអាសន្នតែម្តងទៅ ។
សូមបញ្ជាក់ទៀតថា អង្គភាពប្រឆាំងអំពើពុករលួយ កាលពីព្រឹកថ្ងៃទី៦ ខែកក្កដា ឆ្នាំ២០២០ បានបញ្ជូនឧកញ៉ា សង ថន និងលោក ស៊ូ អារ៉ាហ្វាត់ ដែលជាអភិបាលរងខេត្តបាត់ដំបងទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរពាក់ព័ន្ធនឹងសំណុំវិវាទដីធ្លី ប្រមាណជាង៥ពាន់ហិកតា នៅស្រុកគាស់ក្រឡ ។
សំណុំរឿងនេះបានស្ថិតនៅដៃលោក សឿន មុនីរ័ត្ន ព្រះរាជអាជ្ញារងអមសាលាដំបូងបើកការស៊ើបសួរ ដែលការសាកសួរលើជនសង្ស័យ តំណាងអយ្យការបានប្រើពេលវេលាពេញមួយថ្ងៃ ទើបបានបញ្ចប់ ប៉ុន្តែចប់ហើយក៏មិនទាន់សម្រេចធ្វើការចោទប្រកាន់លើជនសង្ស័យទាំង២នាក់នោះជាផ្លូវការដែរ ដោយពេលវេលាផុតម៉ោងរដ្ឋបាល តំណាងអយ្យការបានផ្ញើជនសង្ស័យទៅអង្គភាពប្រឆាំងអំពើពុករលួយវិញ នឹងតម្រូវឲ្យនាំមកសាកសួរបន្តនៅព្រឹកថ្ងៃទី៧ ខែកក្កដា នេះទៀត ។
លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើ ពុករលួយ ថ្លែងប្រាប់បណ្តាញព័ត៌មានក្នុងស្រុក កាលពីព្រលប់ថ្ងៃទី១ ខែកក្កដា ឆ្នាំ២០២០ នេះថា លោក ស៊ូ អារ៉ាហ្វាត់ អភិបាលរងខេត្តបាត់ដំបង ត្រូវបានអង្គភាពប្រឆាំងអំពើពុករលួយ (ACU) នាំមកកាន់ស្នាក់ការរបស់ខ្លួននៅរាជធានីភ្នំពេញ ដើម្បីធ្វើការសាកសួរពាក់ព័ន្ធនឹងអំពើពុករលួយរឿងដីធ្លី នៅស្រុកគាស់ក្រឡ ខេត្តបាត់ដំបង ។
លោកទេសរដ្ឋមន្ត្រី បានបញ្ជាក់បន្ថែមថា គាត់ (ស៊ូ អារ៉ាហ្វាត់) ធ្លាប់ជាប្រធានគណៈកម្មការថ្នាក់ខេត្តដោះស្រាយវិវាទដីធ្លី នៅស្រុកគាស់ក្រឡ ខេត្តបាត់ដំបងនេះតែម្តង ។ ដែលនេះជារឿងតែមួយពាក់ព័ន្ធករណីឧកញ៉ា សង ថន ត្រូវអង្គភាព ACU ឃាត់ខ្លួន កាលពីថ្ងៃទី២៧ ខែមិថុនា ឆ្នាំ២០២០ នេះដែរ ។
លោកទេសរដ្ឋមន្ត្រី ប្រធានអង្គភាពប្រឆាំងអំពើពុករលួយបញ្ជាក់ប្រាប់បណ្តាញព័ត៌មានក្នុងស្រុកទៀតថា ការឃាត់ខ្លួននេះធ្វើឡើងបន្ទាប់ពីមានពាក្យបណ្តឹងរបស់ប្រជាពលរដ្ឋ ខណៈដែលឧកញ៉ារូបនោះមានដីប្រមាណ៥ពាន់ហិកតា ដែលស្មើនឹង១ភាគ៤ នៃផ្ទៃដីស្រុកគាស់ក្រឡ ទាំងមូល ។
បើតាមសេចក្តីរាយការឲ្យដឹងទៀតថា នៅថ្ងៃទី២៧ ខែមិថុនា ឆ្នាំ២០២០ នោះដែរ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏បានចេញអនុក្រឹត្យបញ្ចប់មុខតំណែងលោក ម៉ៅ សុចាន់ ពីអភិបាល នៃគណៈអភិបាល ស្រុកគាស់ក្រឡ ខេត្តបាត់ដំបងថែមទៀតផង ៕
ចែករំលែកព័តមាននេះ