ដំណឹងល្អ ! ពលរដ្ឋខ្មែរដែលរត់ពីសង្គ្រាមទៅអាមេរិកអាចសុំសញ្ជាតិខ្មែរ និងធ្វើអត្តសញ្ញាប័ណ្ណបាន
- ភ្នំពេញ
រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអនុញ្ញាតឲ្យប្រជាពលរដ្ឋខ្មែរដែលរត់ចេញពីកម្ពុជាក្នុងសម័យសង្គ្រាមទៅរស់នៅសហរដ្ឋអាមេរិក «អាចសុំសញ្ជាតិខ្មែរ និងធ្វើអត្តសញ្ញាណប័ណ្ណ» បាន ។ នេះបើតាមការបញ្ជាក់របស់ឯកឧត្តម សួស យ៉ារ៉ា អ្នកតំណាងរាស្ត្រគណបក្សប្រជាជនកម្ពុជា ។
ឯកឧត្តម សួស យ៉ារ៉ា ប្រធានគណៈកម្មការទី៥ នៃរដ្ឋសភាថ្លែងក្នុង កិច្ចប្រជុំពិគ្រោះយោបល់ជាមួយ ឯកអគ្គរាជទូត-រដ្ឋទូត ប្រចាំព្រះរាជា ណាចក្រកម្ពុជាស្តីពីដំណើរការប្រជាធិបតេយ្យក្នុងការបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី៥ កាលពីរសៀលថ្ងៃទី៨មិថុនា នៅវិមានរដ្ឋសភាថា ក្នុងជំនួបជាមួយប្រជាពលរដ្ឋខ្មែររស់នៅសហរដ្ឋអាមេរិកសម្តេចតេជោ ហ៊ុន សែន បានប្រកាសថា បានអនុញ្ញាតឲ្យប្រជាពលរដ្ឋដែលរត់ដោយសារសង្គ្រាមទៅរស់នៅសហរដ្ឋអាមេរិកអាចសុំសញ្ជាតិខ្មែរ និងធ្វើអត្តសញ្ញាណប័នបាន ។
ឯកឧត្តមបានបញ្ជាក់ថា ៖«វាជាការផ្តល់ឱកាសធំមួយដែលមិនក្នុងប្រវត្តិសាស្ត្រទេ គឺសម្តេចតេជោ បានអនុញ្ញាតឲ្យប្រជាជនខ្មែរដែលជំនាន់ទី១ ទី២ និងទី៣ ដែលបានរត់ពីសង្គ្រាមស៊ីវិលកម្ពុជាអាចមានសិទ្ធិស្នើសុំសញ្ជាតិដោយផ្ទាល់បានហើយអាចធ្វើសញ្ញាណប័ណ្ណខ្មែរបាន ។ នេះការគាំទ្រធំណាស់របស់ប្រជាជនយើងជុំវិញពិភពលោកក្នុងការបង្រួបបង្រួមខ្មែរដោយមិនប្រកាន់ព័ណ៌សម្បុរ និន្នាការនយោបាយនោះទេ» ។
ឯកឧត្តមបានគូសបញ្ជាក់ទៀតថា ៖«ពីមុនរដ្ឋាភិបាលបានអនុញ្ញាឲ្យធ្វើតែទិដ្ឋការរយៈពេលវែងមួយជីវិត ប៉ុន្តែអាលូវនេះគាត់ត្រូវបានឲ្យសិទ្ធិបោះឆ្នោតថែមទៀត ដែលបង្ហាញពីប្រជាធិបតេយ្យមួយទៀត ។ ខ្ញុំក្នុងនាមជារដ្ឋសភាសប្បាយរីករាយផងដែរ ដែលបងប្អូនខ្មែរអាចសុំសញ្ជាតិ និងធ្វើអត្ថសញ្ញាណប័ណ្ណ ដោយអាចបោះឆ្នោតនៅកម្ពុជាបាន»។
ឯកឧត្តមប្រធានបានលើកឡើងទៀតថា ការផ្តល់ឲ្យប្រជាពលរដ្ឋខ្មែរនៅក្រៅប្រទេសនេះបង្ហាញពីការពង្រឹងប្រជាធិបតេយ្យបន្ថែមសម្រាប់ប្រជាពលរដ្ឋ ដែលរស់នៅក្រៅប្រទេសមានសហរដ្ឋអាមេរិក និងអឺរ៉ុបជាដើម ។
ក្នុងកិច្ចប្រជុំនោះដែរ ឯកឧត្តម ឌឹម សុវណ្ណារុំសមាជិក គ.ជ.ប បានលើកឡើងថា ទាក់ទិននឹងការបោះឆ្នោត គឺប្រជាពលរដ្ឋអាចបោះឆ្នោតលុះត្រាមានគ្រប់អាយុ១៨ឆ្នាំហើយត្រូវមានឈ្មោះក្នុងបញ្ជីបោះឆ្នោត ។ ការធ្វើបច្ចុប្បន្នភាពបញ្ជីឈ្មោះបោះឆ្នោតត្រូវធ្វើនៅខែតុលាខាងមុខនេះ បន្ទាប់ពីការធ្វើបោះឆ្នោតឃុំ សង្កាត់រួច ៕
ចែករំលែកព័តមាននេះ