រាជធានីភ្នំពេញ ៖ គូស្នេហ៍វ័យក្មេងមួយគូត្រូវគេដឹងថា ដោយការស្រលាញ់គ្នាខ្លាំង ត្រូវម្តាយខាងប្រុសរៀបចំណាត់ខាងស្រីឱ្យមកផឹកស៊ីជាមួយកូនប្រុសដល់បន្ទប់ លុះផឹកស៊ីស្រវឹងត្រូវយុវតីវ័យក្មេងនោះទៅផ្ទះអត់រួច សម្រេចដេកនៅបន្ទប់ខាងប្រុសមួយយប់
រាជធានីភ្នំពេញ ៖ គូស្នេហ៍វ័យក្មេងមួយគូត្រូវគេដឹងថា ដោយការស្រលាញ់គ្នាខ្លាំង ត្រូវម្តាយខាងប្រុសរៀបចំណាត់ខាងស្រីឱ្យមកផឹកស៊ីជាមួយកូនប្រុសដល់បន្ទប់ លុះផឹកស៊ីស្រវឹងត្រូវយុវតីវ័យក្មេងនោះទៅផ្ទះអត់រួច សម្រេចដេកនៅបន្ទប់ខាងប្រុសមួយយប់ លុះព្រឹកឡើង ឪពុកខាងប្រុសបានមកប្តឹងសមត្ថកិច្ចឱ្យឃាត់ខ្លួនមកសាកសួរនាំ ដែលហេតុការណ៍នេះ បង្កភ្ញាក់ផ្អើលនៅចំណុចផ្ទះជួលមួយកន្លែង ក្នុងភូមិទ្រា៤ សង្កាត់ស្ទឹងមានជ័យ ខណ្ឌមានជ័យ នាវេលាព្រឹកថ្ងៃទី១៥ វិច្ឆិកា ២០១៦ ។
យុវតីជាគូស្នេហ៍មានឈ្មោះហ៊ន ស្រីលាង អាយុ១៧ឆ្នាំ ធ្វើការនៅរោងចក្រ មានស្រុកកំណើតនៅស្រុកស្រីសន្ធរ ខេត្តកំពង់ចាម ។ ចំណែកយុវជនជាសង្សារមានឈ្មោះផាន់ សុខ អាយុ២២ឆ្នាំ ជាកម្មកររោងចក្រ បច្ចុប្បន្នស្នាក់នៅបន្ទប់ផ្ទះជួលកើតហេតុ ៣នាក់ម្តាយ និងឪពុក មានស្រុកកំណើតនៅភូមិត្រពាំងរពៅ ឃុំព្រែកត្នោត ស្រុកទឹកឈូរ ខេត្តកំពត ។
ប្រភពបន្តឱ្យដឹងទៀតថា កាលពីវេលាម៉ោង០៦ល្ងាចថ្ងៃទី១៤ វិច្ឆិកា ស្ត្រីជាម្តាយយុវជនជាសង្សារឈ្មោះស៊ុន វី អាយុ៤៥ឆ្នាំ ជាចុងភៅ បានទូរស័ព្ទហៅយុវតីដែលត្រូវឪពុកអះអាងថា ជាជនរងគ្រោះ ឱ្យមកផឹកស៊ីនៅបន្ទប់របស់ខ្លួន ដែលមានសមាជិកផឹកស៊ីចំនួន៥នាក់ ។
ក្រោយពេលទូរស័ព្ទហៅរួចមក យុវតីខាងលើក៏យល់ព្រមមក ដោយមកជាមួយមិត្តភក្តិជាមនុស្សស្រីម្នាក់ទៀត ។ ស្ត្រីជាម្តាយយុវជនជាសង្សារបន្តថា ក្រោយការផឹកស៊ីស្រាថ្នាំតាំងពីវេលាក្បាលព្រលប់ រហូតដល់ម៉ោង១១យប់ថ្ងៃដដែល ដោយសភាពយុវតីជាសង្សារស្រវឹងខ្លាំងពេក រូបនាងពុំបានទៅផ្ទះឡើយ ដោយបានសម្រេចចិត្តសម្រាកនៅក្នុងបន្ទប់ខាងលើ មានគ្នា៦នាក់ ប្រុស៣នាក់ ស្រី៣នាក់ ។
នៅវេលាផឹកស៊ីចប់នោះ ឪពុកម្តាយខាងប្រុស២នាក់ បានចាកចេញពីបន្ទប់ខាងលើ ទៅផឹកស៊ីបន្តនៅផ្ទះមិត្តភក្តិ ម្តុំផ្សារដើមគរ បន្សល់ទុកក្មេងៗ៤នាក់ ឱ្យសម្រាកនៅបន្ទប់ខាងលើ ។ លុះវេលាព្រឹកឡើង ម៉ោងប្រមាណ៤ទៀបភ្លឺ យុវជនម្នាក់ រួមជាមួយនារីម្នាក់ បានចាកចេញពីបន្ទប់ខាងលើទៅផ្ទះរបស់ខ្លួន ដោយទុកឱ្យយុវតី និងយុវជនជាសង្សារ នៅក្នុងបន្ទប់តែ២នាក់ ។
តាមសម្តីរៀបរាប់របស់ឪពុកយុវតីជាសង្សារឱ្យដឹងថា ក្រោយពេលពុំបានឃើញកូនស្រីត្រឡប់ទៅផ្ទះ តាំងពីក្បាលល្ងាចមក គាត់ និងប្រពន្ធ បានតាមរកអស់មួយយប់មកហើយ ប៉ុន្តែពុំបានឃើញកូនស្រីសោះ ទូរស័ព្ទក៏បិទទៀត ខលពុំចូលសោះ ។ លុះមកទល់ព្រឹកឡើង ក៏ប្រទះឃើញស្បែកជើងកូនស្រី នៅមុខបន្ទប់របស់យុវជនជាសង្សារ បង្កឱ្យឪពុកស្រែកផ្អើលឆោឡោឱ្យបើកទ្វារ ភ្លាមៗនោះកូនស្រីបើកទ្វារចេញមក ក៏ស្រាប់តែប្រទះឃើញយុវជនជាសង្សារដេកសម្រាតខោអាវ សល់តែខោទ្រនាប់ ។
ក្រោយឃើញបែបនេះ បុរសជាឪពុក បានរត់មកប្តឹងសមត្ថកិច្ចមូលដ្ឋានដោយចោទថា យុវជនសង្សារបានល្បួងកូនស្រីគាត់មកដេកជាមួយ ដើម្បីរំលោភសេពសន្ថវៈ ។ ភ្លាមនោះ ត្រូវកម្លាំងនគរបាលបាននាំយុវជនជាសង្សារ និងយុវតីខាងលើ មកសាកសួរនាំពីដំណើររឿងនៅប៉ុស្តិ៍នគរបាល ។
នៅចំពោះមុខសមត្ថកិច្ច យុវជនជាសង្សារបានឆ្លើយថា ក្រោយកម្មវិធីផឹកស៊ីត្រូវបានបញ្ចប់ រូបខ្លួនពុំបានដឹងអ្វីនោះទេ ព្រោះខ្លួនស្រវឹងខ្លាំងណាស់ រហូតដល់ត្រូវសន្លប់បាត់បង់ស្មារតី ។ ដោយឡែក យុវតីជាសង្សារបានឆ្លើយថា យុវជនជាសង្សារ ពិតជាពុំបានធ្វើអ្វីខុសប្រក្រតីមកលើរូបខ្លួនឡើយ ក្រោយពេលការហូបចុកត្រូវបានបញ្ចប់ គ្រាន់តែបានសម្រាកនៅក្នុងបន្ទប់រួម ប៉ុន្តែពុំបានធ្វើអ្វីឡើយ ។
យ៉ាងណាមិញ នៅវេលាព្រឹកថ្ងៃដដែល បន្ទាប់ពីមានការសម្របសម្រួលអស់ជាច្រើនម៉ោង ពីសំណាក់នគរបាលយុត្តិធម៌ ឪពុកយុវតីរងគ្រោះ ក៏ព្រមយោគយល់អនុគ្រោះ មិនធ្វើការប្តឹងប្តល់ច្រើនទៀតទេ ដោយសំណូមពរឱ្យធ្វើកិច្ចសន្យា ឱ្យស្ត្រីជាម្តាយយុវជនជាសង្សារ បញ្ឈប់ការខលហៅកូនស្រីរបស់ខ្លួនទៅផឹកស៊ី រហូតឈានដល់ត្រូវដេកក្នុងបន្ទប់រួមជាមួយគ្នាបែបនេះទៀត ។
បើពុំដូច្នោះ លោកនឹងស្នើឱ្យសមត្ថកិច្ចចាត់ការទៅតាមនីតិវិធីច្បាប់ ។ ចំណែកបញ្ហាស្នេហា រវាងអ្នកទាំង២ លោកនឹងប្រាប់កូនស្រីឱ្យបញ្ចប់ត្រឹមនេះ ពុំអនុញ្ញាតឱ្យបន្តស្រលាញ់គ្នាទៀតឡើយ ។ ព្រោះលោកគិតថា ការស្រលាញ់ដោយធ្វើនូវទង្វើបែបនេះ វាពុំមែនជាការស្រលាញ់ពិតប្រាកដនោះទេ ប៉ុន្តវាជាការធ្វើឱ្យបាត់បង់កិត្តិយស មកលើកូនស្រីលោក ក៏ដូចជាក្រុមគ្រួសារទាំងមូលច្រើនជាង ។
សូមបញ្ជាក់ថា លើកនេះជាលើកទី៣ហើយ ដែលស្ត្រីជាម្តាយបង្កើតរបស់យុវជនជាសង្សារខលហៅយុវតីជាសង្សារទៅផឹកស៊ីដល់ក្នុងបន្ទប់ ប៉ុន្តែ២លើកកន្លងមក ពុំបានសម្រេចឡើយ ពោលក្រោយការផឹកស៊ីត្រូវបានបញ្ចប់ រូបនាងដើរត្រឡប់ទៅផ្ទះវិញ ដោយខ្លួនឯង ប៉ុន្តែទើបតែលើកនេះ មានចិត្តចង់សម្រាកម្តង ក៏កើតរឿងហេតុបែបនេះតែម្តងទៅ ។
ចែករំលែកព័តមាននេះ