រាជធានីភ្នំពេញ ៖ ប្រទេសកម្ពុជា និងអូស្ត្រាលី គឺជាដៃគូយូរអង្វែងដែលមានទំនាក់ទំនងការទូតផ្លូវការអស់រយៈពេល ៧០ ឆ្នាំមកហើយ ។ ទំនាក់ទំនងរបស់ប្រទេសទាំងពីរត្រូវបានពង្រឹងជាបន្តបន្ទាប់ និងយ៉ាងសកម្មទាំងក្នុងក្របខ័ណ្ឌពាណិជ្ជកម្មទ្វេភាគី…
រាជធានីភ្នំពេញ ៖ ប្រទេសកម្ពុជា និងអូស្ត្រាលី គឺជាដៃគូយូរអង្វែងដែលមានទំនាក់ទំនងការទូតផ្លូវការអស់រយៈពេល ៧០ ឆ្នាំមកហើយ ។ ទំនាក់ទំនងរបស់ប្រទេសទាំងពីរត្រូវបានពង្រឹងជាបន្តបន្ទាប់ និងយ៉ាងសកម្មទាំងក្នុងក្របខ័ណ្ឌពាណិជ្ជកម្មទ្វេភាគី និងកិច្ចសហប្រតិបត្តិការផ្សេងៗ រួមទាំងកិច្ចសហប្រតិបត្តិការរវាងនគរបាលសហព័ន្ធអូស្ត្រាលី និងនគរបាលជាតិកម្ពុជាផងដែរ ។ ទំនាក់ទំនងរវាងប្រទេសទាំងពីរកាន់តែមានភាពជិតស្និទ្ធជាងមុន ខណៈដែលយើង និងពិភពលោកបាននឹងកំពុងប្រយុទ្ធប្រឆាំងជំងឺកូវីដ-១៩ ។
កាលពីសប្តាហ៍មុន ឯកអគ្គរាជទូតអូស្ត្រាលី ឯកឧត្តម Pablo Kang បានអនុញ្ញាតផ្តល់បទសម្ភាសន៍ផ្តាច់មុខដល់សារព័ត៌មាន «កោះសន្តិភាព» ជុំវិញទំនាក់ទំនងទ្វេភាគីរវាងកម្ពុជា និងអូស្ត្រាលី ការផ្តល់វ៉ាក់សាំងបង្ការជំងឺកូវីដ-១៩ ដល់កម្ពុជា ផែនការនៃការនាំចូលផលិផលកសិកម្មកម្ពុជាទៅកាន់ទីផ្សារអូស្ត្រាលី និងសក្តានុពលនៃវិស័យអប់រំរបស់អូស្ត្រាលីដែលទទួលបានការចាប់អារម្មណ៍ខ្ពស់ពីសំណាក់មាតាបិតាខ្មែរដែលបានបញ្ជួនកូនៗទៅសិក្សានៅអូស្ត្រាលីជាដើម ។ អ្វីដែលពិសេសនោះ ឯកឧត្តម Pablo Kang បានពោលសរសើរថា ឯកឧត្តមមិនដែលពិសាគ្រាប់ស្វាយចន្ទីនៅកន្លែងណាផ្សេងទៀតក្នុងពិភពលោកឆ្ងាញ់ដូចដែលស្វាយចន្ទីនៅកម្ពុជានោះទេ ។
ខាងក្រោមនេះជាបទសម្ភាសន៍ផ្តាច់មុខរបស់ឯកឧត្តម Pablo Kang ជាមួយក្រុមការងារនៃសារព័ត៌មាន «កោះសន្តិភាព» នៅគេហដ្ឋានរបស់ឯកឧត្តមនៅរាជធានីភ្នំពេញ កាលពីថ្ងៃទី ២ ខែមិថុនា ឆ្នាំ២០២២ កន្លងទៅ ។
សំណួរ ៖ ប្រាកដណាស់យើងមើលឃើញថា មានយុវជនកម្ពុជាបានទៅបន្តការសិក្សាច្រើននៅទីនោះ តើឯកឧត្តម ឯកអគ្គរាជទូត Pablo Kang ជួយបកស្រាយបានទេ ថាតើមានសក្តានុពលអ្វីខ្លះពិសេសដែលធ្វើឱ្យមានការទាក់ទាញឪពុកម្តាយកម្ពុជាបញ្ជូនកូនៗទៅបន្តការសិក្សានៅអូស្ត្រាលី ? តើបច្ចុប្បន្នមាននិស្សិតខ្មែរកំពុងបន្តការសិក្សានៅអូស្ត្រាលី មានចំនួនប៉ុន្មាន (ទាំងការសិក្សាបង់ថ្លៃ និងតាមរយៈអាហាររូបករណ៍) និងសិក្សាលើមុខជំនាញអ្វីខ្លះ ?
ឯកឧត្តម Pablo Kang ៖ អរគុណ ថាវី ! សួស្តីអ្នកទាំងអស់គ្នា ។ ប្រាកដណាស់ មាននិស្សិតកម្ពុជាជាច្រើនជ្រើសរើសទៅសិក្សានៅប្រទេសអូស្ត្រាលី ឬត្រូវបានឪពុកម្តាយជ្រើសរើសបញ្ជូនពួកគេទៅសិក្សានៅប្រទេសអូស្ត្រាលី ។ តាមពិតទៅ បើយើងក្រឡេកមើលចំនួននិស្សិតកម្ពុជាសរុបដែលជ្រើសរើសទៅសិក្សាថ្នាក់សកលវិទ្យាល័យនៅក្នុងប្រទេសដែលនិយាយភាសាអង់គ្លេស ប្រហែលជា ៦០% នៃនិស្សិតទាំងអស់ដែលជ្រើសរើសទៅក្រៅប្រទេស គឺទៅសិក្សានៅប្រទេសអូស្ត្រាលី ។ វាជាចំនួនច្រើនគួរសម ។ យើងមិនទាន់មានតួលេខពេញលេញសម្រាប់ឆ្នាំ ២០២២ ទេ ប៉ុន្តែគិតត្រឹមឆ្នាំមុន យើងមាននិស្សិតកម្ពុជាចំនួន ២៧០០ នាក់បានចុះឈ្មោះទៅសិក្សានៅសាកលវិទ្យាល័យនានានៅអូស្ត្រាលី ។ ភាគច្រើនជានិស្សិតដែលបង់ថ្លៃសិក្សាខ្លួនឯង ប៉ុន្តែក៏មាននិស្សិតដែលទទួលបានអាហារូបករណ៍ផងដែរ ដែលបានចុះឈ្មោះដើម្បីសិក្សានៅសាកលវិទ្យាល័យអូស្ត្រាលីនេះ ។ កាលពីពីរសប្តាហ៍មុន ខ្ញុំបានជូនដំណើរនិស្សិត ដែលទទួលបានអាហារូបករណ៍អូស្ត្រាលី ចំនួន ៨០ នាក់ ទៅបន្តការសិក្សាទាំងថ្នាក់អនុបណ្ឌិត និងបណ្ឌិត នៅតាមសាកលវិទ្យាល័យអូស្ត្រាលី ។ ពួកគេរៀបចំនឹងចាកចេញទៅហើយ ។ ជាការពិតណាស់ជំងឺកូវីដ-១៩ បានពន្យារពេលមិនឱ្យពួកគេអាចធ្វើដំណើរបាន ព្រោះព្រំដែនត្រូវបានបិទ ប៉ុន្តែចាប់តាំងពីខែវិច្ឆិកាឆ្នាំមុន អូស្ត្រាលីបានបើកព្រំដែនរបស់ខ្លួនឡើងវិញ ដើម្បីទទួលនិស្សិតអន្តរជាតិ ។ កូវីដធ្វើឱ្យមានការកកស្ទះ ប៉ុន្តែនិស្សិតចំនួន ៨០ នាក់ អាចចាកចេញដំណើរទៅប្រទេសអូស្ត្រាលីបានហើយ នាពេលថ្មីៗនេះ ។
ហេតុអ្វីបានជាឪពុកម្ដាយកម្ពុជាជ្រើសរើសបញ្ជូនកូនទៅអូស្ត្រាលី ? វាមានកត្តាច្រើន ។ ខ្ញុំគិតថា អ្វីដែលសំខាន់បំផុតនោះគឺ កេរ្តិ៍ឈ្មោះរបស់យើងក្នុងការផ្តល់ការអប់រំឧត្តមសិក្សាដែលមានគុណភាពខ្ពស់ បើកញ្ញាមើលតារាងចំណាត់ថ្នាក់នៃសាកលវិទ្យាល័យពិភពលោកមួយចំនួន ដូចជាចំណាត់ថ្នាក់ QS World University ដែលទើបចេញថ្មីៗនេះ សាកលវិទ្យាល័យអូស្ត្រាលីចំនួនប្រាំពីរជាប់នៅក្នុងកំពូលសកលវិទ្យាល័យទាំង ១០០ នៅលើពិភពលោក ។ វាជាចំនួនច្រើនណាស់បើគិតជាភាគរយ ព្រោះចំនួនប្រជាជន និងចំនួនសាកលវិទ្យាល័យរបស់យើងមានមិនច្រើនទេ ។ សាកលវិទ្យាល័យទាំងនោះជាសាកលវិទ្យាល័យកំពូលៗ ប៉ុន្តែជាការពិតណាស់មានសាកលវិទ្យាល័យអូស្ត្រាលីជាច្រើនដែលមានកេរ្តិ៍ឈ្មោះល្បីទៅតាមមុខវិជ្ជាសិក្សាជាក់លាក់ ។ ដូច្នេះខ្ញុំគិតថា ការអប់រំដែលមានគុណភាពខ្ពស់ គឺជាកត្តាចំបង ហើយវាមិនមែនត្រឹមតែមានអាគារល្អ ការបង្រៀនត្រឹមត្រូវ មានការស្រាវជ្រាវ តែប៉ុណ្ណឹងទេ គឺមានទាំងវិធីដែលសាកលវិទ្យាល័យបង្រៀនសិស្សផងដែរ ។ សាកលវិទ្យាល័យយើងផ្តល់នូវបរិយាកាសសកម្ម បើកទូលាយឱ្យមានការសួរសំណួរជាច្រើន អំពីបច្ចេកទេសថ្មី មិនមែនចេះតែទទួលយកអ្វីដែលមាននៅក្នុងសៀវភៅសិក្សានោះទេ ហើយត្រូវរៀន និងសម្របខ្លួនឱ្យមានភាពបត់បែន ហ៊ាននិយាយ សំឡឹងមើលគំនិត និងមតិថ្មី ព្រមទាំងប្រភពព័ត៌មានថ្មីផងដែរ ។ ខ្ញុំគិតថា នេះជាការសំខាន់ណាស់ ។ ហេតុផលផ្សេងទៀត ខ្ញុំគិតថា មកពីយើងនៅជិតគ្នា អូស្ត្រាលីនៅមិនឆ្ងាយប៉ុន្មានពីកម្ពុជាទេ ។ ម៉ោងពេលក្នុងប្រទេសរបស់យើងទាំងពីរ មិនសូវជាខុសគ្នាទេ ។ ខ្ញុំគិតថា នេះជាការសំខាន់ណាស់សម្រាប់ឪពុកម្ដាយដែលចង់រក្សាទំនាក់ទំនងជាមួយកូនៗរបស់ពួកគេ តាមអ៊ីនធឺណិត ឬតាមទូរស័ព្ទ ឬក៏ទៅលេងផ្ទាល់ ។ ប្រទេសអូស្ត្រាលីនៅមិនឆ្ងាយពីនេះទេ ដូច្នេះខ្ញុំគិតថា នេះជាកត្តាជំរុញទឹកចិត្តដ៏ធំ ។
ដូចគ្នានេះផងដែរ ខ្ញុំគិតថា ប្រជាជនកម្ពុជាជាច្រើនធ្លាប់បានធ្វើដំណើរទៅប្រទេសអូស្ត្រាលី ។ ឪពុកម្តាយមួយចំនួនក៏ធ្លាប់បានទៅសិក្សា នៅប្រទេសអូស្ត្រាលីពីមុនមកដែរ ហើយក៏បានដឹងថា មានជនជាតិអូស្ត្រាលីជាច្រើននាក់ដែលមានដើមកំណើតខ្មែរ ។ ហើយក៏មានប្រជាជនកម្ពុជាជាច្រើនបានសម្រេចធ្វើការតាំងទីលំនៅក្នុងប្រទេសអូស្ត្រាលី ក្នុងរយៈពេលជាច្រើនឆ្នាំមកនេះ ។ ប្រទេសអូស្ត្រាលីមានបរិយាកាសចម្រុះវប្បធម៌ ។ ជាប្រទេសដែលមានចំនួនប្រជាជន និងសិស្សនិសិត្ស ចម្រុះជាតិសាសន៍ច្រើន ។ យើងមាននិស្សិតមកពីគ្រប់ជាតិសាសន៍ ហើយជាការពិតណាស់ ជនជាតិអូស្ត្រាលីខ្លួនឯងក៏ដូចជាប្រជាជនកម្ពុជាផងដែរ គឺយើងបើកចំហ ស្វាគមន៍ និងរួសរាយរាក់ទាក់ចំពោះគ្រប់គ្នា ។ ខ្ញុំគិតថា ទាំងនេះជាហេតុផលចម្បង ។ ឯការចំណាយក៏ជាកត្តាមួយដែរ ថ្លៃសិក្សារបស់យើងមានប្រសិទ្ធភាពខ្ពស់ បើនិយាយពីការចំណាយលើការអប់រំប្រៀបធៀបទៅនឹងប្រទេសដែលជឿនលឿន និងនិយាយភាសាអង់គ្លេសដូចយើង ។ បើនិយាយថា និស្សិតកម្ពុជាកំពុងសិក្សាមុខវិជ្ជាអ្វីនោះ វាអាស្រ័យលើពួកគេទាំងស្រុង ។ ពួកគេជាអ្នកជ្រើសរើសមុខវិជ្ជាដែលពួកគេចង់សិក្សា ដោយធ្វើការរួមគ្នាជាមួយសាកលវិទ្យាល័យដែលពួកគេទៅសិក្សា ។ គឺមានគ្រប់មុខវិជ្ជាទាំងអស់ ដូចជា ច្បាប់ គោលនយោបាយសាធារណៈ សេដ្ឋកិច្ច គណនេយ្យ ពាណិជ្ជកម្ម សុខភាពសាធារណៈ វិទ្យាសាស្ត្របសុពេទ្យ វិទ្យាសាស្ត្របរិស្ថាន ចិត្តវិទ្យា ប្រព័ន្ធផ្សព្វផ្សាយ និងទំនាក់ទំនង ។ល។ និស្សិតកម្ពុជានៅប្រទេសអូស្ត្រាលី សិក្សាសឹងតែលើគ្រប់មុខវិជ្ជាទាំងអស់ ។
សំណួរ ៖ ជុំវិញកំណើននិស្សិតខ្មែរទៅបន្តការសិក្សានៅអូស្ត្រាលីបន្តកើនឡើង និងមានពលរដ្ឋខ្មែររស់នៅអូស្ត្រាលីក៏ច្រើនផងដែរ ។ តើឯកឧត្តម ឯកអគ្គរដ្ឋទូត អាចជម្រាបជូនបានទេថា តើមានពលរដ្ឋខ្មែរប៉ុន្មានកំពុងរស់នៅប្រទេសអូស្ត្រាលី ? នៅទីក្រុងណាច្រើនជាងគេ ? ហើយតើអូស្ត្រាលីមានគម្រោងនៃការផ្តល់សេវាហោះហើរផ្ទាល់ (direct flight) រវាងអូស្ត្រាលី និងកម្ពុជាទេ ? បើមានតើនឹងចាប់ផ្តើមពីរដ្ឋណាមុនគេរបស់អូស្ត្រាលីមកភ្នំពេញ ?
ឯកឧត្តម Pablo Kang ៖ វាពិតជាល្អណាស់ ប្រសិនបើយើងមានជើងហោះហើរត្រង់ ហើយខ្ញុំដឹងថា រដ្ឋលេខាធិការក្រសួងអាកាសចរណ៍ស៊ីវិលក៏តែងតែសួរអំពីរឿងនេះ ពេលដែលខ្ញុំជួបពិភាក្សាជាមួយគាត់ ហើយខ្ញុំតែងតែឆ្លើយសាមញ្ញ ធម្មតាទៅវិញថា វាគឺជាការសម្រេចចិត្តរបស់ក្រុមហ៊ុនអាកាសចរណ៍ ។ វាជាជើងហោះហើរពាណិជ្ជកម្មដែលនឹងភ្ជាប់ទៅកាន់ប្រទេសអូស្ត្រាលី និងកម្ពុជាដោយផ្ទាល់ ដូច្នេះហើយចាំបាច់ត្រូវមានការជំរុញផ្នែកហិរញ្ញវត្ថុគ្រប់គ្រាន់សម្រាប់ក្រុមហ៊ុនអាកាសចរណ៍ ដើម្បីដំណើរការជើងហោះហើរត្រង់នេះ មានន័យថា ត្រូវតែមានតម្រូវការគ្រប់គ្រាន់ជាក់លាក់សិន ។ ពេលនេះ ប្រសិនបើយើងធ្វើដំណើររវាងអូស្ត្រាលី និងកម្ពុជា យើងត្រូវឆ្លងកាត់ប្រទេសទីបីសិន ដែលភាគច្រើន គឺប្រទេសសិង្ហបុរី ។ ដូច្នេះយើងមានក្រុមហ៊ុន Singapore Airlines, Qantas, Jetstar ដែលមានជើងហោះហើរតភ្ជាប់តាមប្រទេសសិង្ហបុរី ។ ម៉ាឡេស៊ី និងថៃ ក៏ជាជម្រើសមួយទៀតដែរ ហើយជើងហោះហើរតភ្ជាប់នេះ ហាក់ដូចជាដំណើរការល្អណាស់សម្រាប់ក្រុមហ៊ុនអាកាសចរណ៍ទាំងនោះ ។
ប្រសិនបើយើងចង់មានជើងហោះហើរត្រង់មិនឈប់រវាងអូស្ត្រាលី និងកម្ពុជា អ្វីដែលសំខាន់បំផុតនោះ គឺយើងមានមនុស្សគ្រប់គ្រាន់ធ្វើដំណើរតាមយន្តហោះ ។ ទើបយើងអាចលក់សំបុត្របានគ្រប់គ្រាន់ ដើម្បីរកប្រាក់ឱ្យបានគ្រប់គ្រាន់សម្រាប់ក្រុមហ៊ុនអាកាសចរណ៍ អ៊ីចឹងវាត្រលប់មកដល់រឿងដែលថា ត្រូវមានតម្រូវការហោះហើរសិន ។ ជាការពិតណាស់ ប៉ុន្មានឆ្នាំចុងក្រោយនេះ វាស្ទើរតែមិនមានជើងហោះហើរទាល់តែសោះរវាងប្រទេសអូស្ត្រាលី និងកម្ពុជា ដោយសារជំងឺកូវីដ ព្រោះព្រំដែនត្រូវបានបិទ ហើយតាមពិតទៅ សូម្បីតែជើងហោះហើររវាងសិង្ហបុរី និងអូស្ត្រាលី ក៏មានមនុស្សតិចណាស់ដែលធ្វើដំណើរ ។ តែពេលនេះ ព្រំដែនបានបើកវិញហើយ សេដ្ឋកិច្ចរបស់យើងក៏កំពុងចាប់ផ្តើមងើបឡើងវិញ ហើយសង្ឃឹមថា តម្រូវការហោះហើរនឹងមានវិញ ។ ថាមិនត្រូវទៅថ្ងៃមុខ សេដ្ឋកិច្ចកម្ពុជាអាចបន្តកើនឡើង ឬអាចត្រលប់ទៅអត្រាកំណើនមុនពេលមានការការរាតត្បាតនេះ ដែលមានប្រហែល ៦ ទៅ ៧ ភាគរយ ក្នុងមួយឆ្នាំ ។ ហើយវានៅតែបន្តមានចំណាប់អារម្មណ៍ខ្លាំងពីនិស្សិត ធុរកិច្ច ភ្ញៀវទេសចរ ធ្វើដំណើររវាងអូស្ត្រាលី និងកម្ពុជា ប្រហែលជាថ្ងៃណាមួយក្រុមហ៊ុនអាកាសចរណ៍ទាំងនោះ ឬក្រុមហ៊ុនអាកាសចរណ៍ណាមួយក្នុងចំណោមក្រុមហ៊ុនអាកាសចរណ៍ទាំងនោះ នឹងសម្រេចចិត្តស្វែងរកជម្រើសនៃការបើកជើងហោះហើរត្រង់ ។ ប៉ុន្តែដូចដែលខ្ញុំបាននិយាយមុននេះ គឺថា ត្រូវតែមានការជំរុញផ្នែកហិរញ្ញវត្ថុសមស្រប ត្រូវធ្វើការស្រាវជ្រាវលើតម្រូវការចាំបាច់ មុនពេលដែលក្រុមហ៊ុនអាកាសចរណ៍ទាំងនោះធ្វើការសម្រេចចិត្ត ។
បើនិយាយពីចំនួនជនជាតិអូស្ត្រាលីដែលមានដើមកំណើតខ្មែរ គឺមានប្រហែល ៦៦ ០០០ នាក់ ដែលជាចំនួនមួយដ៏ច្រើន បើគិតជាភាគរយ ព្រោះថាចំនួនប្រជាជនសរុបរបស់យើងមានចំនួនប្រហែល ២៥ លាននាក់ប៉ុណ្ណោះ ។ ជាការពិតណាស់ជនជាតិអូស្ត្រាលីទាំងនេះជាច្រើននាក់ ដែលមានដើមកំណើតមកពីប្រទេសកម្ពុជា បានមកនៅទីនេះក្នុងទសវត្សរ៍ឆ្នាំ ១៩៧០ និងរហូតដល់ទសវត្សរ៍ឆ្នាំ ១៩៨០ ជាជនភៀសខ្លួនដែលភៀសខ្លួនចេញពីប្រទេសកម្ពុជា ភៀសខ្លួនពីការភ័យខ្លាចនៃការធ្វើទុក្ខបុកម្នេញក្នុងសម័យខ្មែរក្រហម និងពីសង្គ្រាមស៊ីវិលដែលអូសបន្លាយជាបន្តបន្ទាប់មក ។ ប៉ុន្តែចាប់តាំងពីពេលនោះមក យើងក៏បានឃើញការធ្វើចំណាកស្រុកសេដ្ឋកិច្ចជាច្រើនផងដែរ ព្រមទាំងការមកនៅជួបជុំគ្រួសារ និងការចំណាកស្រុកដែលមានជំនាញ ។ ដូច្នេះជនជាតិអូស្ត្រាលីដើមកំណើតខ្មែរចំនួន ៦៦ ០០០ នាក់ នេះ គឺជាចំនួនដ៏ច្រើនគួរសម ។ ជាចំនួនមួយប្រហែលនឹងចំនួនប្រជាជនក្នុងខេត្តកំពង់ធំ វាជាចំនួនច្រើនណាស់ ។ ដើមឡើយ ភាគច្រើននៃប្រជាជនទាំងនោះបានតាំងទីលំនៅនៅទីក្រុង Melbourne ក្នុងរដ្ឋ Victoria ដូចជា នៅ Springvale ក្នុងក្រុង Melbourne ជាកន្លែងដែលពូកគេបានចាប់ផ្តើមទៅរស់នៅ ។ វាជាផ្ទះរបស់ប្រជាជនកម្ពុជាជាច្រើនដែលបានមកអូស្ត្រាលីជាលើកដំបូង និងកន្លែងខ្លះទៀតដូចជា Cabramatta នៅភាគខាងលិច ទីក្រុងស៊ីដនី តែក៏មានប្រជាជនកម្ពុជារស់នៅក្នុងទីក្រុង Brisbane និង Adelaide និងនៅទូទាំងប្រទេសផងដែរ ហើយបានរួមចំណែកយ៉ាងធំធេងដល់ចំនួនប្រជាជនពហុវប្បធម៌របស់ប្រទេសនេះដែរ ។
សំណួរ៖ ដោយសារតែចំនួនពលរដ្ឋខ្មែរ មែនទែនទៅរស់នៅប្រទេសអូស្ត្រាលី គឺមានចំនួនច្រើន អ៊ីចឹងតើអូស្ត្រាលីមានគម្រោងនាំចូលផលិតផលកសិកម្ម ដូចជា ទុរេន ឬស្វាយជាដើមទៅប្រទសអូស្ត្រាលីដែរ ឬទេ ?
ឯកឧត្តម Pablo Kang ៖ ខ្ញុំគិតថា នៅពេលនេះនៅមានឧបសគ្គមួយចំនួនក្នុងការធ្វើការនាំចេញទំនិញទាំងនេះ ដែលខ្ញុំរស់នៅក្នុងប្រទេសកម្ពុជាខ្ញុំដឹង មានដូចជា លទ្ធភាពនៃខ្សែសង្វាក់ផ្គត់ផ្គង់ដើម្បីដំណើរការដើម្បីបានបរិមាណច្រើន និងសមត្ថភាពក្នុងការបំពេញតម្រូវការដើម្បីបំពេញតាមពិធីសារសុវត្ថិភាព ។ ខ្ញុំគិតថា ទាំងនេះជាឧបសគ្គរារាំងដល់ការនាំចេញ ដែលរារាំងដល់ការនាំចេញផ្លែឈើក្នុងទ្រង់ទ្រាយធំ ដូចជា ផ្លែស្វាយ និងទុរេន ជាដើម ទៅអូស្ត្រាលី ក្នុងពេលបច្ចុប្បន្ន ។ ប៉ុន្តែតាមរយៈកម្មវិធីអភិវឌ្ឍរបស់យើង យើងបានកំពុងតែធ្វើការងារដើម្បីពង្រឹងខ្សែសង្វាក់ផ្គត់ផ្គង់ និងសក្តានុពលនាំចេញរបស់កម្ពុជា ដូចជាកាលពីឆ្នាំមុន ខ្ញុំ និងឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបើកដំណើរការការសិក្សាមួយដែលយើងបានធ្វើអំពីសក្តានុពលរបស់ដំណាំ និងផ្លែឈើ ពិសេសចំនួន ១០ មុខ នៅក្នុងប្រទេសកម្ពុជាដែលត្រូវនាំចេញ និងអ្វីដែលជាតម្រូវការដែលមានស្រាប់នៅក្នុងប្រទេសដែលជាទីផ្សារនាំចេញសំខាន់ៗ រួមមានទាំងនៅប្រទេសអូស្ត្រាលី និងនូវែលហ្សឡង់ ។ ហើយដំណាំទាំងនោះរួមមាន ដូចជា ម្ទេស ល្ង មៀន ចេកក្រៀម និងដំណាំផ្សេងៗ ដែលយើងគិតថាអាចនាំចេញបានក្នុងបរិមាណគ្រប់គ្រាន់ ជាមួយនឹងសមត្ថភាពត្រឹមត្រូវ។ និយាយអ៊ីចឹង អូស្ត្រាលីក៏បានទិញកសិផលជាច្រើនពីកម្ពុជារួចហើយ ដូចជា អង្ករដែលខ្ញុំបាននិយាយមុននេះ និងទំនិញផ្សេងទៀត ដូចជា ម្សៅម្រុំ ម្រេចប្រភេទផ្សេងៗ ហើយនិងគ្រាប់ស្វាយចន្ទី ។ ខ្ញុំមិនដែលញ៉ាំគ្រាប់ស្វាយចន្ទីនៅកន្លែងណាផ្សេងទៀតក្នុងពិភពលោកឆ្ងាញ់ដូចដែលខ្ញុំបានញ៉ាំនៅកម្ពុជាទេ ៕ (នៅមានត)
ចែករំលែកព័តមាននេះ