រាជធានីភ្នំពេញ៖ គណៈកម្មាធិការជាតិរៀបចំការបោះឆ្នោត គជប បានប្រកាស​ថា សម្រាប់ការ​បោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ កាលពីថ្ងៃអាទិត្យ ទី៥ ខែមិថុនាម្សិលមិញ មានសន្លឹកឆ្នោតមិនបានការជិត ២ភាគរយ បើធៀបនឹងសន្លឹក ដែលមានក្នុងហិបទាំងអស់។

លោក សោម សូរីដា អ្នកនាំពាក្យគណៈកម្មាធិការជាតិរៀបចំការបោះឆ្នោត គជប បានបញ្ជាក់ថា ប្រជាពលរដ្ឋ ដែលបានអញ្ជើញទៅបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ មាន​ចំនួន៧.៣៨២.៤៤៩ នាក់ ស្មើ ៨០.១៩% នៃចំនួនអ្នកមានឈ្មោះក្នុងបញ្ជីបោះឆ្នោត សរុបជាង ៩លាន ២សែននាក់។

អ្នកនាំពាក្យ ក៏បានឲ្យដឹងថា ចំពោះសន្លឹកឆ្នោត បានការ មានចំនួន ៧.២៣៦.២៤៤សន្លឹក និងសន្លឹក​ឆ្នោត មិនបានការ មានចំនួន ១៤៦.២០៥សន្លឹក បើធៀបនឹងចំនួនសន្លឹក ដែលមានក្នុង​ហិបចំនួន៧.៣៨២.៤៤៩ សន្លឹក ស្មើ ១.៩% ជាសន្លឹកឆ្នោតមិនបានការ សម្រាប់​ការបោះឆ្នោតជ្រើ​សរើសក្រុមប្រឹក្សាឃុំ​សង្កាត់ អាណត្តិទី៥។

សូមជម្រាបថា ការបោះឆ្នោតឃុំ​សង្កាត់អាណត្តិទី៥ មានគណបក្សនយោបាយចំនួន ១៧ បានចូលរួមប្រកួតប្រជែង​។ លទ្ធផលបឋមក្រៅផ្លូវការ បង្ហាញថា គណបក្សប្រជាជនកម្ពុជា បានទទួលសម្លេងគាំទ្រលើសលប់ ច្រើនជាងគណបក្សនយោបាយផ្សេងៗ។

តាមឯកសារគ.ជ.ប ដែលមិនមានស៊ីញ៉េ និងបោះត្រា បង្ហាញថា ការបោះឆ្នោឃុំសង្កាត់​អាណត្តិទី៥ កាលពីថ្ងៃទី៥ ខែមិថុនា គឺគណបក្សប្រជាជនកម្បុជា ទទួលបានជាង ៥លាន ៣សែនសំឡេង គណបក្សភ្លើងទៀន ជាង ១លាន ៦សែនសំឡេង គណបក្សហ៊្វុនស៊ិនប៉ិច ជាង ៩ម៉ឺន ១ពាន់សំឡេង និងគណបក្សខ្មែររួបរួមជាតិ ជាង ៦ម៉ឺន ៣ពាន់សំឡេង។

​យ៉ាងណាក៏ដោយ កាលពីយប់ថ្ងៃទី៥ ខែមិថុនា និងនៅព្រឹកថ្ងៃទី៦មិថុនា គជប បានប្រកាស​លទ្ធផលបឋម ដែលបង្ហាញពីសំឡេងឆ្នោតគណបក្ស​នយោបាយនិមួយៗ ទទួលបាន នៅតាមឃុំសង្កាត់​មួយៗ។ ការប្រកាសធ្វើឡើងតាមទូរទស្សន៍ជាតិកម្ពុជា ទទក វិទ្យុជាតិ និងតាមគេហទំព័រ​វេបសាយរបស់គជប​។

រហូតដល់ថ្ងៃទី២៦ ខែមិថុនា ឆ្នាំ២០២២ ទើបគជប ប្រកាសលទ្ធផលបោះឆ្នោត​ផ្លូវការ នៃការបោះឆ្នោតឃុំសង្កាត់ ដែលបង្ហាញពី​អាសនៈរបស់គណបក្ស​នយោបាយ​ ដែល​ទទួលបាន​នៅតាមឃុំសង្កាត់​ ទូទាំងប្រទេស​។

ប៉ុន្តែ​លទ្ធផលបឋមក្រៅផ្លូវការ ដែលប្រកាសដោយគណបក្ស​ប្រជាជនកម្ពុជា បង្ហាញថា គណបក្ស​ប្រជាជនកម្ពុជា ឈ្នះលើសលុបលើគណបក្ស​ ១៦ផ្សេងទៀត ដោយទទួលបានតំណែង​មេឃុំចៅសង្កាត់ ចំនួន ១៦៤៨​ឃុំសង្កាត់ ក្នុងចំណោមឃុំសង្កាត់សរុប ១៦៥២ឃុំសង្កាត់ នៅទូទាំងប្រទេស។ រីឯគណបក្សភ្លើងទៀន ទទួលបានតំណែង​មេឃុំ ៤ គឺនៅខេត្តកំពង់ចាម ១ និងនៅខេត្តកំពង់ធំ ៣​៕ អ៊ាង ប៊ុនរិទ្ធ