សម្ដេចក្រឡាហោម ស ខេង ចុះពិនិត្យដីតំបន់ព្រៃលិចទឹកបឹងទន្លេសាប (ដីតំបន់៣) ក្នុងភូមិសាស្ដ្រខេត្តបាត់ដំបង
ខេត្តបាត់ដំបង ៖ នៅរសៀលថ្ងៃសុក្រ ទី២៧ ខែឧសភា ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្ដ្រី…
ខេត្តបាត់ដំបង ៖ នៅរសៀលថ្ងៃសុក្រ ទី២៧ ខែឧសភា ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តបាត់ដំបង និងឧបនាយករដ្ឋមន្ដ្រី ជា សុផារ៉ា រដ្ឋមន្ដ្រីក្រសួងរៀបចំដែនដីនគរូបនីយកម្ម សំណង់ និងសុរិយោដី
រួមជាមួយលោក អ៊ុយ រី ប្រធានក្រុមប្រឹក្សាខេត្ត និងលោក សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញចុះពិនិត្យមើលការងារពាក់ព័ន្ធនឹងការកាត់ឆ្វៀលដីតំបន់៣ មកជាដីតំបន់២ ហើយដីតំបន់២ មកជាតំបន់១ (សម្រាប់ដីប្រជាពលរដ្ឋធ្វើការអាស្រ័យផលរាប់សិបឆ្នាំ) សម្រាប់ផ្ដល់កម្មសិទ្ធិជាប្រជាពលរដ្ឋ ។
សម្តេចក្រឡាហោម ស ខេង បានមានប្រសាសន៍ណែនាំជាពិសេសដល់អាជ្ញាធរមូលដ្ឋាន នៃខេត្តបាត់ដំបង និងស្រុកទាំង៤ នៅជាប់ដែនបឹងទន្លេសាបក្នុងភូមិសាស្ត្រខេត្តបាត់ដំបង មានស្រុកមោងឫស្សី សង្កែ ឯកភ្នំ និងស្រុកថ្មគោល ព្រមទាំងមន្ត្រីតាមមន្ទីរជំនាញពាក់ព័ន្ធនានា ក្នុងខេត្ត ត្រូវរួមសហការគ្នាឱ្យបានល្អ ក្នុងការចុះពិនិត្យវាយតម្លៃ អំពីតំបន់២ និងតំបន់៣ ឱ្យច្បាស់លាស់ ដើម្បីកាត់ឆ្វៀលដី ដែលប្រជាពលរដ្ឋ បានអាស្រ័យផលជាក់ស្តែង ។
សម្តេចក្រឡាហោម ស ខេង បានបញ្ជាក់ថា សម្តេចប្រមុខដឹកនាំរាជរដ្ឋាភិបាលកម្ពុជា នឹងខិតខំអនុវត្តនូវគោលការណ៍ចំនួន២ គឺទី១. ការខិតខំអភិរក្សតំបន់បឹងទន្លេសាប និងទី២ គឺការខិតខំគោរពទៅតាមប្រវត្តិសាស្ត្រតំបន់ដែលប្រជាពលរដ្ឋរស់នៅ ក្នុងន័យដើម្បីគិតគូអំពីការប្រកបរបររបស់ប្រជាកសិករក្នុងការដាំដុះនេះ ។
សម្តេច ស ខេង បានឱ្យដឹងបន្ថែមទៀតថា តំបន់បឹងទន្លេសាបនេះ ចែកជាពីរកត្តាចាំបាច់ ដែលកត្តាទី១ ការអភិរក្ស និងកត្តាទី២ គឺត្រូវតែគិតដល់ផលប្រយោជន៍ប្រជាពលរដ្ឋ ដែលរស់នៅជុំវិញបឹងទន្លេសាបនោះ ។ បញ្ហាបឹងទន្លេសាប ត្រូវគិតលើគោលការណ៍សំខាន់៣ ហើយគោលការណ៍ដែលត្រូវយកចិត្តទុកដាក់នោះ គឺគោលការណ៍ថ្លឹងថ្លែងជាមួយការអភិរក្ស និងគោលការណ៍រស់នៅរបស់ប្រជាពលរដ្ឋជាក់ស្តែង ។
សម្តេចក្រឡាហោម ស ខេង បានបន្តទៀតថា ក្រៅពីនេះ គឺទាក់ទងនឹងការអភិរក្សបឹងទន្លេសាប ដូចជាការបោះបង្គោលព្រំប្រទល់ ដើម្បីសម្រួលធ្វើយ៉ាងម៉េច កុំឱ្យបង្គោលនេះមានការលួចចល័តព្រំដែន ហើយចុងក្រោយទាក់ទងនឹងបញ្ហាផែនការយុទ្ធសាស្ត្រ ក្នុងការរក្សាបឹងទន្លេសាប ដែលសមត្ថកិច្ចពាក់ព័ន្ធត្រូវរៀបចំផែនការយុទ្ធសាស្ដ្រនេះ ដើម្បីរួមសហការគ្នា ក្នុងការថែរក្សាការពារបឹងទន្លេសាប ឱ្យបានគង់វង្ស តទៅអនាគត ។
គួរបញ្ជាក់ផងដែរថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានចេញសារពិសេសណែនាំឱ្យពិនិត្យពិចារណាស្ថានភាពជាក់ស្តែង ដោយកាត់ឆ្វៀលដីពីតំបន់២ និងតំបន់៣ ជូនទៅប្រជាពលរដ្ឋ ដែលរស់នៅជាក់ស្តែង អាស្រ័យផលយូរឆ្នាំ មិនរាប់អ្នកទើបទៅកាន់កាប់ត្រឹមតែ២ ឬ៣ឆ្នាំនោះទេ គឺជាទីតាំងដែលបងប្អូនប្រជាពលរដ្ឋអាស្រ័យផលរាប់សិបឆ្នាំមកហើយនោះ គឺត្រូវរក្សា និងចេញកម្មសិទ្ធិជូនពួកគាត់ ហើយរាជរដ្ឋាភិបាលកម្ពុជា និងធ្វើការប្រឆាំងដាច់ខាតចំពោះអ្នកមានអំណាច និងអ្នកមានលុយ ហើយទៅជ្រកក្រោមរូបភាព ជាពលរដ្ឋ ហើយបានកាប់ទន្ទ្រានដីដែលត្រូវបានហាមឃាត់នៅបឹងទន្លេសាប ហើយភូមិឋាន និងទីលំនៅរបស់ប្រជាពលរដ្ឋ ដែលមានតាំងពីយូរលង់ណាស់មកហើយនោះ មិនអាចរុះរើចេញបាននោះឡើយ ដូច្នេះឧបនាយករដ្ឋមន្ត្រី ជា សុផារ៉ា ក្រសួងធនធានទឹក ក្រសួងកសិកម្មរុក្ខាប្រមាញ់ និងនេសាទ និងអាជ្ញាធរខេត្ត ត្រូវធ្វើការពិនិត្យមើលថា តើកន្លែងណាគោករាក់ ហើយត្រូវបូមស្តារឡើងវិញ ៕
ចែករំលែកព័តមាននេះ