មានចោរស្រីជើងឆើតចំនួន២នាក់ កាលពីរសៀលថ្ងៃទី១៦ ខែឧសភា ឆ្នាំ២០២២ បានប្រើល្បិចធ្វើជាសុំកា.ប់សំបកដើមទៀប ដើម្បីយកទៅផ្សំថ្នាំសម្រាប់ស្ត្រីសម្រាលកូនទាស់សរសៃខ្ចី តែបែរជាបន្លំលួចយកប្រាក់អស់ជិត២ពាន់ដុល្លារ
ខេត្តសៀមរាប ៖ បើតាមសេចក្តីរាយការណ៍បានឲ្យដឹងថា មានចោរស្រីជើងឆើតចំនួន២នាក់ កាលពីរសៀលថ្ងៃទី១៦ ខែឧសភា ឆ្នាំ២០២២ បានប្រើល្បិចធ្វើជាសុំកា.ប់សំបកដើមទៀប ដើម្បីយកទៅផ្សំថ្នាំសម្រាប់ស្ត្រីសម្រាលកូនទាស់សរសៃខ្ចី តែបែរជាបន្លំលួចយកប្រាក់អស់ជិត២ពាន់ដុល្លារអាមេរិក រួចរត់គេចខ្លួនបាត់ ។
សេចក្តីរាយការណ៍បន្តថា ហេតុការណ៍ខាងលើនេះ បានកើតឡើងនៅចំណុចផ្ទះរបស់ឈ្មោះ ជា សៅ ភេទស្រី អាយុ៨១ឆ្នាំ (ជាជនរងគ្រោះ) ស្ថិតនៅក្នុងភូមិតាទក ឃុំពួក ស្រុកពួក ខេត្តសៀមរាប ។
សេចក្តីរាយការណ៍ឲ្យដឹងទៀតថា នៅរសៀលថ្ងៃខាងលើ មានស្ត្រី២នាក់ដែលគេមិនស្គាល់អត្តសញ្ញាណ មាឌធាត់ៗ អាយុប្រហែលចាប់ពី៣០ទៅ៤០ឆ្នាំ ដោយប្រើមធ្យោបាយជិះម៉ូតូ១ គ្រឿង ពណ៌ខ្មៅ មកធ្វើសកម្មភាព ដំបូងបានទុកម៉ូតូនៅផ្លូវចម្ងាយប្រហែល៤០ម៉ែត្រ ហើយក៏បានដើរចូលទៅជួបជនរងគ្រោះដល់មុខផ្ទះតែម្តង។
ចោរស្រីជើងឆើតទាំង២នាក់នោះបាននិយាយទៅកាន់ម្ចាស់ផ្ទះថា «ពួកគេជាអ្នករស់នៅខាងលិចវត្តភូមិនេះដែរ ដោយមានធុរៈប្អូនស្រីឆ្លងទន្លេ (សម្រាលកូន) ហើយទាស់សរសៃខ្ចី ដូច្នេះតម្រូវឲ្យសុំទួសសំបកដើមទៀបអ៊ុំ (ម្ចាស់ផ្ទះ) ដើម្បីយកទៅធ្វើថ្នាំដាំផឹកដែលនាងកំពុងដេកឈឺ»។
ដោយការប្រើល្បិចបោ.កបញ្ឆោតដូចនេះ និងមានការជឿទុកចិត្ត អ៊ុំម្ចាស់ផ្ទះក៏បាននាំចោរស្រីម្នាក់ជូនទៅកា.ប់ដើមទៀបនៅខាងក្រោយផ្ទះ ហើយចោរស្រីម្នាក់ទៀតនោះ ក៏បានសួរនាំអ៊ុំស្រីជាច្រើន ទំនងជាទុកពេលឲ្យបក្សពួកម្នាក់ទៀតចូលទៅរុករើ ដើម្បីលួចលុយ ។
បន្ទាប់ពីកា.ប់ដើមទៀបបានហើយ ពួកគេក៏ទៅជួបគ្នានៅកន្លែងទុកម៉ូតូ រួចលាម្ចាស់ផ្ទះគេចខ្លួនបាត់ ។ ក្រោយពីចោរស្រីចេញផុត ម្ចាស់ផ្ទះមានការសង្ស័យ ព្រោះថា ពួកចោរមិនបានយកដើមទៀបទៅទេ ហើយថែមទាំងទ្វារផ្ទះចំហរទៀត ទើបម្ចាស់ផ្ទះចូលទៅមើលប្រាក់ទុកក្រោមខ្នើយកន្លែងដេក ស្រាប់តែបាត់អស់រលីង ដែលប្រាក់ត្រូវបាត់បង់នោះ គឺមានលុយខ្មែរ ៤.៣៩០.០០០ រៀល និង ៦១០ ដុល្លារអាមេរិក រុំក្រណាត់ពណ៌ស្វាយ ទុកក្នុងស្រោមខ្នើយ នៅក្បាលគ្រែក្នុងផ្ទះផ្ទាល់ដី ។
នៅពេលដឹងថា ចោរប្រើល្បិចលួចលុយអស់ទៅ ភ្លាមៗនោះម្ចាស់ផ្ទះក៏បានទៅរកអ្នកជិតខាង ឲ្យជួយរាយការណ៍ប្រាប់មេភូមិ និងប៉ូលិស ដើម្បីតាមចាប់ចោរស្រីជើងឆើតទាំង២នាក់ដែលលួចលុយនោះវិញ តែហួសពេលទៅហើយ ។
សូមបញ្ជាក់ថា ជនរងគ្រោះនៅផ្ទះតែម្នាក់ឯងទេ មានចៅស្រីម្នាក់រស់ក្នុងបន្ទុកដែរ តែនាងចេញទៅប្រលងពេទ្យនៅរាជធានីភ្នំពេញ ហើយផ្ទះអ្នកជិតខាងមានចន្លោះឆ្ងាយពីគ្នា និងបាំងដោយព្រៃឈើ ដំណាំជុំវិញផ្ទះ ហើយស្ងាត់ទៀតផង នេះវាជាឱកាសងាយស្រួលសម្រាប់ចោរធ្វើសកម្មភាព ។
ក្រោយពេលទទួលបានព័ត៌មានខាងលើនេះ កម្លាំងសមត្ថកិច្ចនគរបាលមូលដ្ឋាន បានចុះទៅដល់ និងបានធ្វើកំណត់ហេតុ ស្រាវជ្រាវ កំណត់ភិនភាគ និងមុខសញ្ញាចោរស្រីទាំង២នាក់នោះ ដើម្បីស្វែងរកចាប់ខ្លួន នាំយកមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ