នគរបាលស្រុកកោះធំបង្ក្រាបល្បែងស៊ីសង ២ករណីឃាត់ខ្លួនមនុស្ស៩នាក់
ខេត្តកណ្ដាល ៖ នគរបាលស្រុកកោះធំ បានធ្វើការបង្ក្រាបល្បែងស៊ីសង២ករណីគឺ បៀ និងកត់ឆ្នោត កាលពីថ្ងៃទី៣ វិច្ឆិកា ដោយឃាត់ខ្លួនបានមនុស្ស៩នាក់នាំមកសាកសួរ។
ខេត្តកណ្ដាល ៖ នគរបាលស្រុកកោះធំ បានធ្វើការបង្ក្រាបល្បែងស៊ីសង២ករណីគឺ បៀ និងកត់ឆ្នោត កាលពីថ្ងៃទី៣ វិច្ឆិកា ដោយឃាត់ខ្លួនបានមនុស្ស៩នាក់នាំមកសាកសួរ។ លោក ឈឿន ប៊ុនឆន អធិការនគរបាលស្រុកកោះធំបានឱ្យដឹងថា កាលពីថ្ងៃទី៣ វិច្ឆិកា លោកបានដឹកនាំកម្លាំង ធ្វើការបង្ក្រាបល្បែងស៊ីសងខុសច្បាប់បាន២ករណី ដោយឃាត់ខ្លួនជនសង្ស័យបាន៩នាក់។ ករណីទី១ បានឃាត់ខ្លួនអ្នកលេងបៀ និងអ្នកផ្ដល់ទីតាំងលេង បាន៦នាក់ កាលពីម៉ោង១និង១០នាទីរសៀល នៅចំណុចផ្ទះរបស់ឈ្មោះ ជ ហួយ ភូមិកំពង់សំបួរក្រោម ឃុំព្រែកថ្មី ស្រុកកោះធំ ខេត្តកណ្តាល។
ជនសង្ស័យចំនួន ៦នាក់ ដែលបានឃាត់ខ្លួនមានទី១-ឈ្មោះ ជ ហួយ ភេទស្រី អាយុ៥១ឆ្នាំ ជនជាតិខ្មែរ មានទីលំនៅ ភូមិឃុំកើតហេតុខាងលើ មុខរបរលក់ដូរ ជាអ្នកផ្ដល់ទីតាំងលេងបៀយកតុង។ ទី២-ឈ្មោះ ផាន ចាន់ធី ភេទស្រី អាយុ៣៥ឆ្នាំ ជនជាតិ ខ្មែរ មានទីលំនៅភូមិកំពង់ស្វាយក្រោម ឃុំព្រែកថ្មី ស្រុកកោះធំ ខេត្តកណ្ដាល មុខរបរកសិករ។ ទី៣-ឈ្មោះ គាន ថន ភេទស្រី អាយុ៤២ឆ្នាំ ជនជាតិខ្មែរ មានទីលំនៅភូមិកំពង់សំបួរក្រោម ឃុំព្រែកថ្មី ស្រុកកោះធំ ខេត្តកណ្ដាល មុខរបរមេផ្ទះ ។ ទី៤-ឈ្មោះ ថុង ស្រ៊ាន់ ភេទស្រី អាយុ ៥៦ឆ្នាំ ជនជាតិខ្មែរ មានទីលំនៅភូមិកំពង់សំបួរក្រោម ឃុំព្រែកថ្មី ស្រុកកោះធំ ខេត្តកណ្ដាល មុខរបរ កសិករ។ ទី៥-ឈ្មោះ ជូ ជឹង ភេទស្រី អាយុ៥៧ឆ្នាំ ជនជាតិខ្មែរ មានទីលំនៅភូមិជ្រុងរមាស ឃុំកំពង់កុង ស្រុកកោះធំ ខេត្តកណ្ដាល មុខរបរកសិករ។
ទី៦-ឈ្មោះ ពា ច្រិច ភេទស្រី អាយុ៤៥ឆ្នាំ ជនជាតិខ្មែរ មានទីលំនៅភូមិកំពង់សំបួរលើ ឃុំព្រែកថ្មី ស្រុកកោះធំ ខេត្តកណ្ដាល មុខរបរលក់ដូរ។ វត្ថុតាងចាប់យកមាន សន្លឹកបៀចំនួន ៥២សន្លឹក។ ប្រាក់រៀលចំនួន ១០.០០០ កម្រាលក្រាលលេងបៀចំនួន១ ។ កំប៉ុងដែកសម្រាប់ដាក់លុយចំនួន១។ មួយករណីទៀត នៅវេលាម៉ោង ២និង៣០នាទីរសៀល ថ្ងៃទី៣ វិច្ឆិកា ដដែល នគរបាលស្រុក កោះធំ បានបន្តទៅបង្ក្រាប អ្នកលេងបៀ និងកត់កន្ទុយលេខ បាន៣នាក់ទៀត នៅភូមិព្រែកថ្មី ឃុំព្រែកថ្មី ស្រុកកោះធំ។ ជនសង្ស័យដែលបានឃាត់ខ្លួនមានទី១.ឈ្មោះខៀវ សារី ភេទស្រី អាយុ៣៤ឆ្នាំ ជាអ្នកកត់កន្ទុយលេខនៅកន្លែងលេងបៀ រស់នៅភូមិព្រែកតាហ៊ីង ឃុំព្រែកថ្មី ស្រុកកោះធំ ខេត្តកណ្តាល មុខរបរកត់កន្ទុយលេខ។
ទី២.ឈ្មោះ.ស៊ា គីម ភេទស្រី អាយុ៥៥ឆ្នាំ មុខរបរកសិករ។ ទី៣.ឈ្មោះ ម៉ារិន ដាស៊ី ភេទស្រី អាយុ៣៥ឆ្នាំ មុខរបរកសិករ អ្នកទាំង៣រស់នៅភូមិព្រែកតាហ៊ីង ឃុំព្រែកថ្មី ស្រុកកោះធំ ខេត្តកណ្តាល។ ពេលឃាត់ខ្លួននគរបាលបានចាប់យកវត្ថុតាង មានបៀ និងក្រដាសកត់កន្ទុយលេខ មួយចំនួន បញ្ជូនមកអធិការដើម្បីធ្វើការសាកសួរ។ លោកអធិការ បានប្រាប់ឱ្យដឹងថា ជនសង្ស័យ ៩នាក់ ពាក់ពន្ធ នឹងល្បែងស៊ីសងចំនួន២ករណីនេះ ត្រូវបានកសាងសំណុំរឿង ដើម្បីចាត់ការទៅតាមផ្លូវច្បាប់៕
ចែករំលែកព័តមាននេះ