រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២៦ ខែឧសភា ឆ្នាំ២០២២នេះ បានលើកយកសំណុំរឿងព្រហ្មទណ្ឌ (ឧក្រិដ្ឋ) មួយ ដែលមានជនជាប់ចោទអតីតជាមេបក្សខ្មែរក្រោក និងគូកន មកបើកសវនាការជំនុំជម្រះទោស ពាក់ព័ន្ធពីបទ «លួចមានស្ថានទម្ងន់ទោស» ប្លន់អ្នកលក់ឡេតាមអនឡាញ ។
សវនាការនោះ បានបញ្ចប់ទៅវិញ បន្ទាប់ពីការសាកសួរដេញដោលលើជនជាប់ចោទរហូតដល់ម៉ោងសម្រាក តែបានកំណត់យកថ្ងៃទី៩ ខែមិថុនា ខាងមុខបន្តទៀត ។ សវនាការនេះ មានលោកស្រី ឈុន ដាវី ជាប្រធានក្រុមប្រឹក្សាជំនុំជម្រះ និងមានលោក ធាម ច័ន្ទពិសិដ្ឋ និង លោក កេត សុជាតិ ជាចៅក្រមអម និងតំណាងអយ្យការមានលោក សេង ហៀង ព្រះរាជអាជ្ញារងអមសាលាដំបូងរាជធានីភ្នំពេញ ។
សវនាការបានធ្វើឡើងជាសាធារណៈ និងចំពោះមុខជនជាប់ទាំង៧នាក់ ដែលក្នុងនោះក្រុមប្រឹក្សាបានសួរដេញដោលលើជនជាប់ចោទឈ្មោះ សុខ សុវណ្ណវឌ្ឍនាសាប៊ុង ហៅសុខ សុវណ្ណវឌ្ឍនាសារពង្ស ហៅ វិល្លាម គ័ង ដែលអតីតជាប្រធានគណៈបក្សខ្មែរក្រោក និងជាមេខ្លោងចោរប្លន់ផ្ទះអ្នកលក់ឡេតាមអនឡាញ ។
ឆ្លើយនិងសំនួរ ជនជាប់ចោទជាមេខ្លោងរូបនោះ បានសារភាពទទួលស្គាល់ថា ខ្លួនពិតជាមេខ្លោងដឹកនាំក្រុមប្លន់យកទ្រព្យសម្បត្តិអ្នកលក់ឡេមែន ដែលគម្រោងការនោះទៀតសោធបានរៀបចំតែមួយថ្ងៃ ក៏ចាប់ផ្តើមចេញទៅធ្វើសកម្មភាពប្លន់តែម្តង ។ សំនួរសួរថា តើការរៀបគម្រោងប្លន់យកទ្រព្យសម្បត្តិ មាសប្រាក់ លុយ កាក់ ពីជនរងគ្រោះ ក្នុងគោលបំណងយកទៅធ្វើអី? មេចោរប្លន់ឆ្លើយរបៀបឡូយខាយថា ធម្មតាធ្វើជាមេបក្ស ធ្វើអ្វីសុទ្ធតែមានគំម្រោង ប៉ុន្តែពេលនេះ សុំប្រើសិទ្ធិមិនឆ្លើយទៅនឹងគម្រោងនោះ ។
សូមរម្លឹកថា លោក ប្លង់ សុផល ព្រះរាជអាជ្ញារង នឹងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងនៅព្រឹកថ្ងៃទី២៦ ខែធ្នូ នេះថា លោក ស៊ិត វណ្ណៈ ព្រះរាជអាជ្ញារងបើកការស៊ើបសួរ លើសំណុំរឿងមេបក្សខ្មែរក្រោក ដែលជាមេចោរប្លន់អ្នកលក់ឡេតាមអនឡាញ គឺឧកញ៉ា អ៊ាន សៀវម៉ី ចំនួន៣បទល្មើស ៖ ១-បទ លួចមានស្ថានទម្ងន់ទោស, ២-បទកាន់កា.ប់អាវុធដោយគ្មានការអនុញ្ញាត និង៣-បទក្លែងឯកសារសាធារណៈ ។ តែក្នុងនោះក៏មានជនសង្ស័យខ្លះត្រូវបានចោទប្រកាន់ពីបទ «សមគំនិតក្នុងអំពើលួច» (ដោយមានស្ថានទម្ងន់ទោស ) បទចោទកាន់នេះ គឺតាមមាត្រា២៩ មាត្រា៣៥៣ មាត្រា៣៥៧ មាត្រា៤៩០ និងមាត្រា៦២៩ នៃក្រមព្រហ្មទណ្ឌ ។
ជនសង្ស័យក្នុងការចោទប្រកាន់ខាងលើនេះ មានចំនួន៧នាក់ ក្នុងនោះកម្លាំងសមត្ថកិច្ចនគរបាលខណ្ឌពោធិ៍សែនជ័យ ចាប់បញ្ជូនជនសង្ស័យ២នាក់ ដោយម្នាក់ឈ្មោះ កេត ម៉ាច ភេទប្រុស អាយុ២៦ឆ្នាំ ជាសមាជិកគណបក្សខ្មែរក្រហម មានទីលំនៅភូមិប្រមូលផ្តុំ ឃុំត្រាច ស្រុកជ័យសែន ខេត្តព្រវិហារ និងម្នាក់ឈ្មោះ ថុន វឌ្ឍនៈ ភេទស្រី អាយុ២៧ឆ្នាំ មុខរបរលក់ដូរ និងទិញលក់រថយន្ត មានទីលំនៅភូមិវាលស្បូវ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។
កម្លាំងសមត្ថកិច្ចកងរាជអាវុធហត្ថរាជធានីភ្នំពេញ កាលពីរសៀលថ្ងៃទី២៤ ខែធ្នូ ឆ្នាំ២០២១ បានបញ្ជូនជនសង្ស័យជាមេបក្ស និងជាមេខ្លោងចោរប្លន់ប្រដាប់អាវុធប្លន់អ្នកលក់ឡេតាមឡាញ និងបក្សពួកចំនួន៣នាក់ទៅកាន់សាលាដំបូងរាជធានីភ្នំពេញ ដើម្បីឲ្យតំណាងអយ្យការធ្វើការចោទប្រកាន់ជាផ្លូវការ និងដាក់ជូនចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន ដើម្បីរង់ចាំការកាត់ទោសតាមច្បាប់ជាធរមាន ។
ជនសង្ស័យទាំង៤នាក់ រួមមាន ៖ ១- ឈ្មោះ សុខ សុវណ្ណវឌ្ឍនាសាប៊ុង ហៅសុខ សុវណ្ណវឌ្ឍនាសារពង្ស ហៅ វិល្លាម គ័ង ភេទប្រុស អាយុ៤៤ឆ្នាំ មុខរបរប្រធានគណៈបក្សខ្មែរក្រោក និងជាមេខ្លោងចោរប្លន់ផ្ទះអ្នកលក់ឡេតាមអនឡាញ ឧកញ៉ា អ៊ាន សៀវម៉ី មានស្រុកកំណើតនៅខេត្តព្រះត្រពាំង កម្ពុជាក្រោម នឹងមានអាស័យដ្ឋានស្នាក់នៅបុរីប៉េងហួត ផ្ទះលេខ៨ ផ្លូវលេខ៣ សង្កាត់ចក្រអង្រែលើ ខណ្ឌមានជ័យ រាជធានីភ្នំពេញ ។ ២- ឈ្មោះ អោ រ៉ាម៉ន ភេទប្រុស អាយុ៣៣ឆ្នាំ មុខរបរអ្នកបើករថយន្ត មានទីលំនៅភូមិព្រែករាំង សង្កាត់កំពងសំណាញ់ ក្រុងតាខ្មៅ ខេត្តកណ្តាល ។ ៣- ឈ្មោះ សុវណ្ណ រ៉ានុត ភេទប្រុស អាយុ២៦ឆ្នាំ ស្នាក់នៅបុរីប៉េងហួត ផ្ទះលេខ៨ ផ្លូវលេខ៣ សង្កាត់ចក្រអង្រែលើ ខណ្ឌមានជ័យ រាជធានីភ្នំពេញ ។ និង៤- ឈ្មោះ សុវណ្ណ ស្រីសុរិយោព័ណ ភេទស្រី អាយុ២៤ឆ្នាំ (ត្រូវជាប្រពន្ធ វីល្លាម គ័ង) មុខរបរលក់ដូរ ស្នាក់នៅបុរីប៉េងហួត ផ្ទះលេខ៨ ផ្លូវលេខ៣ សង្កាត់ចក្រអង្រែលើ ខណ្ឌមានជ័យ រាជធានីភ្នំពេញ។
បើតាមគេហទំព័រហ្វេសប៊ុករបស់កងរាជអាវុធហត្ថរាជធានីភ្នំពេញ បានបង្ហោះជាផ្លូវការថា ករណីប្លន់ផ្ទះអ្នកលក់ឡេអនឡាញ អ៊ាន សៀវម៉ី កាលពីវេលាម៉ោងប្រមាណ១០និង៤០នាទី ថ្ងៃទី១៩ ខែធ្នូ ឆ្នាំ២០២១ ដែលក្រុមចោរមានគ្នា៥នាក់ ប្រដាប់ដោយអាវុធគ្រប់ដៃ និងយកបានគ្រឿងពេជ្រទៅមួយចំនួន រួចរត់គេចខ្លួនបានត្រឹមតែមួយយប់ ក៏ត្រូវបានអាវុធហត្ថរាជធានីភ្នំពេញ ក្រោមការចង្អុលបង្ហាញពីលោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងបានទទួលការអនុញ្ញាតពីឯកឧត្តមព្រះរាជអាជ្ញា ច្រឹង ខ្មៅ ចាត់ឲ្យលោកព្រះរាជអាជ្ញារង សិត វណ្ណៈ សម្របសម្រួល និងដឹកនាំបញ្ជាកម្លាំងដោយ លោកឧត្តមសេនីយ៍ឯក រ័ត្ន ស្រ៊ាងមេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានធ្វើការបង្ក្រាបដល់សម្បុកមេខ្លោងធំ ដែលជាប្រធានគណបក្សខ្មែរក្រោក និងបានប្រមូលយកគ្រឿងពេជ្រប្រគល់ជូនជនរងគ្រោះវិញ ហើយជនសង្ស័យបានបញ្ជូនដល់តុលាការហើយ ។
តាមចម្លើយរបស់ឈ្មោះ សុខ សុវណ្ណវឌ្ឍនាសាប៊ុង ហៅសុខ សុវណ្ណវឌ្ឍនាសារពង្ស ហៅ វិល្លាម គ័ង ដែលជាមេខ្លោង និងជាអ្នករៀបចំផែនការ បានបញ្ជាក់ថា សកម្មភាពចូលប្លន់ផ្ទះអ្នកលក់ឡេអនឡាញ អ៊ាន សៀវម៉ី នេះ គឺខ្លួនរៀបផែនការមុនតែមួយថ្ងៃទេ ដោយចេញធ្វើសកម្មភាពចំនួន០៥នាក់ ខ្លួនជាអ្នកដឹកនាំផ្ទាល់តែម្តង មូលហេតុដែលនាំឲ្យខ្លួនសម្រេចចិត្តប្លន់ គឺដោយសារ ៖
ទី១- សព្វថ្ងៃខ្លួនខ្វះខាតលុយកាក់ទ្រទ្រង់ជីវភាព និងបក្ស ជាក់ស្តែងរថយន្តដែលខ្លួនជិះ គឺបង់រំលោះមិនទាន់ដាច់នៅឡើយ ហើយផ្ទះដែលខ្លួនរស់នៅ គឺជួលក្នុងតម្លៃ ២៥០០ដុល្លារក្នុង១ខែ ជំពាក់ឈ្នួលផ្ទះគេ២ខែហើយ ចំណែកស្នាក់ការបក្សចំនួន១៦ខេត្ត ក៏មិនមានប្រាក់បង់ឈ្នួលផ្ទះឲ្យគេ ព្រមទាំងជំពាក់បំណុលគេជុំទិសទៀតផង។ ទី២- គឺខ្លួនមានទស្សនៈ អ្នកក្រនិយម ជ្រេញពួកអ្នកមាន ឡាយតាម Facebook បង្អួតទ្រព្យសម្បត្តិ ដូចនេះ ក៏កើតចិត្តចង់ ព្រមានដល់អ្នកមានមួយចំនួនដែលមានចរិតបែបនេះ ។
កន្លងមកពួកខ្លួនបានធ្វើសកម្មភាពប្លន់ចំនួន០២លើក ដោយទី១- គឺនៅថ្ងៃទី២៥ ខែវិច្ឆិកា ឆ្នាំ២០២១ បានធ្វើសកម្មភាពប្លន់ម្ចាស់បុរីម៉នដានី នៅស្រុកគងពិសី ខេត្តកំពង់ស្ពឺ តែមិនបានសម្រេច ព្រោះនៅថ្ងៃធ្វើសកម្មភាព ស្រាប់តែជនរងគ្រោះមិនបាននៅក្នុងឡានដែលពួកខ្លួនបានកាក់ប្លន់ ក៏ក្លែងធ្វើជាសួរនាំក្នុងនាមសមត្ថកិច្ច ហើយពេលនោះខ្លួនមិនបានចូលរួមទេ គឺឲ្យតែកូនចៅ០៥នាក់ អាវុធវែង០១ដើម អាវុធខ្លី០២ដើម និងក្លែងឯកសណ្ឋានសមត្ថកិច្ច ចុះទៅធ្វើសកម្មភាព ។
ទី២- គឺនៅថ្ងៃទី១៩ ខែធ្នូ ឆ្នាំ២០២១ ខ្លួនបានប្រើរូបភាពដូចលើកទី១ដែរ គឺក្លែងឯកសណ្ឋានសមត្ថកិច្ច និងក្លែងដីកាបង្គាប់ឲ្យនាំខ្លួន ចុះទៅធ្វើសកម្មភាពប្លន់យកទ្រព្យសម្បត្តិ នៅផ្ទះអ្នកឡេអនឡាញឈ្មោះ អ៊ាន សៀវម៉ី បានសម្រេច ដោយប្រមូលបានគ្រឿងពេជ្រមួយចំនួន តែរំលងបានតែ១យប់ ក៏ត្រូវសមត្ថកិច្ចអាវុធហត្ថរាជធានីភ្នំពេញ ចុះបង្ក្រាបដល់ផ្ទះ ដោយឃាត់ខ្លួនមនុស្សបានចំនួន១២នាក់ អាវុធវែងខ្លីចំនួន០៥ដើមភ្លាមៗ និងគ្រឿងពេជ្រជាច្រើនឈុតត្រឡប់មកវិញ ក្រោយមកឆែកឃើញអាវុធ០១ដើមទៀត លាក់នៅមាត់លូ សរុបដកហូតបានអាវុធ០៦ដើម ។
ក្រោមវិធានការជំនាញ ក្នុងចំណោមមនុស្ស១២នាក់ ដែលឃាត់ខ្លួន សមត្ថកិច្ចបានរកឃើញអ្នកពាក់ព័ន្ធចំនួន០៤នាក់ និងបានកសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់តែម្តង ៕
ចែករំលែកព័តមាននេះ