ធ្លាយវីដេអូ ទើបឪពុកដឹងថា កូនប្រុសមិនទាត់តុក្កតា(តម្លៃជិត$៧,០០០) ដូចបុគ្គលិកហាងចោទប្រកាន់ឡើយ
ហុងកុង ៖ ឪពុកម្នាក់ បានបង់លុយអស់ចំនួន HK$ ៣៣,៦០០ (ជាប្រាក់ដុល្លារហុងកុង ស្មើនឹង ៤,២៥៥ដុល្លារអាមេរិក) ឲ្យម្ចាស់ហាង…
ហុងកុង ៖ ឪពុកម្នាក់ បានបង់លុយអស់ចំនួន HK$ ៣៣,៦០០ (ជាប្រាក់ដុល្លារហុងកុង ស្មើនឹង ៤,២៥៥ដុល្លារអាមេរិក) ឲ្យម្ចាស់ហាង KKPlus ជាកន្លែងលក់ប្រដាប់ប្រដាក្មេងលេង បន្ទាប់ពីកូនប្រុសរបស់គាត់ ត្រូវបានបុគ្គលិកហាងអះអាងថា បានទាត់តុក្កតា Teletubbies ពណ៌មាស កម្ពស់១.៨ម៉ែត្រ បណ្តាលអោយដួលបែកខ្ទេចជាបំណែកៗ ។
ឧប្បត្តិហេតុនេះ បានកើតឡើងកាលពីល្ងាចថ្ងៃអាទិត្យ ទី២២ ឧសភា ២០២២ ក្នុងហាង KKPlus នៅផ្សារទំនើប Langham Place ទីក្រុង Mong Kok របស់ហុងកុង ។
ប៉ុន្តែបន្ទាប់ពីវីដេអូ នៃឧប្បត្តិហេតុនេះ ដែលថតចេញពីកាមេរ៉ាសុវត្ថិភាព បានបង្ហាញឲ្យឃើញថា ក្មេងអាយុ ៥ឆ្នាំ បានផ្អែកលើតុក្កតានោះ មិនដូចអ្វី ដែលបុគ្គលិកនៅក្នុងហាង KKPlus បានចោទប្រកាន់ថា ក្មេងបានទាត់តុក្កតានោះឡើយ ។
លោក Cheng ជាឪពុក បានរៀបរាប់ហេតុការណ៍ខាងលើនេះ ប្រាប់វិទ្យុក្នុងស្រុកមួយ កាលពីព្រឹកថ្ងៃទី២៤ ឧសភានេះថា លោកនិងប្រពន្ធ បាននាំកូនប្រុស ២នាក់ ដើរផ្សារទំនើប Langham Place កាលពីល្ងាចថ្ងៃអាទិត្យ ។ ពេលមកដល់ហាង KKPlus រូបគាត់បានដើរចេញមួយភ្លែត ដើម្បីលើកទូរសព្ទនិយាយ ស្រាប់តែឮស្នូរសំឡេងធ្លាក់បែកពីក្រោយខ្នងគាត់ ។ ភ្លាមនោះ គាត់បែរមកវិញ ឃើញកូនប្រុសរបស់គាត់ កំពុងសម្លឹងមើលតុក្កតា Teletubbies ពណ៌មាស កម្ពស់ ១,៨ម៉ែត្រ បានធ្លាក់បែកខ្ចាយនៅលើឥដ្ឋ ដោយក្បាលតុក្កតាបែកចេញពីខ្លួន ហើយដៃបានបែកខ្ទេច ។
លោក Cheng និយាយថា ពេលនោះកូនប្រុសរបស់ខ្ញុំ ឈរស្រឡាំងកាំង ស្ងៀមគ្មានចលនា ។ រីឯប្រពន្ធខ្ញុំ ក៏និយាយអ្វីមិនចេញ បានត្រឹមតែឈរឱបដៃ សម្លឹងទៅកូនប្រុស ។
លោក Cheng បាននិយាយប្រាប់វិទ្យុបន្តទៀតថា ក្រោយមកមានបុគ្គលិកហាង បានប្រាប់គាត់និងប្រពន្ធ ថាកូនប្រុសច្បងរបស់ខ្ញុំ បានទាត់តុក្កតា Teletubbies នោះ ហើយបានសុំឲ្យពួកខ្ញុំ ចំណាយសងលើថ្លៃដើមតុក្កតាដែលខូចខាត ។
ដោយជឿថា វាជាកំហុសរបស់កូនប្រុសមែន លោក Cheng បានយល់ព្រមបង់ប្រាក់ សម្រាប់តុក្កតា ដែលដាក់លក់ក្នុងតម្លៃ HK$ ៥២,៨០០ (ស្មើ ៦,៧២៦ដុល្លារអាមេរិក) ។ ប៉ុន្តែម្ចាស់ហាង ប្រាប់ពួកគាត់ថា ហាងនឹងបញ្ជុះតម្លៃឲ្យគាត់ គឺបង់ត្រឹមតែ HK$ ៣៣,៦០០ដុល្លារប៉ុណ្ណោះ (ស្មើ ៤,២៥៥ដុល្លារអាមេរិក) ។
ក្រោយពីត្រឡប់មកផ្ទះវិញ នៅពេលដែលលោក Cheng បានឃើញវីដេអូ ដែលគេបង្ហោះនៅលើបញ្ដាញសង្គម នៅយប់ថ្ងៃអាទិត្យ ទើបគាត់ដឹងថា កូនប្រុសរបស់គាត់ ត្រូវបុគ្គលិកហាងចោទប្រកាន់ខុសការពិត ។ ហើយប្រពន្ធរបស់លោក បានទូរសព្ទទៅ KKPlus ទាំងយប់នោះ ប៉ុន្តែហាងក៏បានបិទទ្វារទៅហើយ ។
លោក Cheng បានបន្ថែមថា ៖ «កូនប្រុសរបស់លោក នៅតែមានអារម្មណ៍តក់ស្លុត ដោយសារឧបទ្ទវហេតុនោះ ។ នៅថ្ងៃទី២៤នេះ គាត់ឈប់រៀនមួយថ្ងៃ ។ កាលពីម្សិលមិញ គាត់បានសួរខ្ញុំ ០៣ដង ថាហេតុអ្វីបានជាតុក្កតានេះ គួរឲ្យខ្លាចដូច្នេះប៉ា ?» ។
រឿងរ៉ាវមួយនេះ ធ្វើឲ្យមានការជជែកវែកញែកយ៉ាងច្រើន នៅលើបណ្ដាញសង្គមហ្វេសប៊ុក ដោយមានមតិខ្លះ បានចោទប្រកាន់ហាង KKPlus ថា បានបោកប្រាស់ឪពុក ហើយចោទជាសំណួរថា ហេតុអ្វីតុក្កតាថ្លៃម្ល៉េះ ? របស់ថ្លៃ ម្ត៉េចដាក់របស់ការពារតុក្កតានោះកុំឲ្យមនុស្សចូលទៅជិតវា ? ។ យ៉ាងណា ក៏មានអ្នកខ្លះទៀតបានដាស់តឿនថា ឪពុកម្តាយគួរតែមើលកូនៗឲ្យបានដិតដល់ ព្រោះក្មេងៗវារពឹសនៅមិនស្ងៀមទេ ពិសេសពេលទៅដល់កន្លែងលក់ប្រដាប់ប្រដាក្មេងលេង ។
ហាង KKPlus ក៏បានបង្ហោះសេចក្តីថ្លែងការណ៍មួយ នៅលើទំព័រហ្វេសប៊ុករបស់ខ្លួន កាលពីព្រលឹមថ្ងៃអង្គារនេះ ប៉ុន្តែបានលុបវាចេញវិញ មុនម៉ោង ១១ព្រឹកថ្ងៃដដែល ដោយមិនដឹងមូលហេតុ ។
លោក Albert Luk ជាមេធាវីក្នុងស្រុកម្នាក់ បានប្រាប់ Headline Daily ថា ឪពុកម្តាយក្មេងប្រុសនោះ គួរតែទាមទារឲ្យហាងសងសំណងមួយផ្នែកមកវិញ ព្រោះកុមារហុងកុង អាយុក្រោម១០ឆ្នាំ នឹងមិនទទួលខុសត្រូវ ក្នុងសំណុំរឿងរដ្ឋប្បវេណីឡើយ ។ ហាងមិនគួរស្វែងរកសំណងទេ គួរតែទិញការធានារ៉ាប់រងភាគីទីបីដែលពាក់ព័ន្ធ ដើម្បីរ៉ាប់រងរាល់ការបាត់បង់ ឬខូចខាតទ្រព្យសម្បត្តិដោយសារឧប្បត្តិហេតុ ។
ដោយឡែក អ្នកគ្រប់គ្រងរបស់ KKplus បានផ្តល់បទសម្ភាសន៍ជាមួយសារព័ត៌មាន HK01 កាលពីថ្ងៃអង្គារ យ៉ាងដូច្នេះថា ហាងមិនមានការប្រុងប្រយ័ត្នគ្រប់គ្រាន់មែន ។ អ្នកគ្រប់គ្រងនោះ បានបន្តថា ហាងបានដកប្រដាប់ក្មេងលេង ដែលមានកម្ពស់ជាងមួយម៉ែត្រចេញទាំងអស់ ហើយនឹងធ្វើការពិនិត្យបន្ថែម ៕
សូមទស្សនាវីដេអូ មានដូចខាងក្រោមនេះ៖
ចែករំលែកព័តមាននេះ