អង់គ្លេសរកឃើញករណីឆ្លងជំងឺអ៊ុតស្វាជិត៤០ករណី
អង់គ្លេស ៖ អាជ្ញាធរសុខាភិបាលចក្រភពអង់គ្លេសបានប្រកាសរកឃើញជំងឺអ៊ុតស្វា (Monkeypox)
អង់គ្លេស ៖ អាជ្ញាធរសុខាភិបាលចក្រភពអង់គ្លេសបានប្រកាសរកឃើញជំងឺអ៊ុតស្វា (Monkeypox)
អង់គ្លេស ៖ អាជ្ញាធរសុខាភិបាលចក្រភពអង់គ្លេសបានប្រកាសរកឃើញជំងឺអ៊ុតស្វា (Monkeypox) ចំនួន ៣៦ករណីទៀតកាលពីថ្ងៃច័ន្ទ ទី២៣ ឧសភា ម្សិលមិញនៅក្នុងប្រទេសអង់គ្លេស និងរកឃើញករណីដំបូងនៅប្រទេសស្កុតឡែន។
ភ្នាក់ងារសន្តិសុខសុខភាពចក្រភពអង់គ្លេសបាននិយាយថា (UKHSA) អង់គ្លេសមានការឆ្លងជំងឺអ៊ុតស្វាសរុបចំនួន ៥៦ករណីចាប់តាំងពីថ្ងៃទី ៧ ខែឧសភាមក ប៉ុន្តែបានបញ្ជាក់ថា ទោះបីការផ្ទុះជំងឺនេះមានការព្រួយបារម្ភក្តី ហានិភ័យសម្រាប់ជនជាតិអង់គ្លេសនៅមានកម្រិតទាប។
នាយករដ្ឋមន្ត្រីអង់គ្លេសលោក Boris Johnson បាននិយាយថារដ្ឋាភិបាលរបស់លោកកំពុងពិនិត្យយ៉ាងយកចិត្តទុកដាក់លើកាលៈទេសៈជុំវិញការឆ្លងនេះ ព្រោះវាជាជំងឺដ៏កម្រ។
«វាជាជំងឺដ៏កម្រ ហើយរហូតមកដល់ពេលនេះ ផលវិបាកហាក់មិនទាន់ធ្ងន់ធ្ងរខ្លាំងនោះទេ ប៉ុន្តែវាមានសារសំខាន់ដែលយើងត្រូវតាមដានវា»។
UKHSA និយាយថា ការឆ្លងជាធម្មតាមិនរីករាលដាលស្រួលៗនោះទេក្នុងចំណោមមនុស្ស។
សូមបញ្ជាក់ថា កាលពីពេលថ្មីៗនេះ មានការរកឃើញករណីឆ្លងជំងឺអ៊ុតស្វាជាង ១០០ករណីនៅក្នុងតំបន់អ៊ឺរ៉ុប និងអាមេរិកខាងត្បូង។ ប៉ុន្តែមិនទាន់ធ្ងន់ធ្ងរនោះទេ។
ជំងឺអ៊ុតស្វា (moneypox) ដែលភាគច្រើនកើតឡើងនៅតំបន់អាហ្វ្រិចកណ្តាល និងខាងលិចគឺជាមេរោគដ៏កម្រស្រដៀងទៅនឹងជំងឺអ៊ុតស្វាយដែរ ទោះបីវាមានលក្ខណៈស្រាលជាងក៏ដោយ។ វាត្រូវបានរកឃើញលើកដំបូងនៅក្នុងប្រទេសកុងហ្គោ នៅក្នុងឆ្នាំ ១៩៧០។
រោគសញ្ញានៃជំងឺប្រភេទនេះមានដូចជា គ្រុនក្តៅ ឈឺក្បាល កន្ទួលលើស្បែកចាប់ផ្តើមនៅលើផ្ទៃមុខ និងរីករាលដាលពេញខ្លួនទាំងអស់។ មនុស្សអាចឆ្លងជំងឺប្រភេទនេះតាមរយៈការប៉ះពាល់ផ្ទាល់ជាមួយនឹងអ្នកមានមេរោគនេះ៕ (យោងតាមប្រភព៖ Reuters)
ចែករំលែកព័តមាននេះ