រាជធានីភ្នំពេញ ៖ តំបន់បឹងកក់ដែលរាជរដ្ឋាភិបាលបានអនុញ្ញាតឱ្យក្រុមហ៊ុនឯកជនមួយមានឈ្មោះក្រុមហ៊ុនស៊ូកាគូអ៊ីនធ្វើការអភិវឌ្ឍន៍នោះ ពេលនេះបានចាប់ដំណើរការចេញជារូបរាងហើយ ដោយធ្វើការស្ថាបនាផ្លូវជាប្រព័ន្ធហេដ្ឋារចនាសម្ព័ន្ធជាមុន ។ ផ្លូវថ្មីមួយខ្សែដែលឱ្យឈ្មោះថា ផ្លូវ R5 ស្ថិតក្នុងតំបន់អភិវឌ្ឍន៍បឹងកក់ត្រូវបានសាលារាជធានីភ្នំពេញបើកការដ្ឋានស្ថាបនានាព្រឹកថ្ងៃទី៨ កញ្ញា ក្នុងចំណោមផ្លូវទាំងអស់១២ខ្សែក្នុង គំរោងរៀបចំហេដ្ឋារចនាសម្ព័ន្ធតំបន់អភិវឌ្ឍន៍បឹងកក់ ដោយមានការអញ្ជើញជាអធិបតីពីលោកកែប ជុតិមា ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជាអភិបាលរាជធានីភ្នំពេញ ។
លោកញ៉ែម សារ៉ន នាយកមន្ទីរសាធារណការ និងដឹកជញ្ជូនរាជធានីភ្នំពេញបានឱ្យដឹងថា ផ្លូវR5 ដែលត្រូវបានបើកការដ្ឋានស្ថាបនានាពេលនេះ តភ្ជាប់ពីមុខអង្គភាពរដ្ឋាករទឹកស្វយ័តក្រុងភ្នំពេញដល់ផ្លូវR8 តំបន់នាគវ័នមានប្រវែង១.៥៦២ម៉ែត្រ ទទឹង៣០ម៉ែត្រ ក្នុងនោះចាក់អ៊ុតកៅស៊ូទទឹង២០ម៉ែត្រ ដោយបង្កើតការធ្វើចរាចរណ៍ទ្វេទិសមាន៦ខ្សែរត់ទៅមក៣ខ្សែ ដែលអនុវត្តដោយក្រុមហ៊ុន TCT និងគ្រោងស្ថាបនាឱ្យរួចរាល់ក្នុងរយៈពេល១២០ថ្ងៃ ដោយចំណាយថវិកាសរុបប្រមាណ៩៩២.០១៤ដុល្លារ ដែលជាការចំណាយរបស់ក្រុមហ៊ុនស៊ូកាគូអ៊ីន ក្នុងការវិនិយោគបឹងកក់នេះ ។
លោកកែប ជុតិមា មានប្រសាសន៍ថា គោលដៅយុទ្ធសាស្ត្រក្នុងការស្ថាបនាផ្លូវ R5 នេះ គឺអាចរំដោះចរាចរណ៍លើដងមហាវិថីសហព័ន្ធរុស្ស៊ី និងមហាវិថីព្រះមុនីវង្សទៅកាន់តំបន់ទួលគោក ស្របតាមប្លង់គោលនៃការអភិវឌ្ឍន៍រាជធានីភ្នំពេញ ។ ព្រោះបើយើងពិនិត្យថយក្រោយបនិ្តចយើងឃើញថា ផ្លូវពីមុនវាសមស្របនឹងចំនួនមនុស្សក្នុងរាជធានីភ្នំពេញ តែឥឡូវនេះលែងសមស្របហើយនៅពេលទីក្រុងមានការអភិវឌ្ឍន៍បឹងកក់ក៏មិនមែនជារឿងចម្លែកនោះដែរ ពេលដែលប្រវត្តិរបស់រាជធានីភ្នំពេញកកើតឡើង និងមានការអភិវឌ្ឍន៍ដោយសារការចាក់ដីលុបបឹងធ្វើទីក្រុង ។ លោកអភិបាលបានលើកឡើងពីការកែលំអបរិវេណជុំវិញព្រះសក្យមុនីចេតិយមុខរាជា យស្ម័យយានកម្ពុជាឱ្យបានស្អាត និងស្របពេល ដែលទីស្តីការនាយករដ្ឋមន្ត្រីគ្រោងសម្ពោធជាផ្លូវការក្នុងខែវិចិ្ឆកាខាងមុខ ៕
ចែករំលែកព័តមាននេះ