ខេត្តមណ្ឌលគិរី ៖ នៅថ្ងៃទី០១ វិច្ឆិកា ២០១៦នេះ ជនបរទេសដែលបានចំណាយពេលវេលារត់តាមដងផ្លូវជិត ១.០០០គីឡូម៉ែត្រ បានទៅដល់ខេត្តមណ្ឌលគិរី ក្រោយពេលធ្វើដំណើរចេញពីខេត្តរតនគិរីឆ្ពោះទៅខេត្តកោះកុង។ សមាគមន៍ទឹកស្អាតសម្រាប់កម្ពុជាបង្កើតកម្មវិធីរត់ចម្ងាយ ៨៦៨គីឡូម៉ែត្រ នៅប្រទេសកម្ពុជា រយៈពេល១៨ថ្ងៃ ដើម្បីប្រមូលថវិកាជួយអណ្ដូងទឹកស្អាត ដល់កុមាក្រីក្រនៅកម្ពុជា។ លោក កៅ សាវុធ ប្រធានសគមន៍ទឹកស្អាតសម្រាប់កម្ពុជា ដែលមានទីស្នាក់ការនៅប្រទេសអូទ្រីសបានឲ្យដឹងថា កម្មវិធីរត់ចម្ងាយនៅប្រទេសកម្ពុជា ចាប់រត់ពីព្រំប្រទល់ប្រទេសកម្ពុជា.វៀតណាម ស្រុកអូរយ៉ាដាវ ខេត្តរតនគិរី ឆ្ពោះទៅព្រំប្រទល់ កម្ពុជា.ថៃ ក្នុងស្រុកមណ្ឌលសីមា ខេត្តកោះកុង មានចម្ងាយ៨៦៨គីឡូម៉ែត្រ រត់រយៈពេល១៨ថ្ងៃ ចាប់ចេញដំណើរពីថ្ងៃទី២៩ ខែតុលា ឆ្នាំ២០១៦ រហូតដល់ថ្ងៃទី១៥ ខែវិច្ឆិកា ឆ្នាំ២០១៦ ឆ្លងកាត់៨ខេត្ត គឺខេត្តរតនគិរី ខេត្តមណ្ឌលគីរី ខេត្តក្រចេះ ខេត្តត្បូងឃ្មុំ ខេត្តកំពង់ចាម ខេត្តកំពង់ឆ្នាំង ខេត្តកំពង់ស្ពឺ និងខេត្តកោះកុង។
តាមការឲ្យដឹងពីលោក កៅ សាវុធ ប្រធានសមាគមន៍ទឹកស្អាតសម្រាប់កម្ពុជា ប្រចាំការនៅប្រទេសអូទ្រីសថា គោលបំណងនៃការរត់ចម្ងាយនេះគឺ ដើម្បីប្រមូលថវិកាពីប្រទេសអូទ្រីស មកជីកអណ្ដូងទឹកស្អាតជួយដល់កុមារនៅកម្ពុជា ក្នុងតម្លៃអណ្ដូងមួយ ១.៥០០ដុល្លា ហើយការរត់រយៈពេល១៨ថ្ងៃនេះ យើងនឹងបានអណ្ដូងចំនួន ១៨ ដែរ។ លោកបានបញ្ជាក់ថា អ្នករត់ប្រមូលថវិកាគឺ លោក ឃីង នីញើរ អាយុ៥៥ឆ្នាំ មកពីប្រទេសអូទ្រីស គឺពួកគាត់មកពីសមាគមន៍ កាគីហេ ផ្ដើមចេញពីគ្រួសារគំរូពីរ គឺគ្រួសារត្រកូល KA. និងគ្រួសារត្រកូល KI ដែលគេហៅថា សមាគមន៍ KA .KI .HE បានន័យថា ត្រកូលKA និងត្រកូល KI ជួយកុមារកម្ពុជា។
លោក ឃីង នីញើរ អ្នករត់ចម្ងាយនោះ បានមានប្រសាសន៍ថា នេះជាលើកទី២ហើយ ដែលលោកបានរត់ដើម្បីសុំជំនួយមកពីប្រទេសអូទ្រីស ជីកអណ្ដូងនៅកម្ពុជា។ លើកមុនលោករត់ក្នុងចម្ងាយ ៧០០គីឡូម៉ែត្របានសម្រេចម្ដងមកហើយ លើកនេះលោកនឹងព្យាយាមឲ្យបានសម្រេចជាលើកទីពីរ។ លោកបន្តថាលោកសប្បាយចិត្តណាស់ រាល់ពេលដែលលោកបានបំពេញការងារមនុស្សធម៌ ប្រមូលថវិកាមកជួយជនក្រីក្រនៅកម្ពុជា៕
ចែករំលែកព័តមាននេះ