រាជធានីភ្នំពេញ ៖ ដោយសារតែការរកប្រាក់ចំណូលពីបណ្ដាញសង្គមអ៊ីនធើណេតដូចជា Facebook, Google និង Youtube ជាដើម ធ្វើឲ្យអ្នកផលិតមួយចំនួន តែងតែផលិតវីដេអូប្លែកៗ ហើយកាន់តែប្លែកមែនទែននោះ គឺមានជនជាតិខ្មែរចំនួន ២នាក់ (បុរស និងនារី) បានធ្វើវីដេអូដោយហូបស្បែកជើងផ្ទាត់ ជ្រលក់ជាមួយអំបិលម្ទេសធ្វើអោយវីដេអូមួយឃ្លីបនេះល្បីដល់ស្រុកថៃ យកទៅចុះផ្សាយព័ត៌មានថែមទៀតផង ត្រឹមតែរយៈពេល ២ថ្ងៃ មានអ្នកចូលទស្សនាជាង២០លានដង ។
នារីខ្មែរម្នាក់ (មិនទាល់ស្គាល់អត្តសញ្ញាណ) ដែលគេដឹងថាជា YouTuber ប្រើប្រាស់គណនីហ្វេសប៊ុកឈ្មោះ Jin Su តែងតែបង្ហោះបង្ហាញនូវវីដេអូការបរិភោគអាហារប្លែកៗជាមួយអំបិលម្ទេស ដែលមិនធ្លាប់មានអ្នកធ្វើដូចនាងឡើយ ។
ជាក់ស្តែងកាលពីថ្ងៃទី២០ ខែឧសភា ឆ្នាំ២០២២ នាងបានធ្វើការបង្ហោះនូវវីដេអូ ហូបស្បែកជើងផ្ទាត់ ពណ៌សជ្រលក់អំបិសម្ទេស ក្នុងសកម្មភាពខាំទាញស្បែកជើងនោះ ទាល់តែដាច់មកទំពា ធ្វើមិនដឹង ព្រមទាំងពោលពាក្យថា ឆ្ងាញ់ថែមទៀតផង ។ ទន្ទឹមនឹងនោះ នៅនាទីចុង រូបនាងក៏បានអភ័យទោស និងបញ្ជាក់ថា វីដេអូមួយនេះធ្វើឡើងគ្រាន់តែជាការកម្សាន្តតែប៉ុណ្ណោះ សូមកុំសាកល្បងធ្វើតាមនៅផ្ទះជាដាច់ខាត ។
ក្រោយពីមានការបង្ហោះវីដេអូនេះ ក៏មានអ្នកចូលទៅបញ្ចេញមតិមួយចំនួនយល់ឃើញថា មិនសមរម្យទេ ដោយសារតែខ្លាចក្មេងៗមើលឃើញវីដេអូទាំងនេះ ពួកគេអាចធ្វើតាម នឹងមានផលអាក្រក់ដល់សុខភាពរាងកាយ ក៏អាចថាបាន ។
ដូចគ្នានេះដែរ កាលពីចុងខែមីនា ២០២២ ក៏មានបុរសម្នាក់ (មិនទាល់ស្គាល់អត្តសញ្ញាណ) បានធ្វើវីដេអូ ហូបស្បែកជើងផ្ទាត់ ជាមួយអំបិលម្ទេស បង្ហោះនៅលើផេកហ្វេសប៊ុកឈ្មោះ Sandy TV បង្ហាញអោយឃើញថា ក្រោយពីខាំបានមួយម៉ាត់ បុរសរូបនេះនិយាយថា វាមានលក្ខណៈស្វិតឆ្ងាញ់ តែមិនមែនឆ្ងាញ់ស្បែកជើងទេ គឺឆ្ងាញ់អំបិលម្ទេស ទៅវិញ ។ (វីដេអូរបស់បុរសនេះ ក្រោយមកត្រូវបានលុបចេញពីហ្វេសប៊ុក) ។
សូមរម្លឹកផងដែរថា កាលពីអំឡុងខែតុលា ឆ្នាំ២០២១ រឿងរ៉ាវបរិភោគដំបូងយក្សជាមួយអំបិលម្ទេស បានក្លាយជាប្រធានបទគួរចាប់អារម្មណ៍ពីសំណាក់អ្នកប្រើប្រាស់បណ្តាញសង្គមខ្មែរ ហើយចាប់ពីពេលនោះ មានការហូប បន្លែ ផ្លែឈើ រុក្ខជាតិ និងអាហារប្លែកៗ ជាមួយអំបិលម្ទេស រហូតមកដល់ស្បែកជើងផ្ទាត់នេះ ៕
ចែករំលែកព័តមាននេះ