រាជធានីភ្នំពេញ ៖ កុងស៊ីកាប់ជ្រូកធំមួយ នៅភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ពេលនេះ ត្រូវអ្នករស់នៅជុំវិញចោមរោមប្តឹងទៀតហើយ រឿងក្លិនស្អុយរស់នៅជិតលែងបាន ។
ក្នុងសប្តាហ៍កន្លងមក មានលិខិតជាច្រើនបានបញ្ជូនមក «កោះសន្តិភាព» សុំប្តឹងឲ្យជួយចុះផ្សាយ ព្រោះទ្រាំហិតក្លិនស្អុយ និងស្នូរលាន់ឮទាំងយប់ទាំងថ្ងៃលែងបានហើយ ។
ពួកគេជាប្រជាជន ជាមន្ត្រីរាជការគ្រប់មជ្ឈដ្ឋាន រស់នៅជុំវិញសិប្បកម្មកាប់ជ្រូកមួយនេះនិយាយថា ៥ឆ្នាំកន្លងមកហើយ ដែលអ្នករស់នៅបានប្តឹងសុំឱ្យអាជ្ញាធរខណ្ឌជួយ ធ្វើយ៉ាងណាឲ្យថៅកែកាប់ជ្រូកមានអនាម័យផង កុំឲ្យជះក្លិនស្អុយងុំពេក ។ ពេលថ្ងៃ គេដឹកជ្រូករាប់រយក្បាល ដោយរថយន្តខ្នាតយក្សចតត្រៀបត្រាយ៉ាងអនាធិបតេយ្យមុខផ្ទះអ្នកដទៃរកចេញចូលមិនបាន ។ ពេលយប់ស្នូរក្តូងក្តាំងទាល់ៗភ្លឺ និងសូរសម្លេងជ្រូកស្រែកលាន់ទ្រហឹងរកដេកពួនមិនបាន ។
កាលពីដើមឆ្នាំមានដំណឹងថា កុងស៊ីពិឃាដមួយនេះ រៀបចំរើចេញហើយ ទើបអ្នករស់នៅជុំវិញចេះតែស្ងៀមស្ងាត់ទៅ ប៉ុន្តែពេលនេះស្រាប់តែលេចឮថា ពួកគេរត់ការបានទទួលការពន្យារពេល៥ឆ្នាំទៀត រហូតដល់ប្រកាសថា អាណាប្តឹងអីប្តឹងទៅ ស៊ីសងខាងខណ្ឌគ្នាឯង អាណាងាប់អីងាប់ទៅ ឱ្យតែអញរស់ ។
អ្នករស់នៅជុំវិញសំបុកមេរោគនេះនិយាយថា សុខភាពពួកគេ កូនចៅគេ ឈឺគ្រប់ពេលវេលា ដោយសារតែក្លិនស្អុយពេញមួយវស្សាកន្លងមក ។ មានកម្មកររោងចក្រច្រើនណាស់បានរើចេញ ព្រោះទ្រាំរស់នៅហិតក្លិនស្អុយ និងលាន់ស្នូរជ្រូកស្រែកលែងបាន។
ក្នុងរឿងនេះ សំខាន់លើអាជ្ញាធរខណ្ឌមានជ័យ តើមានដែលបានទៅជួយហិតក្លិនស្អុយនៅតំបន់នោះដែរឬទេ ?
កុំឲ្យប្រជាជនក្នុងតំបន់ថ្នាំងថ្នាក់ពេក ខឹងតទៅយូរពេក ណាមួយជិតដល់រដូវបោះឆ្នោតផង គួរជួយដោះស្រាយបញ្ហាមួយនេះយកចិត្តប្រជាជនក្នុងតំបន់ផង ។
ចាំមើល តើអាជ្ញាធរយកចិត្តថៅកែកាប់ជ្រូកច្រើនជាងប្រជាជនគ្រប់មជ្ឈដ្ឋាននោះឬយ៉ាងណា?
ចំណែកថៅកែកាប់ជ្រូល២នាក់ប្តី-ប្រពន្ធ ពុំអាចសុំការបំភ្លឺបានទេ ម្សិលមិញនេះ ។ ដរាបណា មានព័ត៌មានប្លែក យើើងនឹងផ្សាយជូនបន្តទៀត ។
ចែករំលែកព័តមាននេះ