ក្រុមតាលីបង់បញ្ជាឲ្យពិធីករទូរទស្សន៍ជាស្រ្តី និងស្រ្តីផ្សេងទៀតលើកញ្ចក់ទូរទស្សន៍ ត្រូវគ្របមុខរបស់ពួកគេក្នុងអំឡុងការផ្សាយ។
អ្នកនាំពាក្យប៉ូលីសសាសនាបានថ្លែងប្រាប់ BBC នៅថ្ងៃសៅរ៍នេះថា ប្រព័ន្ធផ្សព្វផ្សាយទាំងអស់ត្រូវបានប្រាប់អំពីបទបញ្ជានេះ កាលពីថ្ងៃពុធកន្លងទៅ ។
សេចក្តីសម្រេចថ្មីរបស់ក្រុមតាលីបង់ កើតឡើងរយៈពេល២សប្តាហ៍ ក្រោយពេលស្រ្តីទាំងអស់ត្រូវបានបញ្ជាឲ្យគ្របស្បៃមុខនៅទីសាធារណៈ បើមិនដូច្នេះទេ ពួកគេនឹងត្រូវទទួលការពិន័យ។
ចាប់តាំងពីឡើងកាន់អំណាចមក ក្រុមតាលីបង់បានដាក់ការរឹតត្បិតលើស្រ្តី ដោយស្រ្តីត្រូវបានហាមឃាត់មិនឲ្យធ្វើដំណើរដោយគ្មានបុរសនៅអមជាមួយ ហើយសាលាអនុវិទ្យាល័យសម្រាប់ក្មេងស្រីត្រូវបានបិទ។
អ្នកកាសែតជាស្រ្តីអាហ្វហ្គានីស្ថានម្នាក់ មកពីស្ថានីយទូរទស្សន៍ក្នុងរដ្ឋធានី Kabul ដែលសុំមិនបញ្ចេញឈ្មោះបាននិយាយថា នាងមានការភ្ញាក់ផ្អើលយ៉ាងខ្លាំងនៅពេលបានលឺដំណឹងចុងក្រោយនេះ។
នាងថ្លែងប្រាប់ BBC ដូច្នេះថា «ពួកគេបានដាក់សម្ពាធដោយប្រយោលមកលើយើង ដើម្បីបញ្ឈប់យើងធ្វើការបង្ហាញនៅតាមកញ្ចក់ទូរទស្សន៍» ។ «តើខ្ញុំអាចអានព័ត៌មានបានបែបណាទាំងមាត់ខ្ញុំត្រូវគ្រប? ខ្ញុំមិនដឹងពីអ្វីដែលត្រូវធ្វើនោះទេឥឡូវនេះ។ ខ្ញុំត្រូវតែធ្វើការ ខ្ញុំជាអ្នករកប្រាក់ចិញ្ជឹមគ្រួសាររបស់ខ្ញុំ »។
ក្រឹត្យថ្មីរបស់ក្រុមតាលីបង់នឹងចូលជាធរមាន ចាប់ពីថ្ងៃទី ២១ ខែឧសភានេះ ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Reuters ដកស្រង់សម្តីរបស់អ្នកនាំពាក្យក្រសួងការពារ និងលើកកម្ពស់គុណធម៌របស់ក្រុមតាលីបង់៕ (យោងតាមប្រភព៖ BBC)
ចែករំលែកព័តមាននេះ