អាមេរិក ៖ ការស៊ើបការណ៍សម្ងាត់របស់អាមេរិកបានបង្ហាញថា កូរ៉េខាងជើងអាចនឹងធ្វើការបា.ញ់សាកល្បងអាវុ.ធនុយក្លេអ៊ែរ ឬមីស៊ីល ឬបា.ញ់សាកល្បងទាំងពីរ មុនពេលអំឡុង ឬក្រោយពេលប្រធានាធិបតីអាមេរិកលោក Joe Biden ធ្វើដំណើរទៅកាន់ប្រទេសកូរ៉េខាងត្បូង និងជប៉ុននៅសប្តាហ៍នេះ។ នេះបើយោងតាមការបញ្ជាក់របស់ទីប្រឹក្សាសន្តិសុខជាតិអាមេរិកលោក Jake Sullivan។
លោកបានថ្លែងក្នុងសន្និសីទសារព័ត៌មាននៅសេតវិមានដូច្នេះថា «យើងកំពុងរៀបចំសម្រាប់គ្រប់កាលៈទេសៈទាំងអស់ រួមទាំងលទ្ធភាពដែលការបង្កហេតុនេះនឹងកើតឡើង ខណៈពេលយើងនៅក្នុងប្រទេសកូរ៉េខាងត្បូង ឬជប៉ុន»។
លោកបញ្ជាក់ថា អាមេរិកកំពុងសម្របសម្រួលយ៉ាងជិតស្និទ្ធជាមួយនឹងកូរ៉េខាងត្បូង និងជប៉ុនស្តីពីបញ្ហានេះ និងព្រមទាំងបានពិភាក្សាគ្នាតាមទូរស័ព្ទកាលពីថ្ងៃពុធម្សិលមិញនេះជាមួយមន្ត្រីជាន់ខ្ពស់ចិនគឺលោក Yang Jiechi អំពីបញ្ហារបស់កូរ៉េខាងជើង។
លោកថ្លែងថា សហរដ្ឋអាមេរិកបានត្រៀមខ្លួន ដើម្បីធ្វើការកែតម្រូវទាំងរយៈពេលខ្លី និងវែងចំពោះឥរិយាបថយោធារបស់ខ្លួនតាមការចាំបាច់ «ដើម្បីធានាថា យើងកំពុងផ្តល់ទាំងការការពារ និងការរារាំងដល់សម្ព័ន្ធមិត្តរបស់យើងនៅក្នុងតំបន់ ហើយថាយើងកំពុងឆ្លើយតបទៅនឹងការបង្កហេតុណាមួយរបស់កូរ៉េខាងជើង»។
អ្នកនាំពាក្យសេតវិមានលោកស្រី Karine Jean-Pierre បានថ្លែងប្រាប់សន្និសិទ្ធដដែលថា លោក Joe Biden នឹងមិនទៅកាន់តំបន់គ្មានយោធានោះទេ (DMZ) ដែលជាតំបន់ខណ្ឌចែកកូរ៉េខាងទាំងពីរ អំឡុងដំណើរទស្សនៈកិច្ចទៅកាន់កូរ៉េខាងត្បូងដែលនឹងចាប់ផ្តើមឡើងនៅថ្ងៃសុក្រស្អែកនេះ៕ (យោងតាមប្រភព៖ Reuters)
ចែករំលែកព័តមាននេះ