សហរដ្ឋអាមេរិក ៖ រដ្ឋមន្ត្រីក្រសួងរតនាគារអាមេរិក លោកស្រី Janet Yellen បាននិយាយថា សហរដ្ឋអាមេរិកមិនមានសិទ្ធិអំណាចផ្លូវច្បាប់ ដើម្បីរឹបអូសយកទ្រព្យសម្បត្តិធនាគារកណ្តាលរុស្ស៊ី ដែលត្រូវបានបង្កក ដោយសារការឈ្លានពានអ៊ុយក្រែននោះទេ។
មន្ត្រីអឺរ៉ុបមួយចំនួនបានគាំទ្រថា សហភាពអឺរ៉ុប អាមេរិក និងសម្ព័ន្ធមិត្តមួយចំនួនទៀត រឹបអូសយកទឹកប្រាក់ចំនួន ៣០០ពាន់លានដុល្លាររបស់ធនាគារកណ្តាលរុស្ស៊ី ដែលត្រូវបានបង្កកដោយសារទណ្ឌកម្ម ដើម្បីយកប្រើប្រាស់សម្រាប់កសាងប្រទេសអ៊ុយក្រែនឡើងវិញ។
ធនាគារពិភពលោកបានប៉ាន់ស្មានថា អ៊ុយក្រែនខាតបង់អស់ ៤ពាន់លានដុល្លារក្នងមួយសប្តាហ៍។
«ខ្ញុំគិតថា វាគឺជារឿងធម្មជាតិសម្រាប់ការបំផ្លិចបំផ្លាញដ៏ធំនៅក្នុងប្រទេសអ៊ុយក្រែន និងការចំណាយលើការសាងសង់ឡើងវិញ ដែលពួកគេនឹងប្រឈម ហើយយើងនឹងសម្លឹងមើលរុស្ស៊ី ដើម្បីជួយចំណាយយ៉ាងហោចណាស់លើផ្នែកខ្លះដែលនឹងពាក់ព័ន្ធ»។ នេះជាការថ្លែងរបស់លោកស្រីប្រាប់អ្នកសារព័ត៌មាននៅក្នុងប្រទេសអាឡឺម៉ង មុនពេលកិច្ចប្រជុំរដ្ឋមន្ត្រីហិរញ្ញវត្ថុនៃប្រទេស G7 នៅសប្តាហ៍នេះ។
លោកស្រីបន្ថែមថា «ខណៈពេលយើងកំពុងចាប់ផ្តើមពិនិត្យមើលរឿងនេះ វានឹងមិនស្របច្បាប់នោះទេ ឥឡូវនេះ សម្រាប់រដ្ឋាភិបាលអាមេរិកធ្វើការរឹបអូសទ្រព្យសម្បត្តិទាំងនោះ»៕ (យោងតាមប្រភព៖ Aljazeera)
ចែករំលែកព័តមាននេះ