រាជធានីភ្នំពេញ ៖ គណបក្សឯកភាពជាតិខ្មែរ ដែលជាគណបក្សនយោបាយមួយ ទើបតែបង្កើតថ្មីថា ខ្លួននឹងធ្វើយុទ្ធនាការឃោសនាស្វែងរកសម្លេងឆ្នោត នឹងគោរពតាមនីតិវីធីរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដែលបានដាក់ចេញ។
លោក អ៊ុន ជិម ប្រធានគណបក្សឯកភាពជាតិខ្មែរ បានឲ្យដឹងនៅថ្ងៃទី១៩ ខែឧសភាថា គណបក្សរបស់លោកនឹងធ្វើយុទ្ធនាការឃោសនាស្វែងរកសម្លេងឆ្នោតថ្ងៃដំបូងនៅតាមរាជធានី-ខេត្តតែចំនួន៣ គឺមានខេត្តតាកែវ ខេត្តកំពង់ស្ពឺ និងខេត្តព្រះសីហនុ ដោយគោរតាមបទបញ្ញត្តិរបស់ គ.ជ.ប។
លោកថា «អ៊ីចឹងការធ្វើយុទ្ធនាការឃោសនាធំមុនគេ គឺនៅខេត្តព្រះសីហនុ ក្នុងស្រុកព្រៃនប់ ដោយមានសមាជិកចាប់ពី២០០នាក់ទៅ៣០០នាក់ តាមគ្រោងទុក។ ដូច្នេះយើងនឹងដង្ហែនៅទីនោះ យើងបានដាក់ពាក្យសុំរួចហើយ តែយើងមិនទាន់ឃើញ គ.ជ.ប គាត់ឆ្លើយតបនៅឡើងនោះទេ»។
ទាក់ទិននឹងការអំពាវនាវរបស់ គ.ជ.ប ឲ្យគណបក្សនយោបាយទាំងអស់ គោរពតាមគោលនយោបាយ ក្រមសីលធម៌ និងបញ្ញត្តិច្បាប់នោះ លោកប្រធានបក្ស ក៏បានលើកឡើងថា គណបក្សនឹងគោរពតាមគោលនយោបាយរបស់ខ្លួន ក្រមសីលធម៌ នឹងលើកទឹកចិត្តដល់វិស័យការតស៊ូមតិជាដើម។
លោកថា ការបោះឆ្នោតឃុំ-សង្កាត់មានភាបល្អប្រសើរ ប៉ុន្តែមានការខ្វះចន្លោះតិចតូចដែរ ក្នុងនោះក៏មានចំណុចមួយ គឺអាជ្ញាធរមូលដ្ឋានបានធ្វើការរឹតបណ្តឹងដល់គណបក្សនយោបាយផងដែរ។ ជាមួយគ្នានោះដែរ លោកថា ក្នុងនាមជាគណបក្សនយោបាយថ្មីមួយដែលទើបបង្កើតឡើង លោកចង់ឃើញគណបក្សនយោបាយទាំងអស់ធ្វើការប្រកួតប្រជែងគ្នា ដោយក្រមសីលធម៌នយោបាយ និងគោរពគ្នាទៅវិញទៅមក ដោយកុំថា គណបក្សនយោបាយមានវ័យចាស់វស្សាមកបណ្តុះបង្អាប់គណបក្សនយោបាយថ្មី។
សូមជម្រាបថា គណៈកម្មាធិការជាតិរៀបចំការបោះឆ្នោត (គ.ជ.ប) បានណែនាំពីការពង្រឹងសន្តិសុខ សណ្ដាប់ធ្នាប់ និងរបៀបរៀបរយ ក្នុងការិយាល័យបោះឆ្នោត និងការិយាល័យរាប់សន្លឹកឆ្នោត ក្នុងដំណើរការបោះឆ្នោតជ្រើសរើសក្រុមប្រឹក្សាឃុំ*សង្កាត់ អាណត្តិទី៥ ឆ្នាំ២០២២ នាថ្ងៃទី៥ ខែមិថុនា ឆ្នាំ២០២២។
គ.ជ.ប បានឲ្យដឹងថា «ដើម្បីឲ្យដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ប្រព្រឹត្តទៅដោយរលូន និងធានាបាននូវសន្តិសុខ សុវត្ថិភាព សណ្តាប់ធ្នាប់ របៀបរៀបរយ និងបរិយាកាសស្ងប់ស្ងាត់ល្អ គណៈកម្មាធិការជាតិរៀបចំការបោះឆ្នោត (គ.ជ.ប) សូមណែនាំដល់ប្រធានគណៈកម្មការរាជធានី ខេត្ត រៀបចំការបោះឆ្នោត (គធ.ខប) ប្រធានគណៈកម្មការឃុំ សង្កាត់រៀបចំការបោះឆ្នោត (គឃ.សប) និងប្រធានគណៈកម្មការ ការិយាល័យបោះឆ្នោត និងរាប់សន្លឹកឆ្នោត (គ.ក.ប/គ.ក.រ)»។
គណៈកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវដល់គណបក្សនយោបាយ បេក្ខជន អ្នកគាំទ្រនៃគណបក្សនយោបាយទាំងអស់ ត្រូវអនុវត្តតាមវិធានការនានារបស់ គ.ជ.ប ដើម្បីឲ្យការឃោសនាបោះឆ្នោត ប្រព្រឹត្តទៅដោយសន្តិវិធី អហិ.ង្សា សន្តិសុខ និង សុវត្ថិភាព។ ឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ រយៈពេល ១៤ថ្ងៃ ចាប់ពីថ្ងៃទី២១ ឧសភា ដល់ថ្ងៃទី៣ ខែមិថុនា ឆ្នាំ២០២២ ខាងមុខ៕
ចែករំលែកព័តមាននេះ