តាកែវ៖ អាជ្ញាធរខេត្តតាកែវ បានបើកកិច្ចប្រជុំ ស្តីពី វិធានការទប់ស្កាត់ការនាំចូលសត្វជ្រូក សាច់ជ្រូក និងផលិតផលសាច់ជ្រូកខុសច្បាប់ ពីប្រទេសវៀតណាម តាមច្រករបៀងនានា ចូលក្នុងភូមិសាស្ត្រខេត្តតាកែវ។ កិច្ចប្រជុំនេះ បានធ្វើឡើង នៅព្រឹកថ្ងៃទី១៦ ខែឧសភា ឆ្នាំ ២០២២ នៅសាលប្រជុំសាលាខេត្តតាកែវ ក្រោមអធិបតីភាពលោក ខាន់ សុខា អភិបាលរងខេត្ត​។

លោក ខាន់ សុខា បាន​ដាក់បញ្ជាដល់មន្ទីរជំនាញកសិកម្ម ពិសេសពេទ្យសត្វខេត្ត និងអាជ្ញាធរ​ពាក់ព័ន្ធ ត្រូវ​ទប់ស្កាត់ឲ្យខាងតែបាន ចំពោះការនាំចូលសត្វជ្រូក សាច់ជ្រូក និងផលិតផលសាច់ជ្រូកខុសច្បាប់ផ្សេងៗ ពីប្រទេសវៀតណាម តាមច្រករបៀង ចូលក្នុងភូមិសាស្ត្រ ខេត្តតាកែវ ឱ្យបានដាច់ខាត ព្រោះកន្លងមកនេះ មានការឃុប​ឃិតបើកឱ្យនាំចូល​ជ្រូកពីប្រទេសវៀងតណាម មកស្ទើររាល់យប់។

លោក ខាន់ សុខា ​បន្តទៀតថា មន្ទីរកសិកម្ម រុក្ខាប្រមាញ់ និងនេសាទខេត្ត  រួមទាំង​ការិយាល័យបសុពេទ្យខេត្ត គួរតែ​តាមដានសង្កេត ប្រសិនបើមានករណីនាំចូល​សត្វជ្រូក សាច់ជ្រូក និងផលិតផលសាច់ជ្រូកផ្សេងៗ ដោយខុសច្បាប់ ត្រូវសហការជាមួយអាជ្ញាធរដែនដី មានសមត្ថកិច្ចពាក់ព័ន្ធ នៅតាមបណ្តា​ច្រកទ្វារអន្តរជាតិ ច្រកទ្វារទ្វេ​ភាគី ច្រកទ្វារតំបន់ និងច្រករបៀងផ្សេង ដោយត្រូវចាប់យកមកឲ្យបាន ហើយសិក្សាស្រាវជ្រាវឲ្យច្បាស់ថា ប្រភពមកពីណា? ក្រុមហ៊ុនណា ដែលលួចនាំចូល? ហើយត្រូវចាត់វិធានការតាមផ្លូវច្បាប់។

 លោកអភិបាលរងខេត្ត ក៏បានបញ្ជាក់ថា កន្លងមក រដ្ឋបាលខេត្ត បានសង្កេតឃើញថា មានជនខិលខូចមួយចំនួន បានលួចនាំសត្វជ្រូក សាច់ជ្រូក និងផលិតផលសាច់ជ្រូក​ខុសច្បាប់ផ្សេងៗ ពីប្រទេសវៀតណាម ចូលមក ដោយគ្មានច្បាប់អនុញ្ញាត ចូលតាមច្រករបៀង មកក្នុងភូមិសាស្ត្រស្រុកគីរីវង់ ខេត្តតាកែវ​។

ដើម្បីបង្ក្រាប និងទប់ស្កាត់រាល់សកម្មភាពល្មើសច្បាប់នេះ លោកអភិបាលរងខេត្ត បានណែនាំ​ឱ្យសមត្ថកិច្ចទាំង ៣អង្គភាព សមត្ថកិច្ចការពារព្រំដែន ពិសេស​មន្ទីរកសិកម្ម និងពេទ្យសត្វ ត្រូវសហការគ្នា​។   

គួរបញ្ជាក់ថា កន្លងមកនេះ មានគេរាយការណ៍ថា ​ឈ្មោះ សើ ដែលត្រូវជាក្មួយរបស់លោក ថៃ លី មេពេទ្យសត្វ ខេត្តតាកែវ បាននាំ​ជ្រូករស់ ចូលមកពីវៀតណាម ចូលតាមច្រករបៀងយ៊ិនយ៉ា និងឫស្សី ៣គុម្ព ស្ទើររាល់យប់។ ករណីនាំជ្រូកចូលពីវៀតណាមនេះ រហូតដឹងដល់នាយកដ្ឋាន​ជំនាញ​របស់ក្រសួង​កសិកម្ម រុក្ខាប្រមាញ់ និងនេសាទ បានចុះមកចាប់ ១ឡាន មានជ្រូក ៤៨ក្បាល។ ប៉ុន្តែក្រោយមក ក៏ដោះស្រាយគ្នា រួចហើយឈ្មួញ ឈ្មោះ សើ បានដឹកជ្រូក ចូលពីវៀតណាម មកទឹកដីខេត្តតាកែវ លើសដើម៕ សេង សុធា