តាកែវ៖ ដោយទទួលបាននូវសំណូមពរពីប្រជាពលរដ្ឋយ៉ាងច្រើននោះ ខាងមន្ទីរ បានធ្វើការជួសជុលកែលម្អឡើងវិញផ្លូវកៅស៊ូមួយខ្សែ ប្រវែង ១២គីឡូម៉ែត្រ នៅស្រុកបាទី តបតាមការស្នើសុំរបស់បងប្អូនប្រជាពលរដ្ឋ ដើម្បីឱ្យការធ្វើដំណើរទៅមករបស់ប្រជាពលរដ្ឋ បានស្រួល និងល្អឡើងវិញ។ នេះបើតាមលោក លីវ សំណាង ប្រធានមន្ទីរអភិវឌ្ឍន៍ជនបទ ខេត្តតាកែវ។
លោកប្រធានមន្ទីរ បានអោយដឹងថា ផ្លូវកៅស៊ូមួយខ្សែនេះ ជាប្រភេទ DBST ប្រវែងជាង ១២គីឡូម៉ែត្រ តភ្ជាប់ពីផ្លូវជាតិលេខ២ វត្តអង្គរុន ឆ្ពោះទៅផ្លូវជាតិលេខ ៣ ក្នុងក្រុងច្បារមន ត្រូវបានមន្ទីរអភិវឌ្ឍន៍ជនបទខេត្តតាកែវ ធ្វើការជួសជុល និងកែលម្អឡើងវិញ បន្ទាប់ពីទទួលបានការស្នើសុំពីបងប្អូនប្រជាពលរដ្ឋ ដែលរស់នៅតាមបណ្តោយផ្លូវខាងលើ ក្នុងស្រុកបាទី ខេត្តតាកែវ ស្នើសុំទៅលោក អ៊ូច ភា អភិបាលខេត្តតាកែវ និងលោកបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ អោយមានការជួសជុលផ្លូវកៅស៊ូមួយខ្សែនេះឡើងវិញ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ក៏ដូច ជាការបញ្ជៀសនូវគ្រោះថ្នាក់ចរាចរណ៍ ក្រោយមានការខូចខាតជាតំណំ និងកន្លែងខ្លះកៅស៊ូឡើងផុងអណ្តែតឡើងខ្ពស់ងាយនឹងបង្កគ្រោះថ្នាក់។
លោកបន្ថែមថា កំណាត់ផ្លូវ១ខ្សែនេះ រងការខូចខាត ដោយសាររថយន្តដឹកលើសទម្ងន់ ធុនធ្ងន់ធំៗជាច្រើន បានបើកបរលើកំណាត់ផ្លូវមួយខ្សែនេះ៕ សេង សុធា
ចែករំលែកព័តមាននេះ