ខេត្តសៀមរាប៖ បុរសម្នាក់ បានច្រកដីខ្សាច់ ដាក់ក្នុងការ៉ុងស្ករស ហើយយកទៅលក់ឱ្យអាជីវករលក់ឥវ៉ាន់ចាបហួយ នៅតាមបណ្ដាស្រុកមួយចំនួន ក្នុងខេត្តសៀមរាប។ ប៉ុន្តែបុរសនោះ បានជាប់អន្ទាក់ ដោយត្រូវកម្លាំងនគរបាលស្រុកប្រាសាទបាគង ឃាត់ខ្លួន ទៅតាមបណ្ដឹងរបស់ជនរងគ្រោះ។ នេះបើយោងតាមសម្តី របស់លោកឧត្តមសេនីយ៍ត្រី អ៊ុំ ចំរើន ស្នងការរង ទទួលផែនការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តសៀមរាប នៅល្ងាចថ្ងៃទី១៨ ខែឧសភា ឆ្នាំ២០២២នេះ។
លោកបញ្ជាក់ថា ជនសង្ស័យ ឈ្មោះ រិន ចំរើន ភេទប្រុស ឆ្នាំកំណើត ០១.០៩. ១៩៨៧ មានស្រុកកំណើត រស់នៅភូមិអន្សារក្រង ឃុំអន្សារក្រង ស្រុកស្ទោង ខេត្តកំពង់ធំ ទីលំនៅបច្ចុប្បន្ន ស្នាក់នៅផ្ទះជួល ក្នុងភូមិអញ្ចាញថ្មី សង្កាត់នគរធំ ក្រុងសៀមរាប។ បុរសនេះ ត្រូវឃាត់ខ្លួន ពាក់ព័ន្ធករណីអំពើឆបោក នៅថ្ងៃទី១៧.០៥.២០២២ វេលាម៉ោង ០៩ និង០០នាទីព្រឹក ក្នុងភូមិជ្រៃ ឃុំកណ្ដែក ស្រុកប្រាសាទបាគង ខេត្តសៀមរាប។
លោកបន្ថែមថា មុនពេលកើតហេតុ នៅថ្ងៃទី១៧-០៥-២០២២ ម៉ោង ១២ និង ១៥នាទីរសៀល ប៉ុស្ដិ៍នគរបាលរដ្ឋបាលកណ្តែក បានទទួលបណ្តឹងពីជនរងគ្រោះ ឈ្មោះ ហៅ លីហេង ភេទស្រី អាយុ ៣៩ឆ្នាំ នៅភូមិល្អក់ ឃុំកណ្តែក ស្រុកប្រាសាទបាគង ខេត្តសៀមរាប បានរៀបរាប់ថា នៅថ្ងៃទី១៦-០៥-២០២២ ម៉ោង ៧ព្រឹក គាត់បើកតូបលក់ឥវ៉ាន់ នៅភូមិជ្រៃ ឃុំកណ្តែក ស្រុកប្រាសាទបាគង ដូចធម្មតា។ លុះដល់ម៉ោង ១៧ និង០០នាទី ល្ងាចមានមនុស្សប្រុសម្នាក់ ពុំស្គាល់អត្តសញ្ញាណ បានជិះម៉ូតូហុងដា ពណ៌ខ្មៅ ឌុបការ៉ុងពណ៌សមួយ មកដល់សួរគាត់ថា ទិញស្ករសទេ លក់ ១ការ៉ុង តម្លៃ ១០០ ០០០ រៀល (មួយសែនរៀល) គាត់ព្រមទិញយក ដោយពុំបានពិនិត្យមើលទេ លុះដល់ម៉ោង ១៨ និង ៣០នាទីល្ងាច ថ្ងៃដដែល បុរសខាងលើ បានដឹកមកលក់ ៣ការ៉ុងទៀត គាត់ព្រមទិញយកទៀត ក្នុងតម្លៃ ៣០០ ០០០រៀល (បីសែនរៀល) និងបានសុំលេខទូរស័ព្ទគាត់ សំរាប់ទាក់ទងទិញស្ករសបន្ថែមទៀត។ លុះថ្ងៃទី១៧ ខែឧសភា ឆ្នាំ ២០២២ ម៉ោង ៨ព្រឹក បុរសខាងលើ បានទាក់ទងលក់ស្ករបន្ថែម ចំនួន ៥ការ៉ុងទៀត គាត់ទទួលទិញទៀត ប្រហែលកន្លះម៉ោងបុរសខាងលើ ដឹកស្ករចំនួន ៥ការ៉ុង ទៅឱ្យគាត់ដល់ផ្ទះ ហើយបានទៅយកលុយនៅតូបលក់ ចំនួន ៥០០ ០០០ រៀល (ប្រាំសែនរៀល) បន្ទាប់មក ប្អូនស្រី ឈ្មោះ គុំ ស្រីនៀង បានទូរស័ព្ទប្រាប់ថា ស្ករបងឯង សុទ្ធតែដីខ្សាច់ ពេលកំពុងនិយាយទូរស័ព្ទ បុរសខាងលើជិះម៉ូតូ មកតូបគាត់ម្តងទៀត ពេលនោះ គាត់ហែកការ៉ុងមើលឃើញសុទ្ធតែដីខ្សាច់ នៅក្នុងការ៉ុងទាំងអស់ ក៏នាំគ្នាឃាត់បុរសនោះទុក ហើយហៅសមត្ថកិច្ចមកតែម្តង។
បើតាមការស្តាប់ចម្លើយរបស់ជនសង្ស័យ ឈ្មោះ រិន ចំរើន ភេទប្រុស អាយុ ៣៤ឆ្នាំ ស្នាក់នៅផ្ទះជួលក្នុងភូមិអញ្ចាញថ្មី សង្កាត់នគរធំ ក្រុងសៀមរាប បានឆ្លើយសារភាពថា ខ្លួនពិតជាបានធ្វើសកម្មភាពយកដីខ្សាច់ច្រកក្នុងការ៉ុង ហើយលក់ឱ្យជនរងគ្រោះខាងលើ ចំនួន ៩ការ៉ុង ពិតប្រាកដមែន។
លោកបញ្ជាក់ទៀតថា ជនសង្ស័យបានឆ្លើយទៀតថា ខ្លួនធ្វើសកម្មភាពយកដីខ្សាច់ច្រកការ៉ុង លក់ឱ្យអ្នករស់នៅម្តុំផ្សារត្រាំនាគ ពុំស្គាល់ឈ្មោះ មួយ លើក និងលក់ឱ្យអ្នករស់នៅម្តុំវត្តល្អក់ ពុំស្គាល់ឈ្មោះ មួយលើក លុយ ដែលលក់បានខ្លួន យកទៅចាយវាយអស់ហើយ។
ក្រោយឃាត់ខ្លួន កម្លាំងនគរបាលជំនាញនៃស្រុកប្រាសាទបាគង កំពុងកសាងសំណុំរឿង ដើម្បីបញ្ជូនខ្លួនជនសង្ស័យខាងលើ កាន់ការិយាល័យជំនាញ ចាត់ការទៅតាមផ្លូវច្បាប់៕ ច័ន្ទ រស្មី
ចែករំលែកព័តមាននេះ