ប្រទេសសិង្ហបុរី ៖ ធនាគារជាតិសិង្ហបុរីឲ្យដឹងថា សេដ្ឋកិច្ចដែលពឹងផ្អែកលើការធ្វើពាណិជ្ជកម្មរបស់ប្រទេសនេះនឹងជួបប្រទះភាពអន់ថយ ហើយត្រូវបានព្យាករណ៍ថា នឹងមិនកើនឡើងច្រើននោះទេសម្រាប់ឆ្នាំក្រោយ ។
សេដ្ឋកិច្ចសកលលោក ត្រូវបានគេគិតថា នឹងលូតលាស់ក្នុងល្បឿនថេរ និងមធ្យមក្នុងឆ្នាំ២០១៧ ហើយរួមជាមួយគ្នានោះដែរ តម្រូវការនឹងបន្តមានភាពមិនស្មើគ្នាក្នុងទីផ្សារនាំចេញរបស់ប្រទេសសិង្ហបុរី ។ អាជ្ញាធររូបិយវត្ថុសិង្ហបុរី (MAS) បាននិយាយក្នុងរបាយការណ៍ម៉ាក្រូសេដ្ឋកិច្ចរបស់ពួកគេកាលពីថ្ងៃអង្គារកន្លងមកថា មានន័យថា វិស័យដែលទាក់ទងនឹងពាណិជ្ជកម្មនឹងបន្តជួបការលំបាក ។
ខាងលើនេះថែមទាំងត្រូវបានរួមផ្សំជាមួយវិស័យមួយចំនួនដូចជា ប្រេងនិងឧស្ម័ន ឧបករណ៍ចម្លងអគ្គិសនី និងសេវាកម្មដឹកជញ្ជូនផងដែរ ដែលកំពុងតែអភិវឌ្ឍន៍ ។
MAS បន្ថែមថា ការព្យាករថានឹងមានភាពអន់ថយនៃពាណិជ្ជកម្ម មានន័យថា ការលូតលាស់របស់ប្រទេសក្នុងឆ្នាំ២០១៧ នឹងត្រូវពឹងផ្អែកយ៉ាងខ្លាំងទៅលើវិស័យក្នុងស្រុក និងសេវាកម្ម ។
ធនាគារជាតិក៏បាននិយាយដែរថា ស្មារតីរបស់អាជីវករនៅបន្តស្ថិតក្នុងភាពអវិជ្ជមាន ជាពិសេស ក្នុងចំណោមសហគ្រាសធុនតូច និងមធ្យម ។
MAS និយាយថា ៖ « សេដ្ឋកិច្ចក្នុងស្រុកបានជួបប្រទះនឹងភាពអន់ថយតាំងពីរបាយការណ៍មុនមកម្ល៉េះ ។ ការលូតលាស់ភាគច្រើនធ្លាក់ចុះបន្តិចក្នុងត្រីមាសទី២ ហើយក៏កាន់តែធ្លាក់ចុះថែមទៀតក្នុងត្រីមាសទី៣ » ។
ធនាគារជាតិកត់សម្គាល់ថា ជាមធ្យម GDP បានធ្លាក់ចុះ២% ពីត្រីមាសមួយទៅត្រីមាសមួយទៀតក្នុងឆមាសដំបូង ដែលធ្លាក់ពីកំណើនជាមធ្យមប្រមាណ៣,២% ក្នុងត្រីមាសមុនៗ ។
របាយការណ៍ខាងលើ ក៏បានកត់សម្គាល់ថា ការលូតលាស់របស់ពិភពលោក ត្រូវបានព្យាករណ៍ថា នឹងស្មើ៣,៧%ក្នុងឆ្នាំនេះ ហើយនឹងកើនឡើងបន្តិចមកស្មើ៣,៨%ក្នុងឆ្នាំក្រោយ ដោយសារការវិនិយោគអាជីវកម្មក្នុងសេដ្ឋកិច្ចធំៗនៅបន្តអន់ថយ ព្រោះតែមានការកើនឡើងនៃភាពមិនច្បាស់លាស់ផ្នែកសេដ្ឋកិច្ច ។
MAS បន្តថា ការព្យាករសម្រាប់ទ្វីបអាស៊ី គឺមានស្ថិរភាពនៅឡើយ ប៉ុន្តែតិចជាងការគិតទុកមុន បើធៀបនឹងរយៈពេលមុនមានវិបត្តិហិរញ្ញវត្ថុកន្លងមក ៕
ចែករំលែកព័តមាននេះ