រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ នាវេលារសៀលថ្ងៃទី១៦ ខែឧសភា ឆ្នាំ២០២២នេះ បានចាប់អ្នកលក់គុយទាវម្នាក់បញ្ជូនទៅតុលាការ ដែលបុរសជាអ្នកលក់គុយទាវរូបនោះ បានជាប់ពាក់ពន្ធពីបទ «រំលោ.ភលើទំនុកចិត្ត» លើទឹកប្រាក់ប្រមាណជិត១០ម៉ឺនដុល្លារអាមេរិក ។
ជនសង្ស័យខាងលើនេះមានឈ្មោះ សួ ឈុនឡេង ភេទប្រុស អាយុ៣១ឆ្នាំ មុខរបរលក់គុយទាវ មានទីលំនៅផ្ទះលេខ៣៣៧ ផ្លូវលំ ស្ថិតក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ ។
បើតាមសមត្ថកិច្ចបានឲ្យដឹងថា ការចាប់បញ្ជូនខ្លួនជនសង្ស័យខាងលើនេះ គឺជាការអនុវត្តតាមដីកាបង្គាប់ឲ្យចាប់ខ្លួនរបស់លោក សឿង ចរិយា ចៅក្រមស៊ើបសួរសាលាដំបូងរាជធានីភ្នំពេញ ។ តាមដីកាបង្គាប់ឲ្យចាប់ខ្លួនឈ្មោះ សួ ឈុនឡេង បានដាក់ឲ្យជនត្រូវចោទ ស្ថិតក្រោមការពិនិត្យពីបទ «រំលោភ.លើទំនុកចិត្ត» ដែលជននេះបានប្រព្រឹត្តនៅចំណុចរាជធានីភ្នំពេញ ក្នុងអំឡុងឆ្នាំ២០១៩ តាមបញ្ញាត្តិមាត្រា ៣៩១ និង មាត្រា ៣៩២ នៃក្រមព្រហ្មទណ្ឌ ។
បើតាមអង្គហេតុនៃការចាប់ខ្លួនជនសង្ស័យ ត្រូវបានប្រភពព័ត៌មានបង្ហើបឲ្យដឹងថា ក្នុងអំឡុងឆ្នាំ២០១៩ ឈ្មោះ សួ ឈុនឡេង បានខ្ចីប្រាក់ពីអ្នកដទៃជាបន្តបន្ទាប់ប្រមាណជាង៩ម៉ឺនដុល្លារអាមេរិក ដើម្បីយកទៅពង្រីកមុខរបររកស៊ី ។ បន្ទាប់មក មុខរបរទាំងឡាយនោះ មិនសមប្រកប ក៏បានផ្លាស់ប្តូរបើកហាងលក់គុយទាវវិញ ប៉ុន្តែមួយរយៈចុងក្រោយនេះ ប្រទេសកម្ពុជាក៏ដូចជាពិភពលោកបានជួបនូវវិបត្តិជំងឺរាតត្បាតកូវីដ.១៩ ធ្វើឲ្យសេដ្ឋកិច្ចធ្លាក់ដុនដាប រកចំណូលមិនបានសងទៅម្ចាស់ប្រាក់ ក៏បង្ខំចិត្តរត់គេចខ្លួនទៅក្រុងព្រះសីហនុ ទើបមានដីកាតាមចាប់ខ្លួនយ៉ាងដូច្នេះតែម្តង ៕
ចែករំលែកព័តមាននេះ