ខ្យល់កន្ត្រាក់! កញ្ចុះបណ្តែតទឹកអាងអូរខៃដនត្រូវប៉ើងដួលចូលទឹក ភ្ញៀវភ័យរត់ចែកជើងគ្នា
- បន្ទាយមានជ័យ
ភ្លៀងលាយឡំដោយខ្យល់កន្ត្រាក់ បានបណ្តាលខ្យូសបណ្តែតទឹកនៅអាងអូរខៃដន ត្រូវបានប៉ើងដួលចូលទឹកអស់ចំនួន
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ភ្លៀងលាយឡំដោយខ្យល់កន្ត្រាក់ បានបណ្តាលខ្យូសបណ្តែតទឹកនៅអាងអូរខៃដន ត្រូវបានប៉ើងដួលចូលទឹកអស់ចំនួន៨ខ្យូស ដែលបង្កឱ្យមានភ្ញាក់ផ្អើលកាលពីវេលាម៉ោង៥និង៣០នាទីល្ងាច ថ្ងៃទី១៥ ខែឧសភា ឆ្នាំ២០២២ ស្ថិតនៅភូមិកូនដំរី សង្កាត់និមិត្ត ក្រុងប៉ោយប៉ែត។
បើតាមអាជីវករជាម្ចាស់ខ្យូសបានប្រាប់ឱ្យដឹងថា នៅពេលល្ងាច គឺមានភ្ញៀវមានជាលក្ខណៈគ្រួសារ និងនាំមិត្តភក្តិទៅលេងកម្សាន្ត ព្រមទាំងហូបអាហារនៅក្នុងខ្យូស ដើម្បីមើលទេសភាព ហើយស្រូបយកខ្យល់អាកាសពីអាងអូរខៃដូន ពេលស្រាប់តែមានភ្លៀងធ្លាក់១មេយ៉ាងធំ ហើយក៏មានលាយលំដោយខ្យល់កន្ត្រាក់ បណ្តាលខ្យូសបណ្តែតទឹកដែលមានភ្ញៀវអង្គុយលេងបានប៉ើងដួលចូលទៅក្នុងទឹក និងស្ពានដែលឆ្លងទៅរកខ្យូសបណ្តែកក្នុងទឹកនោះ ក៏ត្រូវបាក់ទៀត ធ្វើឱ្យភ្ញៀវមានការតក់ស្លត់ភ័យខ្លាចរត់ចែកជើងគ្នាតែម្តង។
អាជីវកររូបនោះបានបញ្ជាក់ថា ក្រោយពេលដែលកើតមានខ្យល់កន្ត្រាក់ បណ្តាលប៉ើង និងដួលខ្យូសបណ្តែតទឹកចូលទៅក្នុងទឹក បណ្តាលខូចខាតចំនួន៨ខ្យូស និងបាក់ស្ពានឆ្លងទៅរកខ្យូសបណ្តែត តែសំណាងគ្មានភ្ញៀវណាម្នាក់រងគ្រោះនោះទេ គ្រាន់តែធ្វើអោយខូចខាតសម្ភារៈមួយចំនួន ។ ហើយទោះបីជាមានភ្លៀងលាយឡំជាមួយនឹងខ្យល់កន្ត្រាក់ បណ្តាលប៉ះពាល់ខូចខាតខ្យូសបណ្តែតទឹកក៏ដោយ ក៏ឃើញមានភ្ញៀវបន្តនៅលេងដដែល។
អាជីវករជាម្ចាស់ខ្យូសបណ្តែតទឹកបានបញ្ជាក់ថា កន្លងមក មិនដែលជាប្រទះ ឬរងគ្រោះដោយសារខ្យល់កន្ត្រាក់ ដែលបំផ្លាញខ្យូសបណ្តែតទឹកនៅអាងអូរខៃដន ក្រុងប៉ោយប៉ែតនោះទេ ទើបតែឆ្នាំនេះ ស្រាប់តែមានភ្លៀងលាយឡំដោយខ្យល់កន្ត្រាក់ បណ្តាលប៉ះពាល់ខ្យូសប៉ើងដួលចូលទៅក្នុងទឹកធ្វើឱ្យខូចខាតអស់ចំនួន៨ខ្យូស និងស្ពាន១សម្រាប់ឆ្លងទៅខ្យូសបណ្តែតទឹក ក៏ត្រូវបានបាក់ទៀត៕
ចែករំលែកព័តមាននេះ