ខេត្តកំពង់ចាម ៖ ទីតាំងសង្វៀនបញ្ជល់មាន់ និងវង់អាប៉ោង បានលួចបើកលេងដោយខុសច្បាប់នៅក្នុងព្រៃមួយកន្លែង ក្នុងឃុំថ្មពូន ស្រុកព្រៃឈរ។ ដោយគេសង្កេតឃើញមានការភ្នាល់ដាក់លុយលេងធំៗ ហើយប្រជាពលរដ្ឋកំពុងតែព្រួយបារម្ភខ្លាចមានអំពើចោរកម្ម និងបទល្មើសផ្សេងៗកើតឡើង។
តាមប្រភពពីប្រជាពលរដ្ឋនៅមូលដ្ឋានឱ្យដឹងនៅព្រឹកថ្ងៃទី១៤ ខែឧសភា ឆ្នាំ២០២២ នេះថា ទីតាំង ដែលគេលួចបើកលេងល្បែងបញ្ជល់មាន់ដោយខុសច្បាប់នៅថ្មពូននេះ ពីមុនស្ងាត់ នៅពេលមានល្បែងកើតឡើងជារៀងរាល់ថ្ងៃ គេឃើញមានម៉ូតូ និងរថយន្តបើកមកពីស្រុកឆ្ងាយ នាំគ្នាមកចូលលេងល្បែងបញ្ជល់មាន់ ថែមទាំងឮសូរសម្លេងសើចហ៊ោកញ្ច្រៀវទៀតផង។ សកម្មភាពមនុស្សពពាក់ពពូនមកពីគ្រប់ទិសទី កាលណាមានល្បែងកើតឡើង អ្នកភូមិព្រួយបារម្ភខ្លាចបាត់គោក្របី និងខ្លាចកើតចោរ។
ប្រភពដដែលបន្តអោយដឹងទៀតថា ពួកគាត់មានការព្រួយបារម្ភខ្លាចកូនចៅអ្នកភូមិទៅលេងល្បែងអស់លុយ លុះអស់ហើយក៏កើតមានជម្លោះក្នុងក្រុមគ្រួសារ បង្កឲ្យមានអំពើហិ.ង្សាកើតឡើងដែលចៀសមិនផុត។ ហើយក្នុងគោលនយោបាយភូមិ-ឃុំមានសុវត្ថិភាពរបស់ក្រសួងមហាផ្ទៃ គឺមិនអនុញ្ញាតឲ្យមានបើកលេងល្បែងស៊ីសង ដោយខុសច្បាប់បែបនេះឡើយ។
អ្នកលេងល្បែងបានបង្ហើបឲ្យដឹងថា សម្រាប់ទីតាំងនៅថ្មពូននេះ គឺបានដំណើរការលេងជាច្រើនថ្ងៃមកហើយ ដោយរលូនមិនមានការបង្ក្រាបណាមួយនោះទេ។ ហើយម្ចាស់សង្វៀនបញ្ជល់មាន់ដ៏ធំមួយកន្លែងនេះ គឺមានឧកញ៉ា ហាច ជាអ្នកកាងនៅទីនោះ ទំនងជាគេសែនព្រេនត្រូវអស់ហើយ ទើបដំណើរការបានដោយរលូនយ៉ាងដូច្នេះ។
សមត្ថកិច្ចមូលដ្ឋានបញ្ជាក់ថា ស្របពេលដែលទីតាំងបញ្ជល់មាន់នេះ បានបើកលេងបាន៤ថ្ងៃ ត្រូវបានកម្លាំងសមត្ថកិច្ចចុះបង្ក្រាបធ្វើឲ្យក្រុមអ្នកញៀ.នល្បែងនាំគ្នារត់បាតជើងសព្រាតគេចខ្លួនបាត់អស់។ លុះពេលសមត្ថកិច្ចដកថយ ក្រុមញៀ.នល្បែងនោះបានលួចបើកលេងឡើងវិញ ដូចគេវែកចក ឬដេញឱ្យតែល្អមើល កុំឱ្យចោទថា មិនលុបបំបាត់… ហេ!ហេ!
គួររំលឹកថា ឯកឧត្តម អ៊ុន ចាន់ដា អភិបាលខេត្ត តែងតែមានប្រសាសន៍ចុះសំណេះសំណាលជាមួយនឹងប្រជាពលរដ្ឋនៅតាមបណ្ដាស្រុកនានា គឺមិនអនុញ្ញាតឲ្យបើកលេងល្បែងបញ្ជល់មាន់នោះទេ បើសិនជាមាននៅទីតាំងណាមួយ សមត្ថកិច្ចត្រូវតែបង្ក្រាបឲ្យបានទាន់ពេលវេលា៕
ចែករំលែកព័តមាននេះ