ខេត្តសៀមរាប ៖ កម្លាំងចំណុះនៃអធិការដ្ឋាននគរបាលស្រុកសូទ្រនិគម ព្រមទាំងកម្លាំងប្រជាការពារ បានចុះធ្វើការស្រាវជ្រាវឃាត់ខ្លួនបានក្រុមក្មេងស្ទាវក្រុមអាយុ១៥ឆ្នាំ ដែលលួចកាបូបលុយរបស់ប្រជាពលរដ្ឋមានដាក់គ្រឿងអលង្ការ និងប្រាក់មានតម្លៃសរុបជាទឹកប្រាក់ប្រហែល ៦០០០ដុល្លារអាមេរិក យកមកសួរនាំនៅអធិការដ្ឋាននគរបាលស្រុក រួចកសាងសំណុំរឿងបញ្ជូនខ្លួនបន្តទៅការិយាល័យនគរបាលជំនាញខេត្តសៀមរាប។
ហេតុការណ៍ឃាត់ខ្លួនក្រុមក្មេងស្ទាវនេះ ធ្វើឡើងនៅល្ងាច ថ្ងៃទី១២ ខែឧសភា ឆ្នាំ២០២២ ស្ថិតនៅក្នុងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប។
បើតាមប្រសាសន៍របស់លោកវរសេនីយ៍ ទោ ឃីម ផល្លា អធិការនគរបាលស្រុកសូទ្រនិគម បានប្រាប់តាមទូរស័ព្ទនៅវេលាម៉ោង៤និង៣០នាទីរសៀលថ្ងៃទី១៣ ខែឧសភា ឆ្នាំ២០២២ នេះថា ដោយកិច្ចប្រតិបត្តិការនេះ សម្របសម្រួលនីតិវិធីដោយលោកព្រះរាជអាជ្ញា ទើបកម្លាំងយើងបានឈានដល់ធ្វើការឃាត់ខ្លួនជនសង្ស័យបានចំនួន០៣នាក់មានដូចជា ៖
១- យុវជនអាយុ១៧ឆ្នាំ ទីកន្លែងកំណើត និងអាសយដ្ឋាន បច្ចុប្ប្នន្ននៅភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាម ។ ២- យុវជនអាយុ១៥ឆ្នាំ ទីកន្លែងកំណើត និងអាសយដ្ឋាន បច្ចុប្បន្ននៅភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប និង៣- យុវជនអាយុ១៦ ឆ្នាំ ទីកន្លែងកំណើត និងអាសយដ្ឋាន បច្ចុប្ប្នន្ននៅភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប ។
បើយោងតាមពាក្យបណ្តឹងរបស់ជនរងគ្រោះឈ្មោះ គាន ឃឹម ភេទស្រី អាយុ៤៤ឆ្នាំ មុខរបរ កសិករ រស់នៅភូមិប្រវ៉ាល ឃុតាយ៉ែក ស្រុកសូទ្រនិគម ខេត្តសៀមរាប បានរៀបរាប់ប្រាប់សមត្ថកិច្ចឱ្យយើងដឹងថា នៅថ្ងៃទី១០ ខែឧសភា ឆ្នាំ២០២២ វេលាម៉ោង១២និង០០នាទីថ្ងៃត្រង់ ខ្លួនបានដកយកលុយពីកាបូបស្ពាយចំនួន៥ម៉ឺនរៀលទៅស៊ីការគេនៅភូមិត្រពាំងត្រាវ ឃុំពពេល ស្រុកសូទ្រនិគម ខេត្តសៀមរាប រួចក៏ទុកកាបូបនោះ ដែលមានទាំងគ្រឿងអលង្ការ និងប្រាក់ នៅលើគ្រែក្រោមផ្ទះ ហើយក៏គេងលក់ទៅ ។
ប្រភពដដែលបន្តថា លុះរហូតដល់ព្រឹកឡើងឈានចូលថ្ងៃទី១១ ខែឧសភា ឆ្នាំ២០២២ វេលាម៉ោង០៥និង០០នាទីព្រឹក ខ្លួនក្រោកពីដេករកមើលកាបូប ស្រាប់តែបាត់ ហើយបានសួរនាំគ្នីគ្នា តែគ្មានអ្នកដឹង និងឃើញទេ ដូច្នេះខ្លួនក៏សម្រេចចិត្តទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលតាយ៉ែកតែម្តង ។
ក្រោយទទួលបានការរាយកាណ៍ និងពាក្យបណ្តឹងរបស់ជនរងគ្រោះ កម្លាំងព្រហ្មទណ្ឌនៃអធិការដ្ឋានស្រុក សហការជាមួយកម្លាំងប៉ុស្តិ៍នគរបាលរដ្ឋបាលតាយ៉ែក ប៉ុស្តិ៍នគរបាលរដ្ឋបាលសំរោង ព្រមទាំងកម្លាំងប្រជាការពារ ដឹកនាំដោយលោក វរសេនីយ៍ទោ ឃីម ផល្លា អធិការនគរបាលស្រុកសូទ្រនិគម ចុះទៅកន្លែងកើតហេតុ ធ្វើការស្រាវជ្រាវ និងបានកំណត់មុខសញ្ញា រហូតឈានដល់ឃាត់ខ្លួនបានជនសង្ស័យបានចំនួន០៣នាក់ យកមកសាកសួរនៅអធិការដ្ឋាន ។
លោកបានបញ្ជាក់ថា បន្ទាប់ពីសួរនាំរួចជនសង្ស័យទាំង៣នាក់ បានឆ្លើយសារភាពនៅចំពោះ មុខសមត្ថកិច្ចថា «ពួកខ្លួនពិតជាបានចូលលួចកាបូបនោះ ដែលដាក់លើគ្រែក្រោមផ្ទះពិតប្រាកដមែន ។ ហើយធ្វើសកម្មភាពលួចនៅម៉ោង១២រំលងអធ្រាត្យឈានចូលថ្ងៃទី១១ ខែ ឧសភា ឆ្នាំ២០២២ ស្ថិតនៅចំណុចភូមិ-ឃុំខាងលើ។ ហើយផែនការរបស់ពួកគេ បើពេលលួចម្ចាស់ងើបទាន់ ពួកគេនឹងកា.ប់សម្លា.ប់តែម្ដង» ។
គួរបញ្ជាក់ថា ករណីខាងលើនេះ សមត្ថកិច្ចបានដកហូតសម្ភារៈវត្ថុតាង ដែលជនសង្ស័យលួច និងធ្វើកំណត់ហេតុប្រគល់ទទួលជូនជនរងគ្រោះវិញអស់ហើយ។
គួរបញ្ជាក់ទៀតថា កម្លាំងអធិការដ្ឋាននគរបាលស្រុកសូទ្រនិគម បានរៀបចំកសាងសំណុំរឿង និងបញ្ជូនខ្លួនជនសង្ស័យទាំង០៣នាក់ ទៅការិយាល័យជំនាញខេត្ត ដើម្បីកសាងសំណុំរឿងបន្តទៅតុលាការចាត់ការទៅនីតិវិធីតាមផ្លូវច្បាប់ ៕
ចែករំលែកព័តមាននេះ