រាជធានីភ្នំពេញ ៖ បុរសម្នាក់ស្រវឹងស្រាជិះម៉ូតូរេចង្កូតឡើងលើចិញ្ចើមផ្លូវជ្រុលទៅបុកទូកញ្ចក់ដាក់តាំងលក់គ្រឿងម្ជូរបណ្តាលឲ្យបែក ហើយម៉ូតូផ្លោងទៅបុកនឹងរទេះលក់ដូង …
រាជធានីភ្នំពេញ ៖ បុរសម្នាក់ស្រវឹងស្រាជិះម៉ូតូរេចង្កូតឡើងលើចិញ្ចើមផ្លូវជ្រុលទៅបុកទូកញ្ចក់ដាក់តាំងលក់គ្រឿងម្ជូរបណ្តាលឲ្យបែក ហើយម៉ូតូផ្លោងទៅបុកនឹងរទេះលក់ដូងបណ្តាលឲ្យដួលរងរបួសធ្ងន់ ។ ហេតុការណ៍នោះកើតឡើងកាលពីវេលាម៉ោង៩ និង៥០នាទីយប់ ថ្ងៃទី២១ ខែតុលា ឆ្នាំ២០១៦ តាមបណ្តោយផ្លូវលេខ២០១១ ភូមិតាងួន សង្កាត់កាកាប ខណ្ឌពោធិ៍សែនជ័យ ។
ជនរងគ្រោះមិនបានស្គាល់អត្តសញ្ញាណជិះម៉ូតូម៉ាកវ៉េវ ពណ៌ខ្មៅ ពាក់ស្លាកលេខ ភ្នំពេញ 1GA-9754 ម្នាក់ឯងក្នុងទិសដៅពីជើងទៅត្បូងយ៉ាងលឿន ។
តាមសម្តីស្ត្រីជាអ្នកលក់ម្ជូរនៅកន្លែងកើតហេតុសុំមិនបញ្ចេញឈ្មោះបាននិយាយថា មុនពេលកើតហេតុរូបគាត់កំពុងប្រមូលគ្រឿងម្ជូរយកទៅទុកឈប់លក់ដូរព្រោះយប់ជ្រៅហើយ ខណៈពេលកំពុងតែឈរប្រមូលស្រាប់តែឃើញម៉ូតូខាងលើបានបើកយ៉ាងលឿនរេចង្កូតឡើងលើចិញ្ចើមផ្លូវទៅបុកទូលក់ម្ជូររបស់គាត់បណ្តាលឲ្យបែកកញ្ចក់ខ្ទេចខ្ទីអស់ ហើយម៉ូតូផ្លោងទៅបុករ៉ឺម៉កលក់ដូងចតនៅក្បែរនោះ បណ្ដាលឲ្យអ្នកបើកដួលបែកមុខបែកមាត់របួសពេញខ្លួនសន្លប់ស្តូកស្តឹង ចំណែកអ្នកលក់ម្ជូរ និងអ្នកលក់ដូងមិនមានរងរបួសទេ ។
ទន្ទឹមនឹងគ្រោះថ្នាក់ចរាចរណ៍នេះកើតឡើង ធ្វើឲ្យប្រជាពលរដ្ឋដែលធ្វើដំណើរឆ្លងកាត់ប្រទះឃើញ ហើយបានលើកឡើងថា នៅលើកំណាត់ផ្លូវនេះសំបូរទៅដោយអ្នកលក់ដូរនៅតាមចិញ្ចើមផ្លូវហៀរលើផ្លូវធ្វើឲ្យកកស្ទះចរាចរណ៍ពិបាកធ្វើដំណើរជារៀងរាល់ព្រឹក ។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះរបស់គ្លីនិកហុងហាក់ដឹកយកទៅព្យាបាល ចំណែកម៉ូតូត្រូវបានសមត្ថកិច្ចខណ្ឌពោធិ៍សែនជ័យយករក្សាទុកដើម្បីរង់ចាំការដោះស្រាយថ្ងៃក្រោយ ៕
ចែករំលែកព័តមាននេះ