ខេត្តតាកែវ ៖ ទីតាំងបើកលេងបាល់ទះចាក់ភ្នាល់លុយគ្នាខុសច្បាប់មួយកន្លែង ដែលស្ថិតនៅភូមិថ្នល់បែក សង្កាត់រកាក្រៅ ក្រុងដូនកែវ ត្រូវប្រជាពលរដ្ឋរស់នៅទីនោះនិយាយថា ទីតាំងនេះគេបានបើកលេងរយៈពេលជាង១ខែមកហើយ ដោយក្នុង១សិត ភ្នាល់គ្នា ចាប់ពី៥០ម៉ឺនរៀល ទៅ២លានរៀល តែបែរជាគ្មានសមត្ថកិច្ច និងអាជ្ញាធរណាខ្វល់ឡើយ ប្រហែលជាយល់ថា លេងបាល់ទះ នាំមកនូវសុខភាព តែមិនបានគិតថា ល្បែងភ្នាល់យ៉ាងស៊ីសាច់ហុតឈាមគ្នានោះទេ។
ប្រភពព័ត៌មានពីទីតាំងបាល់ទះបានប្រាប់កោះសន្តិភាពឱ្យដឹងថា ជារៀងរាល់ថ្ងៃ មនុស្សទាំងក្មេង ចាស់ ប្រុស ស្រីបាននាំគ្នាមកចោមរោមទស្សនាយ៉ាងកកកុញ មានម៉ូតូ រថយន្តពេញថ្នល់ ដែលអ្នកចូលប្រកួតសុទ្ធតែជាជើងខ្លាំងមកពីភ្នំពេញ មិនដឹងជាកីឡាករអាជីព ឬបែបណានោះទេ ប្រកួតជាមួយជើងខ្លាំងមកពីស្រុកយួន ដោយមួយសិត៥០ម៉ឺនរៀល។ បើគូណាដែលចាញ់ គេបក១លានរៀល តែបើគូឈ្នះមុនចាញ់វិញ នោះគេបកវិញម្តង១លានកន្លះទៅ២លានរៀល ធ្វើឱ្យម្ចាស់ទីតាំងយកតុងបានលុយមិនតិចទេ ក្នុងមួយថ្ងៃៗ។ មិនតែប៉ុណ្ណោះ អ្នកដែលចូលទៅទស្សនាបានភ្នាល់គ្នាដាក់លុយយ៉ាងគគ្រឹកគគ្រេងថែមទៀត។ ការប្រកួតបាល់ទះនេះ តាមក្រឹត្យក្រមកីឡាករគឺម្ខាង៦នាក់ តែការប្រកួតដាក់លុយភ្នាល់នេះស្រេចលើភាគីសងខាងព្រមព្រៀងគ្នា។
ប្រភពដដែលបានបន្តថា អ្នកភ្នាល់គ្នាមានអ្នកខ្លះ អស់ទាំងលុយ ម៉ូតូ ទូរស័ព្ទដៃ។ ឯអ្នកមើលត្រូវបានជនឆក់ឱកាសលួចយកកង់ និងម៉ូតូបាត់ជាញឹកញាប់ ហើយការបាត់បង់នៅកន្លែងទីតាំងលេងបាល់ទះខុសច្បាប់នេះ សមត្ថកិច្ចមិនដែលរកឃើញម្តងណាទេ។ ប្រជាពលរដ្ឋរស់នៅក្បែរទីតាំងនោះបានសំណូមពរដល់សមត្ថកិច្ច និងអាជ្ញាធរក្រុងដូនកែវ មេត្តាបង្ក្រាបទីតាំងលេងបាល់ទះខាងលើនេះផង ព្រោះជាល្បែងស៊ីសងដ៏ធំប្រចាំក្រុងដូនកែវ ដែលបានកើតមានរយៈពេលជាង១ខែមកហើយ។ ការសាកសួរទៅដល់មន្ត្រីក្រុងឱ្យដឹងថា ទីលានលេងបាល់ភ្នាល់នេះ នឹងតំរូវឱ្យបិទ៕
ចែករំលែកព័តមាននេះ