ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា មានករណីប៉ុនប៉ងមនុស្សឃា.តមួយបានកើតឡើង ដែលជនបង្កត្រូវបានគេស្គាល់ថា ជាមន្ត្រីនគរបាល០១រូបទើបនឹងពាក់ស័ក្តិ៤កន្លះ មានឋានៈ ជានាយរងការិយាល័យកិច្ចការផ្ទៃក្នុងក្រសួងមហាផ្ទៃ ដោយគ្រាន់តែសត្វក្របីចូលស៊ីស្មៅក្នុងដីរបស់ខ្លួន ក៏ទាញកាំភ្លើងបា.ញ់ប្រហារទៅអ្នកមើលក្របីឱ្យគេ បណ្តាលឱ្យឲ្យរងរបួសធ្ងន់ រួចក៏រត់គេចខ្លួនបាត់ស្រមោល ។ ករណីហិ.ង្សាដោយចេតនានេះ បានកើតឡើងនៅវេលាម៉ោង០១និង៣៥នាទីរសៀល ថ្ងៃទី០៧ ខែឧសភា ឆ្នាំ២០២២ នៅចំណុចដីចាក់មួយកន្លែង ស្ថិតក្នុងភូមិអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នេះបើតាមការឲ្យដឹងពីនគរបាលស្រុអូរជ្រៅ ។
នគរបាលស្រុកអូរជ្រៅ បានឲ្យដឹងទៀតថា ៖ ជនបង្កខាងលើមានឈ្មោះ រ៉ា ទឹមច័ន្ទពិសី អាយុ៤២ឆ្នាំ ភេទប្រុស មានឋានន្តរស័ក្តិវរៈសេនីយ៍ទោ ជានាយរងការិយាល័យកិច្ចការផ្ទៃក្នុងក្រសួងមហាផ្ទៃ មកស្នាក់នៅបណ្តោះអាសន្ននៅក្នុងភូមិអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ ចំណែកជនរងគ្រោះវិញមានឈ្មោះ ឃាង វណ្ណា អាយុ៥៥ឆ្នាំ ភេទប្រុស រស់នៅភូមិថ្នលបត់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ជាអ្នកស៊ីឈ្នួលមើលសត្វក្របីឲ្យគេប្រហែលជា១០០ក្បាល ។
នគរបាលខាងលើបានបញ្ជាក់ថា នៅមុនពេលកើតហេតុ ក្របីដែលជនរងគ្រោះឃ្វាលនោះ បានចូលទៅស៊ីស្មៅក្នុងដីរបស់ជនបង្ក នៅពេលនោះជនបង្កជាម្ចាស់ដីបានប្រាប់ឲ្យជនរងគ្រោះដេញក្របីចេញពីក្នុងដីរបស់ខ្លួន កុំឲ្យស៊ីស្មៅ ព្រោះស្មៅនោះទុកឲ្យសត្វពពែរបស់គេស៊ី បន្ទាប់មកជនរងគ្រោះក៏បានទៅដេញក្របីឲ្យចេញ រួចក៏អង្គុយលេងជាមួយទាហាននៅក្បែរកន្លែងនោះ ហើយមិនដឹងជាយ៉ាងម៉េចនោះ ជនបង្ក ក៏បានទាញកាំភ្លើងម៉ាកវាំងឡុង (ជាប្រភេទកាំភ្លើងបា.ញ់សត្វ) បានបា.ញ់ទៅលើជនរងគ្រោះចំនួន១គ្រាប់ ត្រូវចំកំភួនជើងខាងឆ្វេង បណ្តាលឲ្យរងរបួសធ្ងន់ ក្រោយពីធ្វើសកម្មភាពរួច ជនសង្ស័យក៏រត់គេចខ្លួនបាត់ស្រមោលតែម្តង។ ចំណែកឯជនរងគ្រោះក៏ត្រូវបានយកទៅព្យាបាលនៅមណ្ឌលសុខភាពអូរបីជាន់ផងដែរ ។
គួរបញ្ជាក់ថា ករណីខាងលើនេះ ជនបង្កកំពុងតែត្រូវបានកម្លាំងនគរបាលស្រុកអូរជ្រៅ តាមប្រមាញ់ចាប់ខ្លួនយកទៅផ្តន្ទាទោសតាមនីតិវិធីច្បាប់ហើយ៕
ចែករំលែកព័តមាននេះ