បុរសម្នាក់បានជិះកង់១គ្រឿងកាត់មុខផ្ទះមួយកន្លែង ហើយក៏បានប្រទះឃើញម៉ូតូ១គ្រឿងដែលម្ចាស់គេចតទុកមុខផ្ទះនោះ ដោយពុំបានដកសោចេញ ក្រោយពេលឃើញឱកាសល្អបែបនេះ បុរសរូបនេះក៏
រាជធានីភ្នំពេញ ៖ បុរសម្នាក់បានជិះកង់១គ្រឿងកាត់មុខផ្ទះមួយកន្លែង ហើយក៏បានប្រទះឃើញម៉ូតូ១គ្រឿងដែលម្ចាស់គេចតទុកមុខផ្ទះនោះ ដោយពុំបានដកសោចេញ ក្រោយពេលឃើញឱកាសល្អបែបនេះ បុរសរូបនេះក៏បានធ្វើសកម្មភាពលួច ក្នុងបំណងជិះចេញរត់គេចខ្លួន។ ប៉ុន្តែសំណាងអាក្រក់ ម្ចាស់ម៉ូតូឃើញទាន់ក៏ស្រែកឆោឡោបង្កឱ្យមានការភ្ញាក់ផ្អើល និងចាប់ខ្លួនបាន រួចប្រគល់ជូននគរបាលនាំទៅសាកសួរ និងកសាងសំណុំរឿងចាត់ការតាមច្បាប់តែម្ដង។ ហេតុការណ៍នេះ កើតឡើងកាលពីវេលាម៉ោង១និង១៥នាទីរសៀល ថ្ងៃទី៥ ខែឧសភា ឆ្នាំ២០២២ ស្ថិតនៅក្នុងភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ។
បើតាមប្រភពព័ត៌មានបានឲ្យដឹងថា បុរសជាជនសង្ស័យខាងលើមានឈ្មោះ ហែល ផាត់យុទ្ធ អាយុ៣២ឆ្នាំ មុខរបរមិនពិតប្រាកដ ស្នាក់នៅភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ បានធ្វើសកម្មភាពលួចម៉ូតូម៉ាកស៊ុយហ្ស៊ុយគីឡេត ពណ៌ស ស៊េរី២០១៨ ពាក់ស្លាកលេខភ្នំពេញ 1HS-9520 ជាកម្មសិទ្ធិរបស់ឈ្មោះ ជឿន រចនា ភេទប្រុសអាយុ៣៦ឆ្នាំ មានទីលំនៅក្នុងភូមិកើតហេតុខាងលើ និងមានស្រុកកំណើតនៅភូមិគ្រួស ឃុំគ្រួស ស្រុកស្វាយជ្រុំ ខេត្តស្វាយរៀង។
ប្រភពដដែលបានបន្តថា នៅមុនពេលកើតហេតុ ក្រោយពេលត្រឡប់មកពីទិញអីវ៉ាន់នៅផ្សារវិញ ម្ចាស់ម៉ូតូបានចតម៉ូតូទុកនៅមុខផ្ទះ ដោយមិនបានដកសោរចេញឡើយ។ បន្ទាប់មកក៏បានដើរចូលទៅក្នុងផ្ទះដើម្បីយកអីវ៉ាន់ទៅទុក ។ លុះរយៈពេលប្រមាណ៣នាទីក្រោយមក ក៏ស្រាប់តែឃើញជនសង្ស័យខាងលើ ជិះកង់ទៅឈប់ជិតនោះ បន្ទាប់មកទៀតក៏បានឡើងជិះម៉ូតូរបស់ជនរងគ្រោះក្នុងបំណងគេចខ្លួន ហើយក៏ត្រូវម្ចាស់បានស្រែកឆោឡោថា «ចោរៗ» បង្កឲ្យមានការផ្អើល ខណៈពេលនោះអ្នកជិតខាងក៏បានចេញមកជួយដេញចាប់បានភ្លាមៗ រួចប្រគល់ឱ្យនគរបាលខណ្ឌកំបូល ដើម្បីសាកសួរ និងចាត់ការតាមច្បាប់តែម្ដង៕
ចែករំលែកព័តមាននេះ