ខេត្តមណ្ឌលគិរី ៖ សមត្ថកិច្ចចម្រុះចុះបង្ក្រាបរថយន្តដឹកបទល្មើសព្រៃឈើចំនួន៤គ្រឿង ក្រោយធ្វើសកម្មភាពដឹកជញ្ជូនឈើចេញពីព្រៃអភិរក្ស ដែលប្រតិបត្តិការនេះ ធ្វើឡើងកាលពីយប់ថ្ងៃទី០២ ឈានចូលថ្ងៃទី០៣ ឧសភា ២០២១ ។
សេចក្តីរាយការណ៍បានឲ្យដឹងថា កម្លាំងសមត្ថកិច្ចស្នាក់ការរងដើមចំបក់ បានធ្វើការចុះល្បាត សហការជាមួយផែនប្រឆាំងបទល្មើសសេដ្ឋកិច្ចក្នុងដែនជម្រកសត្វព្រៃកែវសីមា ជាលទ្ធផលចាប់ឃាត់រថយន្តកែច្នៃចំនួន០៤
គ្រឿង នៅចំណុចផ្លូវបំបែកគូសនិយាមការ៦៧១៣៣៩.១៣៨០៣៣៣ ស្ថិតក្នុងភូមិព្រះ ឃុំស្រែឈូក ស្រុកកែវសីមា ខេត្ដមណ្ឌលគិរី ។
សេចក្តីរាយការណ៍បន្តថា ម្ចាស់រថយន្ដបានរត់គេចខ្លួនបាត់ ចំណែកវត្ថុតាងរថយន្ដកែច្នៃ ពណ៌ខ្មៅ គ្មានស្លាក
លេខចង្កូតឆ្វេង (ប៉ាកុងចំនួន០២គ្រឿង) និងរថយន្ដកែច្នៃពណ៌.ស ចង្កូតឆ្វេង គ្មានស្លាក(សាំងយ៉ុងចំនួន០២គ្រឿង) ឈើសុក្រំ ឡាំងប្រាំបីជ្រុង ១៩ដើម ត្រូវបានយកទៅរក្សាទុកនៅស្នាក់ការរងដើមចំបក់ ។
ព័ត៌មានបន្ថែមនឹងមានផ្សាយជូនបន្តលើទំព័រកាសែតកោះសន្តិភាព ។
ចែករំលែកព័តមាននេះ