ភ្នំពេញ៖ ក្នុងអំឡុងពេលកូវីដ១៩ ឆ្លងរាតត្បាត ចាប់តាំងពីឆ្នាំ២០២០ បន្តដល់ឆ្នាំ២០២២ នេះ រាជរដ្ឋាភិបាល ចំណាយជាង ២៨លានដុល្លារ បើកផ្តល់ប្រាក់ឧបត្ថម្ភដល់កម្មករនិយោជិតកាត់ដេរ…
ភ្នំពេញ៖ ក្នុងអំឡុងពេលកូវីដ១៩ ឆ្លងរាតត្បាត ចាប់តាំងពីឆ្នាំ២០២០ បន្តដល់ឆ្នាំ២០២២ នេះ រាជរដ្ឋាភិបាល ចំណាយជាង ២៨លានដុល្លារ បើកផ្តល់ប្រាក់ឧបត្ថម្ភដល់កម្មករនិយោជិតកាត់ដេរ និងវិស័យទេសចរណ៍ ដែលព្យួរការងារ។
សារលិខិត ក្នុងឱកាសខួបអនុស្សាវរីយ៍ លើកទី១៣៦ នៃទិវាពលកម្មអន្តរជាតិ ថ្ងៃទី១ ខែឧសភា ឆ្នាំ២០២២ សម្តេចតេជោ ហ៊ុន សែន លើកឡើងថា ដើម្បីធ្វើការឆ្លើយតបទៅនឹងវិបត្តិនៃជំងឺកូវីដ១៩ រាជរដ្ឋាភិបាល បានដាក់ចេញ និងអនុវត្តប្រកបដោយជោគជ័យនូវកញ្ចប់វិធានការរបស់រាជរដ្ឋាភិបាល ចំនួន ១០ជុំ ដោយបានបើកផ្តល់ប្រាក់ឧបត្ថម្ភដល់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប និងវិស័យទេសចរណ៍ ដែលព្យួរកិច្ចសន្យាការងារ ដោយសារជំងឺកូវីដ១៩ សរុបចំនួន ៣៤៧ ៨៤៤នាក់ ស្មើនឹងថវិកាប្រមាណ ១១៤,៦ប៊ីលានរៀល ( ស្មើប្រមាណជាង ២៨លានដុល្លារអាមេរិក ) ព្រមទាំងបានផ្តល់វគ្គបណ្តុះបណ្តាលជំនាញទន់ផងដែរ។
សារលិខិតដដែល បន្តថា ដើម្បីរក្សាលំនឹងជីវភាពរស់នៅសម្រាប់គ្រួសារក្រីក្រ និងងាយរងគ្រោះ រាជរដ្ឋាភិបាល បានចេញអនុក្រឹត្យ ស្តីពី ការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ១៩ ដែលអនុវត្តចំពោះគ្រួសារក្រីក្រ ងាយរងគ្រោះ និងស្ត្រីសម្រាលកូន ផងដែរ ដោយប្រើប្រាស់បណ្ណសមធម៌នៃព្រះរាជាណាចក្រកម្ពុជា។
សារលិខិត បន្ថែមថា ក្នុងអំឡុងពេលកូវីដ រាជរដ្ឋាភិបាល តាមរយៈក្រសួងការងារ ក៏បានប្រមូលចុះឈ្មោះអ្នកស្វែងរកការងារចំនួន ៤៨២៣នាក់ បានផ្សព្វផ្សាយព័ត៌មានអំពីឱកាសការងារ ចំនួន ១៣ ៩១៣នាក់ និងជួយស្វែងរកការងារធ្វើជូនប្រជាពលរដ្ឋ តាមមូលដ្ឋានភូមិឃុំ និងតាមរយៈវេទិកាការងារ ដែលរៀបចំដោយទីភ្នាក់ងារជាតិមុខរបរ និងការងារ និងកម្មវិធីអប់រំបណ្តុះបណ្តាលបច្ចេកទេស និងវិជ្ជាជីវៈ ព្រមទាំងតាមរយៈទីភ្នាក់ងារជ្រើសរើសឯកជនស្របច្បាប់។
សូមរម្លឹកថា នៅប៉ុន្មានខែចុងក្រោយនេះ ដោយសារតែស្ថានភាពកូវីដ១៩ បានធូរស្រាល ហើយកម្ពុជាយើង បានបើកប្រទេសឡើងវិញលើគ្រប់វិស័យ ចាប់តាំងពីថ្ងៃទី១ ខែវិច្ឆិកា ឆ្នាំ២០២១ គឺរាជរដ្ឋាភិបាល ឈប់ផ្តល់ប្រាក់ឧបត្ថម្ភដល់កម្មករនិយោជិត ក្នុងវិស័យកាត់ដេរទៀតហើយ។ ប៉ុន្តែសម្រាប់កម្មករនិយោជិត ក្នុងវិស័យទេសចរណ៍ គឺរាជរដ្ឋភិបាល នៅបន្តផ្តល់ប្រាក់ឧបត្ថម្ភដដែល រហូតដល់ខែមេសា ឆ្នាំ២០២២ នេះ៕
ចែករំលែកព័តមាននេះ