រាជធានីភ្នំពេញ ៖ នាយកដ្ឋាននគរបាលព្រហ្មទណ្ឌក្រសួងមហាផ្ទៃ បានធ្វើការឆ្លើយតបក្រោយមានការរិះគន់ជុំវិញសកម្មភាពនានា ដែលនគរបាលស្លៀកពាក់ស៊ីវិលសៀតកាំភ្លើងខ្លីនៅចង្កេះ ហើយការជិះម៉ូតូ គឺមិនពាក់មួក សុវត្ថិភាព ហើយម៉ូតូក៏គ្មានកញ្ចក់មើលក្រោយដែរ ។…
រាជធានីភ្នំពេញ ៖ នាយកដ្ឋាននគរបាលព្រហ្មទណ្ឌក្រសួងមហាផ្ទៃ បានធ្វើការឆ្លើយតបក្រោយមានការរិះគន់ជុំវិញសកម្មភាពនានា ដែលនគរបាលស្លៀកពាក់ស៊ីវិលសៀតកាំភ្លើងខ្លីនៅចង្កេះ ហើយការជិះម៉ូតូ គឺមិនពាក់មួក សុវត្ថិភាព ហើយម៉ូតូក៏គ្មានកញ្ចក់មើលក្រោយដែរ ។ ដោយសាររូបភាពវីដេអូនៃការជិះម៉ូតូរបស់កម្លាំងនគរបាលស្លៀកពាក់ស៊ីវិល ក្រោយប្រតិបត្តិការបង្ក្រាបមុខសញ្ញាដែលបង្កគ្រោះថ្នាក់ និងទើបចេញពីពន្ធនាគារ ដែលដឹកនាំដោយលោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋាន ។
នាយកដ្ឋាននគរបាលព្រហ្មទណ្ឌ បានទទួលស្គាល់ចំពោះកំហុសឆ្គង នៃការមិនគោរពច្បាប់ចរាចរណ៍ របស់កងកម្លាំងទាំងការមិនពាក់មួកសុវត្ថិភាព មិនដាក់កញ្ចក់ ការបញ្ចេញកាំភ្លើងសៀតចង្កេះ ដោយគ្មានការបិទបាំង និងមិនពាក់កាតសម្គាល់ខ្លួន ។
ទន្ទឹមគ្នានេះ នាយកដ្ឋាននគរបាលព្រហ្មទណ្ឌ ក៏សូមធ្វើការពន្យល់ជូនសាធារណៈ និងអ្នកសារព័ត៌មាន ឲ្យបានជ្រាបអំពីស្ថានភាពជាក់ស្ដែង នៃប្រតិបត្តិការរបស់កម្លាំងជំនាញ ។
ការជិះម៉ូតូមិនពាក់មួក ៖ នៅពេលទទួលបានព័ត៌មានអំពីបទល្មើសដែលកើតឡើងភ្លាម កម្លាំងជំនាញប្រញាប់រួសរាន់ដើម្បីចេញប្រតិបត្តិការបន្ទាន់ ដោយមិនបានគិតអំពីសុវត្ថិភាពផ្ទាល់ខ្លួន ក្នុងការពាក់មួកសុវត្ថិភាព ដែលខុសនឹងច្បាប់ចរាចរណ៍ផ្លូវគោក ។ មួយវិញទៀត ការពាក់មួកសុវត្ថិភាពក្នុងការជិះម៉ូតូប្រដេញដែលមានល្បឿនលឿន ពេលខ្លះអាច១០០គីឡូម៉ែត្រ/ម៉ោង ក៏ជាឧបសគ្គមួយផងដែរ ដោយកម្លាំងមើលមិនបានច្បាស់ និងគ្រប់ជ្រុងជ្រោយ អាចបង្កគ្រោះថ្នាក់ពេលប្រដេញ ។
ការសៀតកាំភ្លើងដោយមិនបានបិទបាំង ៖ វីដេអូនោះ គឺក្រោយប្រតិបត្តិការ ដូច្នេះនៅពេលកំពុងប្រតិបត្តិការ កម្លាំងប្រើប្រាស់ម៉ូតូក្នុងល្បឿនលឿន ដូច្នេះធ្វើឲ្យប៉ើងអាវចេញកាំភ្លើងមកខាងក្រៅ និងមិនទាន់បានរៀបរយខ្លួនប្រាណឡើងវិញ ព្រោះកម្លាំងជំនាញកំពុងដឹកមុខសញ្ញាទៅកាន់នាយកដ្ឋាន ដើម្បីធ្វើការសួរនាំតាមនីតិវិធី ។
ការមិនដាក់កញ្ចក់ ថ្វីបើជាការខុសច្បាប់ចរាចរណ៍ផ្លូវគោក ប៉ុន្ដែកម្លាំងមានផលលំបាកក្នុងការប្រដេញតាមជនល្មើស ដោយសារពេលខ្លះជនល្មើសជិះគេចចូលតាមផ្លូវដែលតូចចង្អៀត ដែលងាយនឹងប៉ះជាមួយកញ្ចក់ ហើយបង្កគ្រោះថ្នាក់ដល់កងកម្លាំង ។
ជាថ្មីម្ដងទៀត នាយកដ្ឋាននគរបាលព្រហ្មទណ្ឌ ទទួលស្គាល់ចំពោះការមិនគោរពច្បាប់ចរាចរណ៍របស់កម្លាំងជំនាញ ប៉ុន្ដែទិសដៅតែមួយគត់ គឺការបង្ក្រាបបទល្មើសឲ្យខាងតែបាន ដោយពេលខ្លះមិនបានគិតសូម្បីសុវត្ថិភាពផ្ទាល់ខ្លួន ។
ចំពោះមុខនេះ អង្គភាពក៏បានអប់រំណែនាំដល់កម្លាំងជំនាញទាំងអស់ ត្រូវកែប្រែរាល់កំហុសឆ្គង និងចូលរួមគោរពច្បាប់ចរាចរណ៍ ដើម្បីជាគំរូដល់ប្រជាពលរដ្ឋ ៕
ចែករំលែកព័តមាននេះ