រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសថា រាជរដ្ឋាភិបាលមិនភ្លេចរឿងទឹកដីក្នុងមួយវិនាទីណាឡើយ ហើយក៏គ្មានចុះហត្ថលេខាកាត់ទឹកដីនោះទេ ។
ការលើកឡើងរបស់សម្តេចធិបតីនាយក បន្ទាប់ពីមានក្រុមអ្នកប្រឆាំងនៅក្រៅប្រទេសមួយចំនួនបានវាយប្រហារសម្តេចថា មិនបានគិតគូរការឈ្លានពានរំលោភទឹកដីពីសំណាក់ថៃ ។
ថ្លែងក្នុងពិធីសម្ពោធបើកឱ្យប្រើប្រាស់ជាផ្លូវការ មន្ទីរពេទ្យហ្លួង ម៉ែ នៅថ្ងៃទី១៦ ខែកញ្ញា ឆ្នាំ២០២៦ សម្តេចធិបតី ហ៊ុន ម៉ាណែត មានប្រសាសន៍ថា «រឿងទឹកដីយើងមិនដែលភ្លេចទេ ការដោះស្រាយគ្រប់វិធីទាំងអស់ មិនដែលភ្លេចក្នុងមួយវិនាទី ។ រាល់ថ្ងៃ កងទ័ពយើងនៅឈរជើងនៅជួរមុខដើម្បីទប់ស្កាត់ និងការពង្រឹងប្រៀបការពារជាតិ ។ បងប្អូនអត់បានចោលទេ មេទ័ពយើង ដែលឈរជើងត្រៀមប្រយុទ្ធអត់មានពីណាបោះបង់ទឹកដីឲ្យពីណាគេទេ» ។
សម្ដេចធិបតីនាយករដ្ឋមន្ត្រី បានលើកឡើងថា បើនិយាយថា បាត់ទឹកដី ទាល់តែរដ្ឋាភិបាលចុះហត្ថលេខាឯកភាព ។ សម្ដេចថា «យើងអត់មានចុះហត្ថលេខាឯកភាពទេ ។ ស្អីទៅដែលមានឯកភាពជាមួយថៃ? មានតែទីមួយរឿងផែនទី មានតែសន្ធិសញ្ញា១៩០៤ អនុសញ្ញា១៩០៧ សន្ធិសញ្ញា១៩២៥ បារាំង-សៀម ដែលបារាំងចុះហត្ថលេខាជាមួយរដ្ឋបាលសៀមនាពេលនោះ» ។
សម្ដេចធិបតី បន្ថែមថា កម្ពុជា មិនទាន់មានចុះហត្ថលេខាឯកភាពគ្នា នៅលើព្រំដែនទឹក ព្រំដែនគោកទេ ។ JBC ចុះធ្វើការ២០ឆ្នាំ បានឯកភាពទៅលើបង្គោលមួយចំនួន ប៉ុន្តែមិនទាន់មានការផ្ទៀងផ្ទាត់ឡើងវិញ នៅខ្សែព្រំដែនដែលបានវាស់តាំងពីឆ្នាំ១៩០៧ នោះទេ។ អត់មានខ្សែព្រំដែនថ្មីដែលត្រូវធ្វើទេ ។
សម្តេចបានគូសបញ្ជាក់ថា ៖ ការចុះទៅលើដីអ្នកខ្លះថា បង្គោលថ្មីមែន? តែសូមប្រាប់ថាគេចុះទៅមិនមែនកំណត់បង្គោលនោះទេ គឺគេរកទីតាំងបង្គោល ។ បង្គោលខ្លះវាចាស់ឬ ថ្មី បើសិនវានៅខុសទីតាំងដែលកំណត់ដោយសន្ធិសញ្ញា គឺត្រូវរំកិល ដូចច្នេះបង្គោលលេខ៥៨, ៥៩ ដែលចូលក្នុងដីយើងត្រូវរំកិលទៅវិញ ដូច្នេះមានអស់ហើយ យើងអត់មានស៊ីញ៉េរដីឱ្យអ្នកណាទេ ៕
ចែករំលែកព័តមាននេះ