ខេត្តបន្ទាយមានជ័យ ៖ គ្រួសារទីទ័លក្រដែលមានប្តីក៏ពិការ ហើយម្តាយក៏ចាស់ជរាអាយុជាង៩០ឆ្នាំ ដឹកគ្នាតាមរ៉ឺម៉ក់ម៉ូតូកង់បី ដើររើសអេតចាយតាមដងផ្លូវនៅក្រុងប៉ោយប៉ែត ដែលមើលទៅពិតជាគួរឲ្យសង្វេគខ្លាំងណាស់ ហើយនៅថ្ងៃនេះដែរ គឺថ្ងៃទី២៨ ខែមេសា ឆ្នាំ២០២២ ស្ត្រីរូបនេះបានទទួលអំណោយពីថ្នាក់ដឹកនាំ អាជ្ញាធរ និងសមត្ថកិច្ចនៅក្រុងប៉ោយប៉ែត ក៏ដូចជាភ្នាក់ងារកោះសន្តិភាពផងដែរ តាមរយៈកោះសន្តិភាព។
អំណោយដែលគ្រួសារខាងលើ ទទួលបានរួមមាន ៖ អង្ករចំនួន៧៥គីឡូក្រាម ដែលមាន២៥គីឡូក្រាមជារបស់លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត និង៥០គីឡូក្រាមទៀត ជារបស់លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត និងភរិយាផងដែរ។
ក្រៅពីអំណោយអង្ករខាងលើនេះ ភ្នាក់ងារកោះសន្តិភាពនៅទីក្រុងភ្នំពេញ គឺកញ្ញាធីតា និងភ្នាក់ងារនៅខេត្តបន្ទាយមានជ័យ គឺលោក មុត សារុន ក៏បានជួយដល់គ្រួសារមួយនេះផងដែរ រួមមាន ៖ ប៊ីចេង១ថង់ ស្មើនឹងកន្លះគីឡូក្រាម, ស្ករសកន្លះគីឡូក្រាម, អំបិលកន្លះគីឡូក្រាម, សាប៊ូ១ថង់, ទឹកត្រី១យួរ និងថវិកាចំនួន១០ម៉ឺនរៀលផងដែរ។
ក្នុងពេលទទួលអំណោយពីភ្នាក់ងារកោះសន្តិភាព គ្រួសារទីទ័លក្រនេះ បានសម្តែងក្តីត្រេកអរយ៉ាងខ្លាំង ហើយក៏បានលើកដៃជូនពរ សូមឲ្យម្ចាស់អំណោយទាំងអស់ទទួលបានសុខភាពល្អ និងជោគជ័យរាល់ភារកិច្ច ជាពិសេសសូមឲ្យរកស៊ីទទួលទានកាន់តែមានបានឡើងៗជានិច្ច។
សូមបញ្ជាក់ថា គ្រួសារខាងលើ បុរសជាប្តីឈ្មោះ ស យុត អាយុ៤៧ឆ្នាំ ប្រពន្ធឈ្មោះ ជឹម អ៊ឺត អាយុ៥៩ឆ្នាំ និងមានម្តាយចាស់ជរាអាយុ៩១ឆ្នាំ រស់នៅក្នុងបន្ទុក ហើយបច្ចុប្បន្នពួកគាត់ស្នាក់នៅភូមិសាមគ្គីមានជ័យ សង្កាត់និងក្រុងប៉ោយប៉ែត។
គួររលឹកផងដែរថា ៖ បើតាមសម្តីរបស់ស្ត្រីកំសត់ខាងលើបានប្រាប់ភ្នាក់ងារកោះសន្តិភាពយើងតាមដងផ្លូវ ខណៈពេលកំពុងតែឈប់ចតរ៉ឺម៉កម៉ូតូកង់បី ដោយមានដឹកម្តាយចាស់ជរាម្នាក់អង្គុយក្នុងរទេះផងនោះ ដោយអះអាងថា គ្រួសារគាត់ទីទាល់ក្រណាស់ ហើយជីវភាពក្នុងគ្រួសារទាំងមូល គឺគាត់ជាអ្នកដោះស្រាយគ្រប់បែបយ៉ាង ខណៈប្តីគាត់ធ្លាក់ខ្លួនពិការបាក់ជើងម្ខាង ព្រោះតែគ្រោះថ្នាក់ចរាចរណ៍មិនអាចធ្វើអ្វីកើតជិត១០ឆ្នាំមកហើយ។ ចំណែកឯម្តាយបង្កើតរបស់គាត់មានអាយុ៩១ឆ្នាំ ក៏ពិការស្លា.ប់មួយចំហៀងខ្លួនជាង៣ឆ្នាំថែមទៀត ដែលអម្រែកដ៏ធ្ងន់ធ្ងរមួយនេះ ធ្លាក់មកលើរូបគាត់តែម្នាក់ឯងជារៀងរហូតមក។
គួររំលឹកទៀតថា ៖ សែនសង្វេគ! រឿងរ៉ាវដ៏កំសត់របស់ស្ត្រីម្នាក់ដឹកម្តាយជរាដើររើសអេតចាយ៕
ចែករំលែកព័តមាននេះ