ឃើញរូបភាពជាក់ស្តែង និងស្តាប់រឿងរ៉ាវអំពីជីវិតពិតរបស់គ្រួសាមួយពិតជាគួរឲ្យអាណិត និងមហាសង្វែគណាស់ ខណៈពេលស្ត្រីម្នាក់ដែលមានវ័យ៥៩ឆ្នាំទៅហើយនោះ នៅតែបើករ៉ឺម៉កម៉ូតូកង់បីដឹកម្តាយចាស់ជរាវ័យអាយុ៩១ឆ្នាំ រើសអេតចាយតាមដងផ្លូវ
ខេត្តបន្ទាយមានជ័យ ៖ ឃើញរូបភាពជាក់ស្តែង និងស្តាប់រឿងរ៉ាវអំពីជីវិតពិតរបស់គ្រួសាមួយពិតជាគួរឲ្យអាណិត និងមហាសង្វែគណាស់ ខណៈពេលស្ត្រីម្នាក់ដែលមានវ័យ៥៩ឆ្នាំទៅហើយនោះ នៅតែបើករ៉ឺម៉កម៉ូតូកង់បីដឹកម្តាយចាស់ជរាវ័យអាយុ៩១ឆ្នាំ រើសអេតចាយតាមដងផ្លូវនៅក្រុងប៉ោយប៉ែត ដើម្បីលក់យកប្រាក់ដោះស្រាយជីវភាព និងចិញ្ចឹមប្តីពិការថែមទៀតផង។
បើតាមស្ត្រីឈ្មោះ ជឹម អ៊ឺត អាយុ៥៩ឆ្នាំ ស្នាក់នៅភូមិសាមគ្គីមានជ័យ សង្កាត់និងក្រុងប៉ោយប៉ែត បានប្រាប់កោះសន្តិភាពតាមដងផ្លូវ ខណៈពេលកំពុងតែឈប់ចតរ៉ឺម៉កម៉ូតូកង់បី ដោយមានដឹកម្តាយចាស់ជរាម្នាក់អង្គុយក្នុងរទេះផងនោះ ដោយអះអាងថា គ្រួសារគាត់ទីទាល់ក្រណាស់។ ស្ត្រីរូបនេះបន្តថា ជីវភាពក្នុងគ្រួសារទាំងមូល គឺគាត់ជាអ្នកដោះស្រាយគ្រប់បែបយ៉ាង ខណៈប្តីគាត់ធ្លាក់ខ្លួនពិការបាក់ជើងម្ខាង ដោយសារតែគ្រោះថ្នាក់ចរាចរណ៍មិនអាចធ្វើអ្វីកើតជិត១០ឆ្នាំមកហើយ។
មិនត្រឹមតែប៉ុណ្ណោះ គាត់ថា ម្តាយបង្កើតរបស់គាត់មានអាយុ៩១ឆ្នាំ ឈ្មោះ គឹម ឡាយ ក៏ពិការស្លា.ប់មួយចំហៀងខ្លួនជាង៣ឆ្នាំថែមទៀត ដែលអម្រែកដ៏ធ្ងន់ធ្ងរមួយនេះ ធ្លាក់មកលើរូបគាត់តែម្នាក់ឯងជារៀងរហូតមក។
ស្ត្រីកំសត់រូបនេះបានប្រាប់បន្តថា មុនពេលរកកន្លែងស្នាក់នៅបាន គាត់និងម្តាយពេលរើសអេតចាយដល់កន្លែងណា បើយប់នាំគ្នាដេកកន្លែងនោះ ដោយម្តាយគាត់ដេកលើរ៉ឺម៉កម៉ូតូកង់បី ឯគាត់វិញចងអង្រឹងដេកក្រោមដើមឈើក្បែរនោះ ខណៈបុរសជាប្តីវិញ ត្រូវបានបងប្អូនយកទៅមើលថែនៅឯស្រុកកំណើត ក្នុងខេត្តកំពង់ចាម។
គាត់បញ្ជាក់ថា គាត់ក៏មានកូនប្រុសម្នាក់ដែរ តែមិនអាចជួយអ្វីពួកគាត់បានទេ ព្រោះដី និងផ្ទះរបស់កូនគាត់ដាក់បញ្ចាំនៅធនាគាហើយ ហើយដោយសារគ្មានប្រាក់ឡើងឲ្យគេទៀងទាត់ ឥឡូវត្រូវគេដាក់លក់ឡៃឡុងធ្វើឲ្យកូនប្រុសរបស់គាត់ និងកូនប្រសានាំចៅៗបង្ខំចិត្តចំណាកស្រុកទៅប្រទេសថៃបាត់ មិនទាន់ឃើញវិលត្រឡប់មកវិញឡើយ។
ដ្បិតគ្រួសារនេះមើលទៅគួរឲ្យសង្វែកណាស់ ប៉ុន្តែស្ត្រីខាងលើបានអះអាងថា មិនដែលទទួលបានប្រាក់ឧបត្ថម្ភពីរាជរដ្ឋាភិបាលតាមរយៈអាជ្ញាធរទេ។ ប៉ុន្តែធ្លាប់ទទួលបានអំណោយតិចតួចពីអាជ្ញាធរ និងសប្បុរសជនតាមដងផ្លូវនៅភូមិនានា ខណៈពេលដឹកម្តាយរើសអេតចាយ។ គ្រួសារមួយនេះ អំពាវនាវចង់បានដី និងផ្ទះ ជាពិសេសអំណោយពីសប្បុរសជនទាំងក្នុង និងក្រៅប្រទេស ដើម្បីដង្ហើមចុងក្រោយម្តាយរបស់គាត់ ៕
ចែករំលែកព័តមាននេះ