ខេត្តកំពង់ឆ្នាំង ៖ សមត្ថកិច្ចនគរបាលចរាចរណ៍ក្រុងកំពង់ឆ្នាំងនៅតែបន្តសហការជាមួយនគរបាលចររាចរណ៍ខេត្ត ចុះពង្រឹងនិងអនុវត្តច្បាប់ចរាចរណ៍នៅក្នុងក្រុងជារៀងរាល់ថ្ងៃ លើកលែងតែថ្ងៃឈប់សម្រាក ។ ជាក់ស្តែង រយៈពេលមួយថ្ងៃ គឺថ្ងៃទី២៧ ខែមេសា…
ខេត្តកំពង់ឆ្នាំង ៖ សមត្ថកិច្ចនគរបាលចរាចរណ៍ក្រុងកំពង់ឆ្នាំងនៅតែបន្តសហការជាមួយនគរបាលចររាចរណ៍ខេត្ត ចុះពង្រឹងនិងអនុវត្តច្បាប់ចរាចរណ៍នៅក្នុងក្រុងជារៀងរាល់ថ្ងៃ លើកលែងតែថ្ងៃឈប់សម្រាក ។ ជាក់ស្តែង រយៈពេលមួយថ្ងៃ គឺថ្ងៃទី២៧ ខែមេសា នេះ សមត្ថកិច្ចនគរបានឈរជើង នៅចំណុចផ្លូចបែកជា៤ កែងសាលាខេត្ត បានផាកពិន័យអ្នកបើកបរម៉ូតូ និងរថយន្តល្មើសច្បាប់ចរាចរណ៍បានចំនួន២១នាក់ ។ នេះបើយោងតាមរបាយការណ៍របស់សមត្ថកិច្ចនគរបាលក្រុងកំពង់ឆ្នាំង ។
លោកវរសេនីយ៍ទោ ហង្ស ប៊ុនហាក់ អធិការរងនគរបាលក្រុងកំពង់ឆ្នាំងទទួលបន្ទុកចរាចរណ៍បានឱ្យដឹងថា ដោយអនុវត្តតាមបទបញ្ជាលោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង និងបទបញ្ជារបស់ គណៈបញ្ជាការឯកភាពខេត្តកំពង់ឆ្នាំង បានបន្តអនុវត្តច្បាប់ចរាចរណ៍ផ្លូវគោកជារៀងរាល់ថ្ងៃ ។
ជាក់ស្តែង នៅថ្ងៃទី២៧ ខែមេសា កម្លាំងសមត្ថកិច្ចនគរបាលក្រុង និងនគរបាលខេត្ត ឈរជើងនៅចំណុចកែងសាលាខេត្ត បានចុះប្រតិបត្តិការអនុវត្តច្បាប់ចរាចរណ៌ ដែលជាលទ្ធផលបានផាកពិន័យអ្នកបើកបរម៉ូតូនិងរថយន្តល្មើសច្បាប់ចរាចរណ៍ចំនួន២១នាក់ ក្នុងនោះ មានអ្នកបើកបររថយន្តចំនួន៥នាក់ផងដែរ ។ ក្នុងកិច្ចប្រតិបត្តិការនេះ គឺពេលព្រឹកសមត្ថកិច្ចបានឈរជើង នៅសង្កាត់ផ្សារឆ្នាំង និងពេលរសៀល ឈរជើងនៅសង្កាត់ប្អេរ ក្រុងកំពង់ឆ្នាំង ។
ចំពោះបទល្មើសដែលត្រូវផាកពិន័យ អ្នកបើកបរម៉ូតូមិនពាក់មួកសុវត្ថិភាព៦ម៉ឺនរៀល , ជិះម៉ូតូនិយាយទូរស័ព្ទពិន័យ៨ម៉ឺនរៀល ,បើកម៉ូតូអត់ផ្លាកលេខ១២ម៉ឺនរៀល, ចតម៉ូតូលើគំនូសហាមឃាត់លើផ្លូវ៦ម៉ឺនរៀល , បើករថយន្តមិនពាក់ខ្សែក្រវ៉ាត់៧ម៉ឺនរៀល , បើករថយន្តនិយាយទូរស័ព្ទ១២ម៉ឺនរៀល , ចតរថយន្តលើគំនូសហាមឃាត់ ៧៥០០០រៀល។ បើតាមការប្រមាណ អ្នកបើកបរម៉ូតូ និងរថយន្តមិនគោរច្បាប់ចរាចរណ៍ បច្ចុប្បន្ន ក្នុងខេត្តកំពង់ឆ្នាំងមានប្រមាណ៥ % ។
គណៈបញ្ជាការឯកភាពរដ្ឋបាលខេត្តកំពង់ឆ្នាំង និងសមត្ថកិច្ចនគរបាលចរាចរណ៍ សូមអំពាវនាវដល់ប្រជាពលរដ្ឋជាអ្នកបើកបរយានយន្តគ្រប់ប្រភេទ សូមចូលរួមគោរពច្បាប់ចរាចរណ៍ដូចជាពាក់មួកសុវត្ថិភាព បើករថយន្តពាក់ខ្សែក្រវ៉ាត់ កុំនិយាយទូរសព្ទ័ក្នុងពេលបើកបរ ត្រូវគោរពគំនូសសញ្ញា និងផ្លាកសញ្ញាចរាចរណ៍ទាំងអស់គ្នា ដើម្បីរួមគ្នាទប់ស្កាត់នឹងកាត់បន្ថយគ្រោះថ្នាក់ចរាចរណ៍ នៅលើដងផ្លូវ ដែលធ្វើឱ្យប្រជាពលរដ្ឋយើងរបួសពិការ និងខូចខាតទ្រព្យសម្បត្តិនៅក្នុងក្រុមគ្រួសារ៕
ចែករំលែកព័តមាននេះ