វៀតណាម ៖ ប៉ូលិសវៀតណាម ឃាត់ខ្លួនយុវជនម្នាក់ និងមិត្តភក្តិ២នាក់ទៀត ក្រោយពីប្រទះឃើញជនសង្ស័យ២នាក់ ជាចោរទាក់ឆ្កែ និងឆ្មា យុវជនទាំង៣នាក់ ឡើងជិះរថយន្ត ប្រដេញតាមពីក្រោយម៉ូតូ បំបុកឲ្យដួលបណ្ដាលអោយស្លា.ប់ចោរម្នាក់ និងចោរម្នាក់ទៀតរងរបួស នៅក្នុងខេត្តដាកឡាក់ ប្រទេសវៀតណាម នេះបើយោងតាមសារព័ត៌មាន Vnexpress ចុះផ្សាយនៅថ្ងៃទី២៧ មេសា ២០២២នេះ ។
យុវជនឈ្មោះ លី ហ័ងអាញ់ អាយុ២៣ឆ្នាំ មានមុខរបរ បើកបររថយន្តតាក់ស៊ី និងមិត្តភក្តិ ២នាក់ទៀត ត្រូវបានមន្ត្រីនគរបាលខេត្តដាកឡាក់ ឃាត់ខ្លួនបណ្ដោះអាសន្នកាលពីព្រឹកថ្ងៃអង្គារ ទី២៦មេសា ដើម្បីរង់ចាំការស៊ើបអង្កេតលើករណីឃាតកម្ម ។
កាសែតវៀតណាមចុះផ្សាយព័ត៌មានថា កាលពីវេលាម៉ោង១និង៥០នាទីយប់រំលងអធ្រាត្រឈានចូលថ្ងៃទី២៣ ខែមេសា យុវជនឈ្មោះ(អាញ់) និងមិត្តភក្តិ កំពុងអង្គុយផឹកស្រាបៀនៅភោជនីយដ្ឋានមួយ ។ ពេលនោះ ប្រជាពលរដ្ឋបានឃើញជនសង្ស័យ២នាក់ រួមមាន ៖ ទី១ឈ្មោះ ឌុយ អាយុ១៩ឆ្នាំ និងទី២ឈ្មោះ ឡុង អាយុ២២ឆ្នាំ បានជិះម៉ូតូ១គ្រឿង ធ្វើសកម្មភាពលួចទាក់ឆ្កែ និងឆ្មា ហើយក៏មានអ្នកនៅក្បែរស្រែកថា ចោរ! ចោរៗ ។
ឃើញដូច្នេះ យុវជនឈ្មោះ(អាញ់) បានសម្រេចចិត្តហៅមិត្តភក្តិ ២នាក់ទៀត ឲ្យឡើងជិះរថយន្តជាមួយខ្លួន ហើយបើកប្រដេញតាមម៉ូតូរបស់ក្រុមចោរទាក់ឆ្កែ ខណៈក្រុមចោរដឹងខ្លួនថា មាននរណាម្នាក់កំពុងដេញតាមពីក្រោយ ពួកគេបានបន្ថែមល្បឿន បើករត់គេចខ្លួន ។
នៅពេលទៅដល់ស្រុកឡាក់ យុវជនឈ្មោះ(អាញ់) បានបើករថយន្តតាមទាន់ ក៏បំបុកម៉ូតូពីក្រោយ បណ្តាលឲ្យជនសង្ស័យទាំង២នាក់ ដួលខ្ទាតទៅម្ខាងនៃផ្លូវ ។ ជនសង្ស័យម្នាក់ឈ្មោះ ឌុយ ដែលជិះលើម៉ូតូពីក្រោយ បានដួលបោកនឹងថ្នល់ស្លាប់នៅនឹងកន្លែង និងជនសង្ស័យម្នាក់ទៀតរងរបួស ។ ចំណែកម៉ូតូរងការខូចខាតយ៉ាងដំណំ ។ សត្វឆ្មា ២ក្បាលបានងាប់នៅកន្លែងកើតហេតុ ។
ក្រោយពេលកើតហេតុ យុវជនទាំង៣នាក់ ដែលបើករថយន្តប្រដេញតាមបុកនោះ បាននាំគ្នាទៅកាន់ប៉ុស្តិ៍នគរបាលស្រុកឡាក់ ដើម្បីប្រគល់ខ្លួន ។
ជនសង្ស័យរងរបួសឈ្មោះ ឡុង បានសារភាពថា រូបគេនិងជនសង្ស័យម្នាក់ទៀត តែងតែធ្វើសកម្មភាពជិះម៉ូតូលួចទាក់ឆ្កែ និងឆ្មា នៅពេលយប់ ។ ករណីបើករថយន្តដេញបំបុកបណ្ដាលឲ្យស្លា.ប់នេះ បានកើតឡើងបន្ទាប់ពីជនសង្ស័យទាំង២នាក់ បានលួចសត្វឆ្មាចំនួន ០៣ក្បាល ។
យុវជនឈ្មោះ លី ហ័ងអាញ់ បាននិយាយនៅប៉ុស្តិ៍ប៉ូលិសថា មានការសោកស្ដាយដែលបណ្ដាលឲ្យមានមនុស្សស្លា.ប់ដោយអចេតនា ។ យុវជន (អាញ់) បន្តថា «បំណងរបស់ខ្ញុំ គ្រាន់តែបុកម៉ូតូឲ្យដួល ដើម្បីឲ្យជនសង្ស័យត្រូវប៉ូលិសចាប់ខ្លួនតែប៉ុណ្ណោះ ខ្ញុំមិននឹកស្មានថា មានស្លាប់មនុស្សនោះទេ» ។
បើតាមរបាយការណ៍ បាននិយាយថា ប្រទេសវៀតណាម ស៊ីឆ្កែ ប្រមាណ ៥លានក្បាល ក្នុងមួយឆ្នាំ ជាប់ចំណាត់ថ្នាក់លេខ២ បន្ទាប់ពីប្រទេសចិន ចំនួន ២០លានក្បាល ក្នុងមួយឆ្នាំៗ ។ សត្វឆ្កែជាច្រើន ដែលបម្រើនៅតាមភោជនីយដ្ឋាន ត្រូវបានក្រុមជនសង្ស័យលួចទាក់ពីកន្លែងដែលមិនមានការគ្រប់គ្រង ៕
ចែករំលែកព័តមាននេះ