លោកវរសេនីយ៍ឯក ឆាយ ខេមរ័ត្ន អធិការនគរបាលក្រុងកំពង់ឆ្នាំង លើកឡើងថា៖ ការលក់ដូររបស់អាជីវករ បានយកដីចំណីផ្លូវធ្វើជាទីតាំងលក់ដូរ អ្នករត់ម៉ូតូឌុប អ្នករត់ផាសអាប់ (ម៉ូតូកង់៣ឥណ្ឌា) និងអ្នកបើកបររថយន្ត បានយករង្វង់មូល និងកែងច្រមុះជ្រូក ពីចំណុចផ្សារលើទៅផ្សារក្រោម ធ្វើជា
ខេត្តកំពង់ឆ្នាំង ៖ លោកវរសេនីយ៍ឯក ឆាយ ខេមរ័ត្ន អធិការនគរបាលក្រុងកំពង់ឆ្នាំង លើកឡើងថា៖ ការលក់ដូររបស់អាជីវករ បានយកដីចំណីផ្លូវធ្វើជាទីតាំងលក់ដូរ អ្នករត់ម៉ូតូឌុប អ្នករត់ផាសអាប់ (ម៉ូតូកង់៣ឥណ្ឌា) និងអ្នកបើកបររថយន្ត បានយករង្វង់មូល និងកែងច្រមុះជ្រូក ពីចំណុចផ្សារលើទៅផ្សារក្រោម ធ្វើជាទីតាំងចំណតរបស់ខ្លួន គឺបានធ្វើឱ្យបាត់បង់សណ្ដាប់ធ្នាប់ បង្កការស្ទះចរាចរណ៍ទៀតផង។ ដែលបញ្ហានេះ សមត្ថកិច្ចនគរបាលតែងតែចុះរៀបរយជាញឹកញាប់ ប៉ុន្តែជួបការលំបាកដូចវែកចក ។
ជាក់ស្តែងនៅព្រឹកថ្ងៃទី ២៦ខែមេសា ឆ្នាំ២០២២ នេះ មន្ត្រីនគរបាលផ្នែកសណ្ដាប់ធ្នាប់ របស់អធិការនគរបាលក្រុងកំពង់ឆ្នាំង សហការជាមួយគណៈបញ្ជាការឯកភាពខេត្ត និងអាជ្ញាធរ ប្រមូលបានចុះរៀបចំជាថ្មីឡើងវិញម្ដងទៀត។
លោក ឆាយ ខេមរ័ត្ន អធិការនគរបាលក្រុងបានបន្តថា៖ កន្លងទៅ បើទោះបីមានការគូសគំនូស កំរិតឲ្យលក់ដូរតាមផ្ទះល្វែង មិនឱ្យលក់លៀនចេញពីគំនូសយ៉ាងណាក្តី ក៏ពួកគាត់អ្នកលក់នៅតែដាក់តាំងលក់លៀនចេញមកលើផ្លូវរបស់អ្នកដំណើរដដែល ។ ករណីនេះ ធ្វើឱ្យស្ទះចរាចរណ៍រាល់ថ្ងៃ ហើយថ្ងៃនេះ សមត្ថកិច្ចនគរបាលក្រុងកំពង់ឆ្នាំង បានរៀបចំសារជាថ្មី ដោយក្នុងនោះបានឃាត់ និងធ្វើផាកពិន័យទៅលើម៉ូតូឌុប ផាសអាប់ និងរថយន្ត ដែលចតលើគំនូសផ្លូវហាមចត ដោយក្នុងរថយន្ត១គ្រឿងតម្លៃ ៧៥០០០រៀល ម៉ូតូឌុប និងផាសអាប់១គ្រឿង តម្លៃ៦ម៉ឺនរៀល និងរថយន្តធន់ធំ តម្លៃ១៥ ម៉ឺនរៀលផងដែរ។
លោកវរសេនីយ៍ទោ ហង្ស ប៊ុនហាក់ អធិការរងនគរបាលក្រុងកំពង់ឆ្នាំង ទទួលបន្ទុកចរាចរណ៍ និងសណ្ដាប់ធ្នាប់ បានបញ្ជាក់ថា ថ្ងៃនេះកម្លាំងនគរបាលក្រុងចំនួន៩នាក់ បានសហការជាមួយនឹងគណៈបញ្ជាការឯកភាពក្រុង និងអាជ្ញាធរមូលដ្ឋាន បានចុះរៀបចំសណ្ដាប់ធ្នាប់ ព្រមទាំងបានធ្វើការផាកពិន័យទៅលើម៉ូតូឌុបចំនួន៣គ្រឿង, ផាសអាប់ចំនួន៥គ្រឿង, រថយន្ត ៣គ្រឿង ដែលបានឈប់លើគំនូសពណ៌លឿងខុសច្បាប់ នៅចំណុចរង្វង់មូលមនុស្ស៣នាក់ និងនៅចំណុចផ្លូវច្រមុះជ្រូក ផ្សារលើទៅផ្សារក្រោម ។
ជុំវិញការរៀបចំសណ្ដាប់ធ្នាប់ និងផាកពិន័យនេះដែរ គេសង្កេតឃើញ មានការប្រតិកម្មពីអ្នករត់ម៉ូតូឌុប និងអ្នករត់ផាសអាប់ ដែលគ្រាន់តែគ្នាឈប់បន្តិចបន្តួចមិនគួរផាកពិន័យដល់ទៅ ៦ម៉ឺនរៀល ។ មួយវិញទៀត នៅចំណុចរង្វង់មូលមនុស្ស៣នាក់ និងចំណុចច្រមុះជ្រូក ដែលមានបាញ់គំនូសរឿងលើថ្នល់ មិនមានដាក់ផ្លាកសញ្ញាហាមចតនោះទេ ។ លុយលំបាករកណាស់ មុខរបរដូចពួកគាត់រកមួយពេលសម្រាប់រស់មួយពេល ព្រោះជាមធ្យម ពួកគាត់រកបាន១ថ្ងៃត្រឹម២ទៅ៣ម៉ឺនរៀលតែប៉ុណ្ណោះ។
ដោយឡែក នៅតាមផ្ទះល្វែងផ្សារលើវិញ គេសង្កេតឃើញមានការដាក់លក់តាមមុខផ្ទះលៀនលយមកដល់ថ្នល់ផងដែរ ដែលប្រជាពលរដ្ឋសំណូមពរឱ្យអាជ្ញាធរក្រុង និងសមត្ថកិច្ចពាក់ព័ន្ធមេត្តាជួយពិនិត្យ និងរៀបចំផង ៕
ចែករំលែកព័តមាននេះ