ខេត្តព្រៃវែង ៖ ជនរងគ្រោះ២នាក់ប្តីប្រពន្ធត្រូវបានគេប្រទះឃើញស្លាប់នៅចំណុចវាលស្រែខាងលិចភូមិព្រៃផ្តៅ ឃុំកញ្ជ្រៀច ស្រុកកញ្ជ្រៀច និងមានចម្ងាយប្រមាណ៨៥០ម៉ែត្រពីផ្ទះជនរងគ្រោះ នៅវេលាម៉ោង១០ព្រឹក ថ្ងៃទី៩ ខែតុលា ឆ្នាំ២០១៦ ។
មុនការប្រទះឃើញសាកសព២នាក់ប្តីប្រពន្ធនេះតាមប្រភពព័ត៌មានបានឱ្យដឹងថា នៅយប់ថ្ងៃ៨ តុលា ទាំង២នាក់ប្តីប្រពន្ធបាននាំគ្នាទៅរកខ្យង ត្រី តាមទម្លាប់នៅវេលាម៉ោងប្រមាណ២១ ហើយក៏បានបាត់មិនឃើញត្រឡប់មកដល់ផ្ទះវិញទេ ។ ស្ត្រីចំណាស់ជាម្តាយដែលមានផ្ទះនៅទីទៃពីគ្នាបានដើរមកសួរពួកចៅៗព្រោះបាត់ឪពុកម្តាយពួកគេមិនឃើញត្រឡប់មកផ្ទះដូចសព្វមួយដង ។ ដោយមានការសង្ស័យក៏នាំគ្នាតាមរករហូតដល់ម៉ោង១០ព្រឹកទើបប្រទះឃើញសាកសពទាំង២នាក់ ។
យោងតាមរបាយការណ៍ប៉ូលិសនៃអធិការដ្ឋានស្រុកឱ្យដឹងថា ជនរងគ្រោះប្រពន្ធឈ្មោះ កាក់ ប៊ុនថាន អាយុ៤៨ឆ្នាំ និងប្តីឈ្មោះ មាន យ៉ន អាយុ៤៣ឆ្នាំ ។ សពស្ត្រីជាប្រពន្ធគេឃើញរងរបួស៣កន្លែងគឺ១-ស្នាមរបួសភ្នែកខាងស្តាំ បុកចូលជ្រៅទៅក្នុងសាច់ ២-របួសភ្នែកខាងឆ្វេងជ្រៅទៅក្នុងសាច់ ៣-ស្នាមបែកដាច់បបូរមាត់ទាំងខាងលើ និងខាងក្រោម ។ ចំណែកបុរសជាប្តីមានរបួស៤កន្លែង គឺ១-ស្នាមរបួសត្រង់ប្រឡង់ភ្នែកឆ្វេងមុតជ្រៅចូលក្នុងសាច់ ២-ស្នាមរបួសដាច់ត្រង់ត្រចៀកឆ្វេង ៣-របួសក្នុងប្រឡង់ភ្នែកខាងស្តាំចូលជ្រៅ និង៤-របួសចំត្រចៀកស្តាំ ។
មន្ត្រីប៉ូលិសមិនទាន់ធ្វើការសន្និដ្ឋានភ្លាមៗជុំវិញការសម្លាប់ប្តីប្រពន្ធដ៏ឃោរឃៅនេះនៅឡើយទេ គ្រាន់តែបានកត់សម្គាល់ថា ជនមិនស្គាល់អត្តសញ្ញាណបានសម្លាប់ទាំងពីរនាក់ប្តីប្រពន្ធនៅនឹងវាលស្រែរបស់ឈ្មោះ សូយ សុន ស្ថិតនៅខាងលិចភូមិព្រៃផ្តៅ ។
តាមការវាយតម្លៃជំហានដំបូង ការសម្លាប់នេះមិនមែនជាករណីប្លន់ឬគំនុំអ្វីនោះទេ ព្រោះប្តីប្រពន្ធនេះមិនមានទំនាស់ជាមួយអ្នកភូមិណាម្នាក់ឡើយ ។ ទោះបីជាបែបណា មានការសង្ស័យថា អាចជាជម្លោះពេលដើររកខ្យង និងត្រីពេលយប់ដែលពេលនេះសមត្ថកិច្ចកំពុងស្រាវជ្រាវ ៕
ចែករំលែកព័តមាននេះ