ក្នុងឱកាសដឹកនាំមន្ត្រីជំនាញ កម្លាំងមានសមត្ថកិច្ច សហគមន៍ និងអាជ្ញាធរ ស្រុក-ខេត្ត ចុះដាំកូនឈើចម្រុះជាប្រភេទដើមឈើ ព្រៃលិច ចំនួន២៤ ០០០ដើម ស្ថិតក្នុងភូមិ
ខេត្តកំពង់ឆ្នាំង ៖ ក្នុងឱកាសដឹកនាំមន្ត្រីជំនាញ កម្លាំងមានសមត្ថកិច្ច សហគមន៍ និងអាជ្ញាធរ ស្រុក-ខេត្ត ចុះដាំកូនឈើចម្រុះជាប្រភេទដើមឈើ ព្រៃលិច ចំនួន២៤ ០០០ដើម ស្ថិតក្នុងភូមិថ្នល់ឈើទាល ឃុំផ្លូវទូក ស្រុកកំពង់លែង នៅព្រឹកថ្ងៃទី២៥ ខែមេសា ឆ្នាំ២០២២ ឯកឧត្តម សូ ខនឫទ្ធីគុណ រដ្ឋលេខាធិការក្រសួងបរិស្ថាន មានប្រសាសន៍ថា៖ រាជរដ្ឋាភិបាលកម្ពុជា បានយកចិត្តទុកដាក់ ទប់ស្កាត់ការទន្ទ្រានឈូសឆាយដីព្រៃលិចទឹក និងដកហូតមកវិញ ជាមួយអាជ្ញាធរ និងសមត្ថកិច្ចពីសំណាក់ជនខិលខូច រួចជំនួសនូវការដាំកូនឈើព្រៃលិចទឹក ដើម្បីស្ដារដើមឈើចម្រុះឡើងវិញ ។
ឯកឧត្តម សូ ខនឫទ្ធីគុណ តំណាងដ៏ខ្ពង់ខ្ពស់ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានបន្តថា ថ្ងៃនេះយើងដាំឡើងវិញ នូវដើមឈើព្រៃលិចទឹកចម្រុះ ដើម្បីស្ដារដីព្រៃលិចទឹកដែលបានបាត់បង់ ជាប្រយោជន៍សម្រាប់បំផុសស្មារតីប្រជាពលរដ្ឋរបស់យើងឲ្យចេះស្រឡាញ់ព្រៃឈើ ចូលរួមដាំដើមឈើឡើងវិញ ដើម្បីទប់ស្កាត់ការប្រែប្រួលអាកាសធាតុ ។
ពិធីដាំដើមឈើព្រៃលិចទឹកនៅពេលនេះ គឺមានការចូលរួមយ៉ាងច្រើនកុះករ ពីសំណាក់គ្រប់មជ្ឈដ្ឋានពាក់ព័ន្ធ ដែលបាននិងកំពុងឆ្លុះបញ្ចាំងនូវការភ្ញាក់រលឹករបស់សហគមន៍យើងទាំងមូល ក្នុងការប្រឈមមុខដោះស្រាយចំពោះការបាត់បង់ព្រៃលិចទឹក និងស្មារតីម្ចាស់ការ ក្នុងការទទួលខុសត្រូវ លើការគ្រប់គ្រងធនធានធម្មជាតិ ដែលជាជោគវាសនា នៃមាតុភូមិយើង នាពេលអនាគត ជាពិសេសទុកសម្រាប់កូនចៅជំនាន់ក្រោយដើម្បីឲ្យមានភាពបៃតង និងរក្សានូវប្រភពទឹកក្រោមដីថែមទៀតផង ។
នៅក្នុងឱកាសនោះដែរ លោកជំទាវ ប៊ន សុភី អភិបាលរងខេត្តកំពង់ឆ្នាំង មានប្រសាសថា៖ នេះជាលើកទី២ ហើយ ដែលការរៀបចំការដាំ និងស្ដារឡើងវិញនៅព្រៃលិចទឹកក្នុងតំបន់៣ នៃតំបន់ប្រើប្រាស់ច្រើនយ៉ាងបឹងទន្លេសាប ដោយយើងដាំបានចំនួន ២៣ ២៤៤ ដើម ក្នុងនោះមានដើមរាំង ១ ពាន់ដើម, ដើមម្តេញ ៧ពាន់ ដើម, ដើមឬស្សី ៧៤០០ ដើម, ដើមឬស្សីពីងពុង ១៧៣៥ ដើម, ដើមត្នោត ៩ដើម ,ដាំគ្រាប់ត្នោតតាមព្រុំប្រទល់ដីតំបន់៣ ចំនួន ២៣ ៨៩៤គ្រាប់ ដែលមានប្រវែង១១៤,១៣គីឡូម៉ែត្រ ។
យោងតាមសេចក្តីរាយការណ៍របស់ លោក ម៉ន ផល្លា ប្រធានមន្ទីរបរិស្ថាន ខេត្តកំពង់ឆ្នាំង បានឲ្យដឹងថា ដីព្រៃលិចទឹកក្នុងតំបន់៣ នៃតំបន់ប្រើប្រាស់យ៉ាងច្រើនបឹងទន្លេសាប នៅថ្ងៃនេះគឺជាការដាំលើកទី២ ហើយ ដោយកាលដាំលើកទី១ នៅពីថ្ងៃទី១៤ ខែមករា ឆ្នាំ២០២២ បានចំនួន២០ហិកតា និងលើកទី២ គឺដាំថ្ងៃនេះលើផ្ទៃដីចំនួន៦០ហិកតា ដែលមានកូនឈើចម្រុះចំនួន២៤ ០០០ដើម ក្នុងនោះមាន រាំងទឹក ១៣ ៥០០ដើម, សណ្តាន់៤ ៥០០ដើម ,ម្តេញ៣ ៥០០ដើម និងឬស្សីស្រុក២៥០០ដើម៕
ចែករំលែកព័តមាននេះ