ចូលឆ្នាំ៣ថ្ងៃ! រមណីយដ្ឋានទឹកធ្លាក់ ថ្មក្រាល រកចំណូលជាង២៤លានរៀល ពីភ្ញៀវទេសចរ
- កំពង់ឆ្នាំង
ខេត្តកំពង់ឆ្នាំង ៖ រយៈពេល៣ថ្ងៃក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ គឺចាប់ពីថ្ងៃទី១៤ ដល់ថ្ងៃទី១៦ ខែ
ខេត្តកំពង់ឆ្នាំង ៖ រយៈពេល៣ថ្ងៃក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ គឺចាប់ពីថ្ងៃទី១៤ ដល់ថ្ងៃទី១៦ ខែមេសា កន្លងទៅនេះ រមណីយដ្ឋានទឹកធ្លាក់ថ្មក្រាល ស្ថិតក្នុងភូមិសាស្ត្រភូមិកោះខ្ទុំ ឃុំជៀប ស្រុកទឹកផុស មានភ្ញៀវទេសចរចូលលេងកម្សាន្តប្រមាណជាង១ម៉ឺននាក់ ដែលអាចរកចំណូលបានជាង២៣លានរៀល សម្រាប់ទ្រទ្រង់សហ គមន៍។ នេះបើតាមការបញ្ជាក់ពីលោកប្រធានសហគមន៍ទឹកធ្លាក់ថ្មក្រាល ដែលបានប្រាប់ភ្នាក់ងារយើងកាលពីថ្ងៃអាទិត្យ ទី២៤ ខែមេសា នេះ ។
លោក អ៊ឺត អូន ប្រធានសហគមន៍ទឹកធ្លាក់ថ្មក្រាល បានបញ្ជាក់ថា ក្នុងឱកាសបុណ្យចូលឆ្នាំថ្មី ពីថ្ងៃទី១៤ ដល់ថ្ងៃទី ១៦ ខែមេសា រមណីយដ្ឋានទឹកធ្លាក់ថ្មក្រាលបានទទួលភ្ញៀវទេសចរចំនួន១១ពាន់ ១រយនាក់ រកប្រាក់ចំណូលបានចំនួនជាង២៤លានរៀល ។ ដោយឡែកថ្ងៃទី១៧ ខែមេសា គឺបន្ទាប់ពីចូលឆ្នាំហើយ១ថ្ងៃ សហគន៍បានរកចំណូលបានចំនួន១លាន៦៥ម៉ឺន៧ពាន់រៀលបន្ថែមទៀត ដែលធ្វើឱ្យចំណូលរយៈពេល៤ថ្ងៃ បានកើនឡើងចំនួន ២៤លាន៨០ម៉ឺន៧ពាន់រៀល។ ក្រោយការកាត់ចំណាយផ្សេងៗសហគមន៍នៅសល់ប្រាក់ចំនួន៩លានរៀលសម្រាប់ដំកល់ទុកអភិវឌ្ឃន៍តំបន់ឱ្យកាន់តែប្រសើរថែមទៀត។
លោកប្រធានសហគមន៍ទឹកធ្លាក់ថ្មកាលបានបញ្ជាក់ថា មានកត្តាច្រើនយ៉ាង ដែលធ្វើឲ្យមានភ្ញៀវទេសចរទៅលេងកម្សាន្តនៅរមណីយដ្ឋានទឹកធ្លាក់ថ្មក្រាលមានចំនួនច្រើនបែបនេះ ដោយសារកត្តាភូមិសាស្ត្រ អំណោយផល ចំណតរថយន្ត ម៉ូតូធំទូលាយ និងមានផ្ទៃរាបល្អ កត្តាផ្លូវថ្នល់ក៏បានងាយស្រួល ហើយអ្វីដែលប្រសើរជាងនេះទៀត គឺទឹកធ្លាក់ថ្មក្រាល មានបរិស្ថានល្អ ទឹកត្រជាក់ និងថ្លាល្អ មានម្លប់ឈើ ស្ទើទាំង ស្រុង ចំណែកសមាជិកសហគមន៍ ព្រមទាំងប្រជាការពារបានរៀបចំសណ្តាប់ និងបដិសណ្ឋារកិច្ចភ្ញៀវបានល្អ។ បច្ចុប្បន្នរមណីយដ្ឋាននេះមានខ្យូសសម្រាប់ភ្ញៀវចំនួន៨០ខ្យូស មានបន្ទប់ទឹក៧កន្លែង ស្មើនឹង២១បន្ទប់ ។
ពាក់ព័ន្ធទៅនឹងការបង្ហោះតិទៀន ក្នុងបណ្ដាញសង្គមហ្វេសប៊ុក ដែលលើកឡើងថា រមណីយដ្ឋាន ទឹកធ្លាក់ថ្មក្រាល យកលុយពីរថយន្ត១គ្រឿង ៥ពាន់រៀល ហើយយកតម្លៃមនុស្សចូលលេង ម្នាក់១ពាន់រៀលទៀត មិនត្រឹមប៉ុណ្ណឹង យកតម្លៃខ្យូសអង្គុយ២ម៉ឺនរៀលថែមទៀត ហើយនៅមានតម្លៃអនាម័យទៀត ត្រូវបាន លោក អ៊ឺត អូន ប្រធានសហគមន៍ទឹកធ្លាក់ថ្មក្រាលបានបញ្ជាក់ថា ពិតជាបានយកតម្លៃរថយន្តដែលបានចូលលេងកម្សាន្ត ក្នុងរថយន្តទេសចរណ៍មួយគ្រឿង ៥ពាន់រៀល រថយន្តធុនធំ ចំនួន១ម៉ឺនរៀលពិតមែន ។ ចំណែកខ្យូសអង្គុយលេងមួយកន្លែង តែ១ម៉ឺន៥ពាន់រៀលទេ បើខ្យូស២ជាប់គ្នា៣ម៉ឺនរៀល ។ ចំពោះខ្យូសទាំងអស់ក្នុងតំបន់ទឹកធ្លាក់ថ្មក្រាល ជារបស់សមាជិកសហគមន៍គេធ្វើនិងគ្រប់គ្រងរៀងៗខ្លួន ។ តែសមាជិកទាំងនោះ ត្រូវបង់ប្រាក់មកសហគមន៍ក្នុងតម្លៃខ្យូស២ជាប់គ្នាថ្លៃ២៥០០រៀល សម្រាប់អ្នកអនាម័យ។
លោកបានបន្តថា ដោយឡែកចំពោះការយកតម្លៃមនុស្សម្នាក់១ពាន់រៀល គឺទើបតែចាប់ផ្តើមយកក្នុងពិធីបុណ្យចូលឆ្នាំ ឆ្នាំ២០២២នេះទេ ហើយក៍មានការឯកភាពគ្នាពីអាជ្ញាធរ ភូមិ ឃុំ និង មន្ត្រីបរិដ្ឋានផងដែរ ព្រោះដើម្បីយកប្រាក់ទាំងនេះ មកអភិវឌ្ឍន៍សហគមន៍បន្ត និងមួយផ្នែកដើម្បីជួយសមាជិកសមាគមន៍ ដែលគ្នាមិនមានប្រាក់ខែ ។ ហេតុនេះសូមបងប្អូន ភ្ញៀវទេសចរណ៍ ព្រមទាំងអ្នកសារព័ត៌មាន កុំមានការយល់ច្រឡំ។
ជុំវិញការលើកឡើងនេះដែរ លោក សេង សាលី ប្រធានមន្ទីរទេសចរណ៌ខេត្តកំពង់ឆ្នាំង បានឱ្យដឹងថា លោកបានណែនាំឱ្យផ្អាកការយកថ្លៃពីមនុស្សម្នាក់១ពាន់រៀលនោះហើយ ។ ប៉ុន្តែបើចង់អនុវត្តការយកតម្លៃមនុស្សម្នាក់១ពាន់រៀលបន្តទៀត លុះត្រាតែធ្វើពាក្យស្នើសុំមកអាជ្ញាធរ ស្រុក ខេត្ត និងមន្ទីរជំនាញជាមុនសិន មិនមែនត្រឹមភូមិឃុំសម្រេចបាននោះទេ។ បន្ទាប់ធ្វើសេចក្តីជូនដំណឹង ដើម្បីចៀសវាងការយល់ច្រឡំ។ សម្រាប់លោក មនុស្សម្នាក់១ពាន់រៀលមិនថ្លៃទេ កន្លែងគេក៍គេយកបែបនេះដែរ ៕
ចែករំលែកព័តមាននេះ