ខេត្ដសៀមរាប ៖ ឧទ្យានវប្បធម៌ប្រវត្ដិសាស្ដ្រអង្គរដ៏ល្បាញល្បីរបស់ព្រះរាជាណាចក្រកម្ពុជា ត្រូវបានជ្រើសរើសជាកន្លែងដ៏ពេញនិយម ជាងគេបំផុតនៅក្នុងពិភពលោក ។ នេះបើ ផ្អែកតាមលទ្ធផលស្ទង់មតិរបស់អង្គការ “ទ្រីប អាតវៃស័រ” សហការជាមួយអង្គការយូណេស្កូ ដែលបានធ្វើការស្ទង់មតិតាមប្រព័ន្ធអ៊ីនធើរណេត លើភ្ញៀវទេសចរចំនួន២៤៥.០០០នាក់ ជុំវិញចំណាប់អារម្មណ៍លើឧទ្យានចំនួន៧៨៩ នៃបេតិកភណ្ឌពិភពលោកទាំង៩៩១ ។ ការសិក្សាតាមប្រព័ន្ធអ៊ីនធើរណេតនោះ បានបង្ហាញថា អង្គរជាឧទ្យានដែលគេពេញនិយមជាងគេក្នុងចំណោមឧទ្យានទាំងអស់នៃបេតិកភណ្ឌពិភពលោករបស់អង្គការយូណេស្កូ ហើយឧទ្យានប្រវត្ដិសាស្ដ្រក្រុងរ៉ូម និងហ្វ្លរ៉ង់ នៃប្រទេសអ៊ីតាលី ទទួលបានចំណាត់ថ្នាក់ទី២ និងទី៣ ។
ការស្ទង់មតិរបស់អង្គការ “ទ្រីបអេតវៃស័រ” ដដែលនោះក៏ផ្ដោតទៅលើឧទ្យានដែល មានស្ថានភាពទ្រុឌទ្រោមជាដំណំផងដែរ ហើយត្រូវតែមានការយកចិត្ដទុកដាក់ខ្ពស់ជាងនេះ គឺគេរកឃើញថាឧទ្យាន “កាហ្សាបា” នៅក្រុង អាល់ហ្សេរ ឧទ្យាន “សៅល្វី” នៃប្រទេស ប្រេស៊ីល និងឧទ្យានកាហ្សាឡេ នៃប្រទេស អ៊ីតាលី កំពុងស្ថិតក្នុងភាពដែលគួរឱ្យបារម្ភជាងគេ ។ លោកប៊ុន ណារិទ្ធ អគ្គនាយកអាជ្ញាធរជាតិ អប្សរាបានថ្លែងថា រមណីយដ្ឋានវប្បធម៌ប្រវត្ដិសាស្ដ្រអង្គរ ត្រូវបានចាត់បញ្ចូលក្នុងបញ្ជីបេតិកភណ្ឌពិភពលោកនៅឆ្នាំ១៩៩២ ដែលផ្ទៃដីតំបន់ ទ្រនាប់ទំហំ៤០១គីឡូម៉ែត្រការ៉េ គ្របដណ្ដប់ ទៅលើផ្នែកមួយចំនួននៃស្រុក-ក្រុង ចំនួនប្រាំ និងឃុំចំនួន២១ ភូមិចំនួន១១២ របស់ខេត្ដសៀមរាប ស្ថិតនៅក្រោមការគ្រប់គ្រងការពារ និងអភិរក្សដោយអាជ្ញាជាតិអប្សរា ។ នៅខែ តុលា ឆ្នាំ១៩៩៣ ប្រទេសបារាំង និងប្រទេស ជប៉ុន បានផ្ដួចផ្ដើមបង្កើតជាគណៈកម្មាធិការ សម្របសម្រួលអន្ដរជាតិ ដើម្បីគាំពាររមណីយដ្ឋានវប្បធម៌ប្រវត្ដិសាស្ដ្រអង្គរហៅកាត់ថា “ស៊ី អ៊ី ស៊ី” ដែលមានប្រទេសជាសមាជិកចំនួន៣១ មកពីជុំវិញពិភពលោក ធ្វើសហប្រតិបត្ដិការជា មួយអាជា្ញធរអប្សរា ដើម្បីរួមគ្នាធ្វើការអភិវឌ្ឍ និងអភិរក្សរមណីយដ្ឋាន អង្គរប្រកបដោយ ចីរភាព ។
រដ្ឋមន្ដ្រីក្រសួងទេសចរណ៍នៃប្រទេសកម្ពុជា លោកថោង ខុន កាលពីព្រឹកថ្ងៃទី២៦ ខែវិច្ឆិកា បានមានប្រសាសន៍ថា វាជាមោទនភាពដ៏ធំធេង មួយសំរាប់រដ្ឋាភិបាលកម្ពុជា និងប្រជាពលរដ្ឋទាំងអស់ ដែលប្រាសាទអង្គរបានជាប់ចំណាត់ថ្នាក់លេខមួយ “ជាឧទ្យានដែលពេញនិយមជាង គេនៅលើពិភពលោក ក្នុងចំណោមឧទ្យានជា ច្រើនទៀតនៅក្នុងបញ្ជីបេតិកភណ្ឌពិភពលោក ។ លោករដ្ឋមន្ដ្រីបញ្ជាក់ថា នេះគឺបានកើតឡើងដោយសារតែការយកចិត្ដទុកដាក់គ្រប់គ្រងការពារបានល្អរបស់រាជរដ្ឋាភិបាលក្រោម ការដឹកនាំរបស់សម្ដេចតេជោ ហ៊ុន សែន ព្រមជាមួយអាជ្ញាធរជាតិអប្សរា ដែលមានកិច្ចសហប្រតិបត្ដិការល្អពីអង្គការយូណេស្កូ និងការជួយឧបត្ថម្ភរបស់អង្គការដទៃទៀត រួមនឹងដៃគូរ ផ្ដល់ជំនួយជាច្រើនផងដែរ ។
លោកបានបន្ថែមទៀតថា ការចាត់ចំណាត់ ថ្នាក់នេះ គឺជាលទ្ធផលលេចធ្លោមួយថ្មីទៀតនៅឆ្នាំនេះ ។ បញ្ហាអច្ឆរិយនេះមិនមែនជាការ លើកឡើងដោយចៃដន្យទេ គឺកើតឡើងដោយ មានការសិក្សាសព្វជ្រុងជ្រោយពីផ្នែកវប្បធម៌ ប្រវត្ដិសាស្ដ្រ និងផ្នែកធម្មជាតិ ក៏ដូចជាផ្នែក ដទៃច្រើនទៀត ។ នៅកម្ពុជា ថាមពលវប្បធម៌ គឺជាចំណុចគោលដៅធំធេងណាស់ដែលប្រទេស ដទៃមិនមានដូច ”គ្មានប្រទេសណានៅលើពិភពលោក” មានប្រាសាទដូចអង្គរវត្ដទេ ”គ្មានប្រទេសណាមានប្រាសាទព្រះវិហារទេ” ។
ដោយឡែក ពាក់ព័ន្ធជាមួយផ្នែកធម្មជាតិ លោកថោង ខុន បានថ្លែងថា ប្រទេសកម្ពុជា គឺមានទន្លេសាប ដែលមានទំហំធំជាងគេនៅអាស៊ីអាគ្នេយ៍ ប្រកបដោយជីវចំរុះ រួមទាំងសត្វ ផ្សោតទន្លេមេគង្គដែលប្រទេសដទៃគ្មាន ហើយ តំបន់ឆ្នេររបស់ប្រទេសកម្ពុជា គឺមានសម្រស់ស្រស់ស្អាតមិនចាញ់ប្រទេសដទៃឡើយ ដែលយើងកំពុងស្នើដាក់បញ្ចូលទៅក្នុងសមាជិកក្លឹប ឆ្នេរដែលមានសោភ័ណភាពជាងគេលើពិភពលោក ។
លោកថោង ខុន បានអះអាងថា ដោយសារ តែសក្ដានុពលទាំងអស់នេះធ្វើឱ្យប្រទេសកម្ពុជា រំពឹងថា នឹងទទួលបានចំនួនភ្ញៀវទេសចរ ប្រហែលជាងបួនលាននាក់ នៅឆ្នាំ២០១៥ ។ នាឆ្នាំកន្លងទៅត្រូវគេដឹងថា ប្រទេសកម្ពុជា ទទួលបានភ្ញៀវទេសចរប្រមាណជា២លាន៤ សែននាក់ ហើយ៦០%នៃភ្ញៀវទេសចរបានទិញសំបុត្រចូលទស្សនាប្រាសាទអង្គរ ៕
ចែករំលែកព័តមាននេះ