ខេត្តកំពង់ចាម៖ ទំនប់បង្ហៀរទឹកចំនួនពីរកន្លែង កំពុងតែដំណើរការសាងសង់ប្រយោជន៍ ដើម្បីស្រោចស្រពដំណាំស្រូវប្រាំង និងស្រូវវស្សា បានរហូតដល់រាប់ពាន់ហិតា នៅក្នុងស្រុកចំនួន៣ ក្នុងនោះ រួមមាន ស្រុកជើងព្រៃ ស្រុកកងមាស និងស្រុកបាធាយ។ នេះជាការយកចិត្តទុកដាក់ពីសំណាក់ឯកឧត្តម អ៊ុន ចាន់ដា អភិបាលខេត្ត ហើយនៅលើខ្នងទំនប់បេតុងបង្ហៀរទឹកនេះ ជាស្ពាន សម្រាប់ឆ្លងកាត់ព្រែក បានទាំងអ្នកថ្មើរជើង រហូតដល់រថយន្តធុនតូច អាចបើកឆ្លងកាត់បានទៀតផង។
លោក អូត ឈាងលី អភិបាលស្រុកជើងព្រៃ បានឲ្យដឹងថា តាមរយៈប្រជាកសិករចំនួនបីស្រុក បានស្នើសុំមកអាជ្ញាធរមូលដ្ឋាន ដើម្បីរក្សាទឹកស្តុកទុកប្រើប្រាស់ស្រោចស្រពដំណាំស្រូវទាំងពីររដូវ។ ដោយមើលឃើញនូវកង្វល់ទាំងនេះ ត្រូវបានឯកឧត្តម អ៊ុន ចាន់ដា អភិបាលខេត្ត នាព្រឹកថ្ងៃទី២២ មេសា ឆ្នាំ២០២២ អមដំណើរដោយអភិបាលរងខេត្ត ព្រមទាំងលោកអភិបាលស្រុកទាំងបី ព្រមទាំងស្ថាប័នពាក់ព័ន្ធ បានចុះពិនិត្យមើលការស្ថាបនាទំនប់បង្ហៀរទឹកចំនួនពីរកន្លែង សម្រាប់ស្រោចស្រពដំណាំស្រូវ។
អភិបាលស្រុកជើងព្រៃ រំលឹកថា កាលពីឆ្នាំ២០២១ កន្លងទៅ ឯកឧត្តមអភិបាលខេត្ត បានចុះពិនិត្យលើទីតាំងចំនួនបីស្រុក ក្នុងនោះ រួមមាន ជើងព្រៃ បាធាយ និងកងមាស ព្រមទាំងបានជួបសំណេះសំណាលជាមួយប្រជាកសិករ និងបានទទួលយកសំណើរបស់ពួកគាត់ ដែលចង់បាន គឺឱ្យមានការស្ថាបនាទំនប់បង្ហៀរទឹក។
ក្នុងពេលនោះ នៅផ្នែកខាងក្រោម ត្រង់ចំណុចស្ទឹងឆ្វេង មុខវត្តស្ទឹងឆ្វេង ក្នុងឃុំច្បារអំពៅ ស្រុកបាធាយ ត្រូវបានគេចាក់ដី និងប្រព័ន្ធលូបង្ហូរទឹក ដើម្បីឱ្យទឹកហូរចេញងាយស្រួលធ្វើស្រែនៅតំបន់ខាងលើ ហើយអ្នកដែលធ្វើដំណើរជិះកង់ និងម៉ូតូឆ្លងកាត់លើខ្នងទំនប់នេះ ត្រូវចំណាយថវិកា។ តែមកដល់សព្វថ្ងៃនេះ ក្រោមការយកចិត្តទុកដាក់របស់មន្ទីរធនធានទឹកទំនប់បង្ហៀរទឹក នៅមុខវត្តស្ទឹងឆ្វេង សាងសង់បានប្រមាណ ៩៥% ហើយដោយលើខ្នងទំនប់បង្កលក្ខណៈងាយស្រួលដល់ការធ្វើដំណើរថ្មើរជើង រហូតដល់រថយន្តធុនតូច អាចបើកឆ្លងកាត់បានមិនមានការចំណាយថវិកាទៀតនោះទេ។
សូមបញ្ជាក់ថា នៅក្នុងឃុំព្រៃចារ ភូមិសូទិព្វ ស្រុកជើងព្រៃ ដែលជាតំបន់នៅផ្នែកខាងលើប្រជាកសិករក្នុងមួយឆ្នាំ អាចបង្កបង្កើតផលដំណាំស្រូវបាន រហូតដល់ទៅបីដង។
ចំពោះសមិទ្ធិផល ដែលទទួលបាននេះធ្វើឲ្យប្រជាកសិករប្រុសស្រីនាំគ្នាសប្បាយរីករាយ និងថ្លែងអំណរគុណដល់អាជ្ញាធរគ្រប់លំដាប់ថ្នាក់ ដែលបានយកចិត្តទុកដាក់ជួយដល់ពួកគាត់។ តាមគោលការណ៍របស់ថ្នាក់ដឹកនាំខេត្ត គឺជ្រើសរើសប្រធានសហគមន៍ដោយមានឃុំចំនួន ៥ មកពីស្រុកចំនួន៣ ដើម្បីថែរក្សាទំនប់បង្ហៀរទឹក និងចាត់ចែងបើកទឹក សម្រាប់ស្រោចស្រពដំណាំស្រូវក្នុង ២ឆ្នាំ ត្រូវបោះឆ្នោតជ្រើសរើសប្រធានសហគមន៍ម្ដង។
ចំណែកលោក អ៊ុំ វិបុល ប្រធានមន្ទីរធនធានទឹក និងឧតុនិយម ខេត្តកំពង់ចាម ឱ្យដឹងថា ចំពោះទំនប់បង្ហៀរទឹក នៅតាមបណ្ដោយស្ទឹងឆ្វេង ដែលសាងសង់ចំនួន ២កន្លែង ក្នុងនោះ រួមមាន៖ ១-សាងសង់ទំនប់សណ្តរសងខាងសំណង់បង្ហៀរ(ទ្វារ២) ទី១-មានប្រវែង១០០ម និងតួសំណង់បង្ហៀរបណ្តោយ ៦៨ម ទទឹង២៧ម លើស្ទឹងឆ្វេង ចំនួន ១កន្លែង សម្រេចបាន ៩៥%។ ២-សាងសង់ទំនប់សណ្តរសងខាងសំណង់បង្ហៀរ(ទ្វារ២) ទី២-មានប្រវែង ២០០ម និងតួសំណង់បង្ហៀរបណ្តោយ ៥៤ម និងទទឹង ២៧ម ចំនួន ១កន្លែង សម្រេចបាន ១០%។
សូមបញ្ជាក់ថា ការសាងសង់ចាប់ផ្តើម នាថ្ងៃទី៥ ខែកុម្ភៈ ឆ្នាំ២០២២ និងគ្រោងបព្ចាប់ នៅមុនរដូវទឹកទន្លេឡើង។ រីឯបងប្អូនប្រជាពលរដ្ឋ ទទួលផលប្រយោជន៍ រួមមាន៖ ១-ស្រុកបាធាយ៖ ឃុំច្បារអំពៅ គឺស្រូវវស្សា ៧០ហ.ត និងស្រូវប្រាំង ៥០៧ហ.ត ស្មើ ៨១៤គ្រួសារ។ ២-ស្រុកជើងព្រៃ៖ ឃុំផ្តៅជុំ ឃុំសូទិព្វ និងឃុំព្រៃចារ គឺស្រូវប្រាំង ១៦០៨ ហ.ត ស្មើ ៨៨៥គ្រួសារ។ ៣-ស្រុកកងមាស៖ ឃុំព្រែកកុយ ដែលមានស្រូវប្រាំង ១១០ហ.ត ស្មើ ៤៦០គ្រួសារ៕ ចាន់ ថេត
ចែករំលែកព័តមាននេះ